＜＜情約一天＞＞：情路兜轉還是愛你

本身我對愛情片不太喜好，原因大多愛情片都頗婆媽及冗長，有渡日如年之感。近期有部電影上映，叫做<<1日情人>>，自自然然想起這部類近作<<情約一天>>，記得這部電影上映時口碑載道，感動不少人，加上有女神安妮夏菲維演出，令電影加分不少，不過我看完後反而覺得電影過於淡淡然，劇情欠高潮，難令我有共鳴，整體屬不過不失吧。

相隔多年後，雖然大家心有所屬，但感情卻不斷地深厚，比情人更情人，皆因彼此太了解對方，現實中如此實屬難得。

由讀書年代到慢慢發展到有感情，一切得來不易，縱使結局悲慘，回顧以往初相識既時候，百般滋味在心頭，情侶之間最值得回味是如何令關係更深厚，源自大家有不同難忘的經歷。

電影一開始講述男女主角由讀書年代初相識，發現大家對大家有好感，便一夜間產生微妙既關係。只是過了一晚後，大家都覺得做朋友比較舒服，於是訂下一個承諾就是每年的同一天大家相約出來聚聚，一年復一年，大家的感情增進了，更加了解大家想得到什麼，最後後期雖然大家各自心有所屬，但其實卻發現大家彼此之間的是愛情，最終還是在一起，可惜發展不久，安妮遇上車禍，占只能夠帶著遺憾過下半生，從而不斷回顧與安妮相處的每一段日子。

聽起上來確實是一場悲劇，亦都是這一場悲劇感動到不少人，甚至令觀眾流淚，帶著悲痛情緒離開戲院，我都覺得導演編排得不俗，滿以為大團圓結局，但世事卻往往不如人意，冥冥中自有主宰，意外的事很難猜測，當失去的時候後悔都太遲了，所以我們要珍惜身邊人之外，更加付出多一點時間去跟愛的人去玩，去做一些有意義令人難忘的事，始終在香港地，時間就是金錢，要娛樂的時間不多，莫講話想有難忘回憶呢！

兜兜轉轉，高高低低，我相信緣份，我也相信男與女之間可以做到有好深友誼的朋友，和一個人做朋友，當中的緣份確實罕有，事實是不是每一個人能做到好好朋友，之間產生出來的火花更是奇妙呢！愛情方面，更見奇妙，若果真心愛一個人，其實老套說法是：只要你開心，我不能和你一起也覺得開心。這個說法是窩心的，是真誠的，所謂情路雖兜轉，若果是真命天子，最後還是愛你的，會在一起的，所以好好的去愛一個人，這份愛要好好珍惜，愛一個人不容易的，彼此愛大家更加難的。珍惜吧。

演員方面，男女主角演出稱心，自然。皆因沒有很高潮迭起的劇情，演繹上並沒有太大起伏，兩主角外型上都算合襯，拍起來看都自然不礙眼。論搶鏡度當然是安妮夏菲維撐起整個電影，男主角演技是不太深入，比較幼嫩，要他去到最後，明顯地令到整件事情感削弱不少。

情約一天 (One Day)
導演：瓏雪兒菲格
演員：安妮夏菲維、占史杜哲斯
級別：IIA
片長：108分鐘
評分：6.5/10

＜＜星夢動物園＞＞：肯去做可成真 熱血滿瀉的卡通片

從來關於一大班動物或者關於比賽的動畫都不會不好看，因為簡單手易明，過程易有代入感，觀眾很喜歡與一個入了低潮而最後步入成功之道的角色一齊走，觀眾們都會看得開懷及滿足，而且這類動畫大多有勵志成份，灌輸大量正能量，那麼熱血的動畫最能激動人心，這一套都不例外，所以好看。

動畫中大玩大量動物及一些兩棲動物，有些頗具幽默感，而且主角們都性格鮮明，有笑點，這個創作其實幾難。

樹熊畢先生繼承家父的夢想，經營夢劇場，可惜次次都失敗收場，收入不足，於是便搞個歌唱比賽而激發起市民入場的意欲，只是一次人為失誤令到比賽獎金加大而引起大量動物參賽，迴響大但一次綵排失誤而摧毁了整個劇場，正當畢先生陷入谷底之際，得到朋友的鼓勵，再次重燃經營劇場的鬥心，於有限資源下再舉音樂會，結果引起注意，得到成功。

故事正氣得很，又高潮迭起，觀眾由一開始見到一班寂寂無名的動物們發揮一展所長，當中更有笑點，再以為成功再失敗再成功，情節能激中觀眾心裡，會同班動物們一齊去加油，這類動畫確實是由細到大必有睇頭的動畫，簡單易明。當中的正能量灌輸給觀眾很多：人要有夢想，就算要面對眾多的難題，人雖然必有沮喪的時刻，但都要鎮起來，是很難的，但只要靠自己意志及意念，面向成功並不是沒有可能。

每一個人一生出來一定有他自己的獨特專長，這就是神的意旨。若不是這樣，又何來有那麼多的技能在世上，要發掘他是需要時間，要發揮它亦都需要機會，要發展它就要看看自己有沒有決心去做這件事，想夢想成真就必須靠自己，不能在短時間成功，但求在過程中學到很多，最後必定得到更多。例如在動畫情節中不試試自己有幾多音樂理想、音樂造詣，便不知道自己有多強，有多深不見底的技能，隨即見驚喜萬分，人是需要有驚喜，才有進步，才有活著的意義，才有突破點，才有人與人之間的火花，做任何事都得出新概念出來，這也是我近年親身試過的事，人亦改變很多，眼界開了，認識的事都有不同觀念，人才有意念去活下去吧。

動畫大打友情牌，及自我鼓勵，灌輸一個信息就是人只要有夢想，凡事可成真，亦都要自己爭取機會，才有能發揮自己所長既大舞台，有信心就成功的大道理。

最突出當然是豬組合，左面的肥豬是信心爆棚的愛好表演者，相反右邊卻是害羞的師奶，一夜突破成為眾人喜愛，令人深刻。

動畫整體眾多元素俱備，有友情、親情、有笑點、有驚喜、有可愛、有好歌聽、有無厘頭、更有亮麗畫面，眾多元素融合便成為一套好看的動畫，雖則是舊酒新瓶，但內容只要擊中觀眾心，我又不介意看多一點這類動畫。動畫主角畢先生由張衛健配音，感覺適合，完全配合到張衛健本身既做人態度及性格，有大佬、話事人感覺，至少我們是聽他聲音長大的，份外有親切感，相反梁詠琪配音的豬師奶其實戲份不多，配得只算中規中矩吧。

星夢動物園 (Sing)

導演：加夫尊寧斯 (Garth Jennings)

配音：張衛健、梁詠琪

片長：108分鐘

級別：I

評分：7.5/10

＜＜妖夜尋狼＞＞：格調有型 劇本薄弱 中段沉悶

隨著電影<<妖夜尋狼：世紀血戰>>上映，這系列電影已去到第六集，這麼多集以來我從未看過，但我知這系列電影技術層面上是水準不俗的，電影賣點是打鬥動作場面及女主角，故事方面只是配菜，看完第一集後都有這個感覺，怪不得做了這麼多集都印象不深，迴響不大，第一集尚算可以，至少令我喜歡女主角吧，太有型格了。

雖然女主角今次不太需要演技，只要有型格就足夠，亦都好稱職。

男主角最後化成妖人，成件事是零伏線但有鋪排，即是拖，拖到最後先變妖人，變完亦勁D型D咁解。

故事看似複雜但簡單到爆，吸血鬼與人狼一直都是敵人，有一晚女主角姬蒂發現都市內有股人狼勢力逐漸強大，可惜同伴沒有隨同協助，只好獨自抗敵。有一晚遇上了男主角，發現他被人狼族追捕，可能是關於在他身上有一種異種血清，敵人為了得到這個元素而展開追捕，男主角更在一次行動中被咬，他將會在未來日子變成人狼，同時男女主角二人在過程中產生了感情。及後女主角喚醒了吸血鬼王，以為協助其行動，怎料他卻是殺她雙親的兇手，最後男女主角聯手殺死鬼王。

故事其實是直話直說，沒有伏線亦略欠深度，只是見到有兩族人你殺我我殺你，沒錯的，動作場面確是拍得亮麗，形成電影有獨特的風格：暗黑藍調為主，於都市內穿插，不論是飛簷走𤩹還是地下渠道火車隧道，都可以打得型打得精彩，但是卻不夠的，電影人物本身沒有性格可言，完全分不出誰是誰，誰是有目的，誰是有忍憂，只見眾角色走來走去，打打殺殺，看完只記得電影有過怎樣的動作場面，而完全忘記電影的任何內容，這算是失敗的一環。

動作場面出奇地少，最後段人狼之戰算是有睇頭，但只是一剎那的打鬥，電影長氣以致中段略嫌沉悶。

整套戲都發生在夜晚，成個Tone都是藍黑為主，有格調有風格但單一，以致電影整體單調至沉悶，然而劇本不濟都是其中一個原因。

主要是劇本不濟，故事背景不是太過現實，怎樣的背景呢？是惡勢力？有幾惡？是怎樣的吸血鬼族？看完真的不太清楚，只覺得製作人只著重畫面質素，無疑是不俗，動作場面加場地置景配合都是亮麗，電腦特技之人變狼都不過不失，好多時是於黑夜變身，絕對可以胡混過關的。

角色方面，全片主打女主角姬蒂碧金莎，此女於今次並不太需要演技，皆因沒戲可演，只要走出來有型有格，酷爆全場就夠了，而姬蒂亦都做得到，打得睇得，所以全個系列都由她主演，至於跟男主角的一段情，由於欠缺情節去交代，所以只是簡單的戲。男主角並不酷型，演技亦幼嫩，欠台型欠性格，令我覺得他跟女主角沒有火花可言，零感情交流似的。奸角們太似樣，分不清誰是最大，鬼王確是有一個造型，但戲份不多，印象不深。

整體電影有獨特自己的風格及色調，可惜故事情節並沒有很詳細的交代，人物性格又不清楚，只見一班演員走來走去，殺來殺去，唯一亮點只是動作場面是拍得緊湊及亮麗，及女主角姬蒂的吸睛能力，然而其他情節只令觀眾過目即忘。

妖夜尋狼 (Underworld)
導演：連韋士文 (Len Wiseman)
演員：姬蒂碧金莎、史葛史畢曼
片長：121分鐘
級別：IIB
評分：6.5/10

＜＜房不勝防＞＞：氛圍壓迫感強烈 結局成敗筆

最近有套戲<<冰鎮房嚇>>上映，我不其然就聯想起呢套2002年出品的<<房不勝防>>，由演技派茱迪科士打一人抗敵的驚慄片，而本人亦都好鍾情呢一類困獸鬥題材電影，尤如之前的<<禁室殺戮>>，呢一套係14年前大導演大衛芬查的電影，以當年佢既作品黎講必屬佳品，好少有唔好睇既戲，而呢一套值得欣賞既地方係拍得好有氣氛，好有壓迫感，而各演員既演出亦都好稱職，茱迪科士打又好戲又打得又有型，所以直到而家呢套戲我都幾有深印象。

茱迪科士打演的為了女兒付出任何代價的好母親，力抗三個賊人，又有型又打得又有勇有謀，單單一個戰鬥格就令到角色相當鮮明，只有佢才能勝任此角色。

唔知點解呢類戲既賊人一定有一個係高智商，一個衝動，一個心狠手辣，或者咁先有劇力，性格先夠鮮明，亦因為咁令到電影劇情有高潮迭起，全靠呢D角色令劇情豐富起黎，而今次係鬥智鬥力上亦都睇得過癮。

故事講述一對母女新搬入一間大到無倫三層樓高既新居，沒料到搬來第一天就有事發生：有不名來歷既人偷入屋內，原來係為左拎返贓款而來，一個高智商一個衝動一個心狠手辣。突然間俾對母女發現左，進入了避難室保護自己，但偏偏贓款偏偏在避難室內，雙方於是進行一場鬥智鬥力既角力戰。

故事好簡單，就係困獸鬥，母女為左唔俾班賊傷害自己，要逃出生天，於是你做初一我做十五，用腦去抗敵，而班賊都唔係流，都有腦亦有狠，於是觀眾自自然會好投入呢場抗戰，因因為真係唔使太用腦去睇，觀眾只會留意對母女會點反抗呢，班賊用乜計去拎返錢，賊之間又點樣有內訌呢，呢D情節都可以一一呈現係電影之中，導演利用屋內室內環境進入角力戰，環境再加鏡頭運用使觀眾能在不同角度去睇到雙方如何角力，雙方有咩情緒上既變化，好清楚。

導演做得好既係氣氛凝造得好夠，不單只環境上有壓迫感，情節上既壓迫感亦都好強烈，例如茱迪科士打嘗試偷出走避難室去奪取電話，用慢鏡及呼吸聲去製造喘息氛圍；頭段茱迪科士打發現有賊人入屋，叫醒女兒再運用屋內室設計去逃避賊人跟蹤，一連串既動作睇得緊張，這是導演功力吧。

部份鏡頭都運用得好好，利用環境因素去構圖，分鏡，製造多場具壓迫感既場景，而且只係單一房屋內室內環境就運用得宜，係大導既功力。

演員方面，每一個都做得好好，演員雖少，對白雖少，但眾人既演出都好稱職，當中茱迪科士打不得了，不單止造型上已顯得佢有型格有戰鬥格，毫不錫身去打去跑，情感上都拿捏得好準，功力十足。做女兒的吸血女姬絲汀年少時已經好戲，亦都好有魅力，難怪成為近年影壇寵兒。高智商賊人科力士亦都做得好，內心善良但不失賊人有既霸氣，有勇有謀，演得內歛。

整體而言，呢套都可算是有水準之作，大衛芬查只利用屋內環境幾名演員就能做到好有氣氛既場面，實在係導演功架，而且故事簡單，只嫌結局有點兒戲，警察無拿拿爆入屋內，制服賊人；茱姐只搬黎第一日但比賊人更熟悉屋內環境，甚至襲擊。不過，無論如何，呢套戲緊張刺激，拍到觀眾想睇到既情節，所以呢套戲係好睇的。

房不勝防 Panic Room
導演：大衛芬查 David Fincher
演員：茱迪科士打、姬絲汀史超域、科力士韋德加、謝勒力圖
片長：112分鐘
級別：IIB
評分：7.5/10

＜＜秒速5厘米＞＞：寫實抒情為主 細緻度滿分

繼宮崎駿後，被譽為係其接班人既新晉動畫大師新海誠，近期有套作品<<你的名字>>上畫，票房好口碑又好，當堂人氣勁升，係未睇其新作前，就睇佢之前佢既作品<<秒速5厘米>>試下水溫先。睇完覺得佢既作品偏向寫實派，畫功細緻度極高，作品方向屬抒情為主，通通跟宮崎駿相反，的確係一件好事，其風格已見有其個人之處，相信將來一定有很高的成就。

動畫以抒情為主，用人既情感去敍事，令觀眾感受深一點，再配合哀愁的音樂，畫面好有意境，觀眾亦能隨著畫面感受到角色的哀傷及悲痛，結局不是大團圓結局而留憾，卻推翻動畫必然美好的結局，係一個重大嘗試。

動畫涉及三角關係，中學生時代，係呢個時期係最令人有共鳴的，奈何故事中每人都得不到好的結局，只能夠送上祝福，知道對方幸福便足夠的情況，成件事既貼地又動人。

故事係分三個章節去合拼而成，第一章係講男主角貴樹及女主角明里自小青梅竹馬，就讀同一中學，可惜明里好快就要離開佢，到外地轉校，從此二人分隔兩地。有一天，貴樹決定遠赴外地去跟明里相約，途中下了大雪，困難重重，幸好最後兩人都能夠相遇。第二章節係講另一個女同學花苗一直暗戀貴樹，被貴樹的性格及人格吸引住，但卻無法向佢表白，有一天，卻鼓起了很大的勇氣，諗住表白，點知變成一齊去睇探索衛星發射，失去一個好機會。第三章係各人已大學畢業，長大成人，卻沒有大團圓結局，係一次既馬路上貴樹巧遇明里，諗住各人回望就有機會係埋一齊，可惜只有貴樹回望，而花苗更得唔到貴樹既理會，各人只好繼續各自生活下去。

整套動畫只有60幾分鐘，但就用左三個章節去講，係有D難度，要係咁短時間內講人物關係圖及故事背景，要唔兒戲而且又抒發到情感，難就難再新海誠用了大量旁白去講主角發生的事及心中的情感，要係唔悶既情況下就用上細膩畫面去吸引注意力，做到左！新海誠用上了人類最強既情感：友情結合愛情，最易令人去動容的元素。動畫片名為<<秒速5厘米>>意思係雖然時間過得很快，我同我心儀既對象卻只有5厘米咁少，但其實兩人係大家心裡面位置卻好遙遠，遠到見不到盡頭，唔好睇少呢個秒速5厘米，佢可以好誠實亦都好恨心話俾自己聽，其實我對我自己的最愛仍然有千千萬萬個5厘米，但如果呢5厘米係屬於單方面，就更痛苦，只能有苦自己知，就算兩人相隔5厘米，佢個心唔係你度，5厘米都變5億米。

動畫中的場景大多以最貼近現實日本實景為藍本，像真度100%，當然會令觀眾更投入及置身其中，另一好處係成件事係唔會太離地，將以新海誠望日本的角度呈現畫面上，有另一番味道。

不論係場景及交通工具，新海䛋都依照現實般去畫，細緻度極高，更將每一個鏡頭及場景執過無數次才出街，雖然好浪費時間，但出黎既成果非常有欣賞價值，其專業精神及持久力值得學習。

情感抒發得宜，令觀眾動容，係新海誠描寫人與人之間的情感不造作且真實，呢種貼地手法易接受得多。畫面上的畫功亦都好高分，新海誠風格就係意旨將場景以日本實景為藍本，用99%既真實感呈現眼前，有如置身其中，其畫功細緻度極高，所有事物都極之Detail及有意境，用色上亦有強烈Contrast，成件事都好自然，好玩之處就係見到靚及得意既地方，觀眾之後就會去實景睇下，挑戰自己亦都挑戰人地，既好玩又靚既畫面故事，新海誠的作品值得再三回味，用佢既角度去睇日本，將會有另一番風味及領會。

秒速5厘米 (5 Centimeters Per Second)
導演：新海誠
級別：I
片長：63分鐘
評分：7.5/10

＜＜洋腸派對＞＞：粗口橫飛淫淫地的破格動畫

終於有一部公映動畫係鹹鹹濕濕又喪講粗口，會睇得好過癮，創作人好有創意咁將麵包跟腸仔意淫地結合簡直係完美組合，既合情合理而且又做到淫賤既效果，又有隱喻，果然厲害。不過故事上意淫情節只在尾段爆發，而大半段都過於正路，亦沒太大笑位，整體黎講，只算合格有餘，可以再玩得狂一點。

腸與麵包之間由鄰居變情侶再變患難與共既情人，呢個擬人法係好奇妙，將死物注入生命，再注入思想用佢地既角度去諗我地，呢個就係過癮之處。

故事講腸仔係故事中竹旳主角，發現超市入面有個傳聞就係一出去門口就會發現另一個新天地，仲要好鬼正，謠言一出每種貨品都好想人類可以揀到自己離開呢個冇世界既超市。有一天，有罐花生醬被帶回超市，卻領效過原來外面既世界並非如幻想般美好，仲要覺得世界原來係咁殘酷，人類係會好狠心咁摧毁D貨物，於是貨物們就進行一次大反擊，途中腸仔跟麵包女友失散左，就係呢個過程中更有所反思。

作為香港公映CG動畫的首部三級作品，我都好期待呢部動畫既質素會係點，睇個Poster就會預計呢部會幾色情，幾好笑既動畫，係估唔到會有血腥場面添。呢個擬人法既動畫其實好普遍，點樣去突圍呢？創作人好有諗頭就用腸仔跟麵包好夾咁去玩條橋，已經好絕。尾段個幕瘋狂地做愛及亂搞一通真係覺得創作人強勁，可以玩到咁都幾勁，腸仔可以任穿麵包，果醬跟果醬做愛，麥片盒又唔知同粟米片盒做愛，真係好癲又幾過癮。

冇諗過會有血腥場面，所謂的血腥就係唔流血都覺得好殘暴，呢個意識形態做得好好。

腸仔同麵飽做愛係非常絕核同埋配合得天衣無縫又合常理，既過癮又意淫，岩晒呢一類鹹濕動畫，效果好出。

不過故事卻離唔開正路思維，死物們要進行革命，去反人類，去反一D無理又去虐待自己既敵人，再集氣，免再受皮肉之苦，呢個情況就似現今世界，雖然我地星斗市民冇權又冇勢，唯一可以做既就係集氣再起革命，才有一線生機，扭轉局勢，自己人打自己人當然係蠢，與其係咁就要搞對抗，下場係點冇人知，但最少有落過力。動畫中段就開始有拖長時間之感，就係腸仔跟麵包失散，要搵返大家，點知冇任何歷險情節，更係無拿拿相遇返，更只聽到人地既一面之詞就扭轉局勢，呢幾個位就未免太過突兀，欠鋪排令高潮位極短暫，係動畫其中一個敗筆之處，尾段時進行大反擊，反而好淡淡然，好Standard 既對戰，但少了笑位及過癮地方，略嫌失色。

去到結局先至係全動畫既高潮位，我相信觀眾只要睇呢三分幾鐘既片就足夠。其他位係有大量粗口，笑位我覺得唔夠，或者呢D只係美國先識笑既位。整體而言，<<洋腸派對>>開左先例原來三級動畫可以咁玩，仲唔使理有咩限制級情節，點畫都得，不過最重要還是故事內容，呢樣野正正就係今次呢部動畫做得未夠好既地方。

洋腸派對 Sausage Party
導演：康維特費隆 Conrad Vemon、格雷泰爾南 Greg Tieman
級別：III
片長：89分鐘
評分：7/10

＜＜魔髮奇緣＞＞：久違了的歌舞片動畫 欠缺新鮮感的故事

我仲記得以前細細個成日睇迪士尼既動畫，絕大部份個D都係有歌舞元素，好似<<阿拉丁>>、<<美女與野獸>>咁，通通都好好睇好經典，但而家既動畫都已經好少有呢類動畫睇了，近期最爆只能數到<<魔雪奇緣>>，至於呢套<<魔髮奇緣>>亦都走同樣路線，動不動就聞歌起舞，其實係可以令到成套動畫生色不少，只不過當個故事真係平平無奇，歌又唔係特別好聽，所以動畫迴響細係無可厚非。

女主角本係公主，仲係BB個陣時被個女人偷去，原因係知道公主擁有法力既長長頭髮，所以將佢私有化，同埋目的係可以令到自己長生不老，不過故事並無講太多法力幾有影響力及效果，未能發揮動畫特點。

動畫最有印象既一幕係公主跟賊匪於艇上睇住天燈談情，畫面係靚既，而且係幾浪漫的。

奸角並不奸，只係行行企企冇性格既角色，戲份亦不多，令到動畫好多時缺乏好人壞人對戰，悶場頗多。

故事係講有位公主自小已被個女人劫走左，係因為公主有一把有法力既長長秀髮，可以令個女人長生不老，保持貌美，由細至大灌輸既訊息不能離開佢屋企，怕俾人搶去，尤如禁錮。有一天，有個賊仔偷了皇冠，被皇宮大內侍衛通緝，偶然間黎左公主既屋企躲避，被公主發 現後，公主為左去現場睇夢𥧌以求既天燈，於是要求賊仔帶佢去睇，期間兩人互相產生了愛意，及後被班奸人發現後，賊仔為左化解一切問題，斷然剪下公主長髮，將所有問題一一瓦解。

故事非常之正路，亦都顯得平平無奇，沒有新鮮感，一貫童話故事既橋段及起承轉合，係冇太大驚喜既劇情之下，原以為歌舞片，一定會唔差，點知我個人覺得歌舞環節無助故事軒起高潮，歌曲本身不太好聽，畫面上亦都冇太多起伏，整體偏向納悶，奸人冇乜太多作為，冇做好多壞事去令觀眾說服佢地有幾咁想要個法力及以後既利益，可能戲份已經唔算多，太多篇幅去講公主及賊仔之間既關係變化及歷程，變左情節上變化不大，悶既情況又較多，係比較失望既一環。至於後段公主無意中知道原來現在的媽咪係假的，呢個位好突兀，交代得好草率。

其實動畫背後既理念都好正面及正路，人係冇可能一切貌美如花，就算有法力都總有失去法力既一日，到時只會更加痛苦，去夾硬去令一個失去自由係非常之自私既行為，所以終歸都得不到好結果；一個公主無論係咩人都一定本身係個好有夢既女仔，然後被奸人所害被迫做自己唔願意做的事，最後發生咩事都好最後都可以同自己心愛既男仔一齊，甚至結婚，大團圓結局，係呢種冇驚喜既動畫既情況下，觀眾只會過目即忘，連公主叫咩名都忘記，皆因個故事太平凡了。

整體而言，一套成功動畫真的不易得到大眾接受，Elsa爆出黎真係天時地利人和，若果想有多一部動畫再爆，我就覺得歌舞片包裝既動畫係好，但係故事上真係要化多少少心機，劇情例牌唔緊要，只係觀眾係貪心的，要一套動畫包含好多元素，有唔同既野睇先覺得值得睇，希望黎緊迪士尼動畫可以從舊橋中創造新的演繹方式去包裝動畫吧。

魔髮奇緣 Tangled
導演：Byron Howard、Nathan Greno
級別：I
片長：100分鐘
評分：6/10

＜＜天使與魔鬼＞＞：科學與宗教係配菜 典型犯罪片係包裝

還記得睇第一集後，個第一感覺係究竟講緊乜呀，好悶囉咁。第二集係製作上有明顯既分別，算係有進步，係因為劇情緊湊好多，節奏明快好多，唔會太過長篇大論，好處係佢話乜就乜，唔使點用腦去睇，係咪好事？我就唔係咁睇，我覺得呢類片種係需要懸疑性偏重，動作場面偏少都冇乜所謂，我睇完之後覺得其實呢套同一般商業警匪片無異，仲稍為欠缺要觀眾去估既感覺，好多野太過順理成章，只有湯漢斯所飾演既教授而去進行行動，失望既係冇電影本身要有既中心思想及哲學。

電影中段開始有探索古墓情節，欠深度且得湯漢斯屈機解謎，係欠缺懸疑氣氛底下，我地只能睇住一班人係度搵野，然後又有班匪徒陸續殺人，然後班差人又廢，只能靠節奏明快去掩飾。

匪徒殺教宗候選人手法層出不窮，花盡心思大龍鳳咁鬼揚去殺人驚死人唔知咁，所謂的暗殺係明顯地殺人，仲要差佬冇佢地符，又講咩科學咩宗教，其實咪只係去殺人犯罪吧。

故事一開始見到有班人係度進行研究，忽然間有人黎偷取反物質，更有研究學家被殺。湯漢斯演的教授被邀請去利用科學理念及地理環境去解謎，誓要搵回反物質，阻止反物質爆炸夷平整個梵帝岡。同時間四位教宗候選人被綁架更逐一被殺，湯漢斯便聯同科學家女主角及教皇內侍伊雲麥葵格去解謎，點知最後原來一切都係由伊雲去策劃，更不幸被攝錄機影到，謎底被逐一解開。

滿以為呢類大片會充滿哲學性，有反思既作用，電影片名已講出天使與魔鬼，諗住可以大造文章，會講一個人心裡面既天使與魔鬼既一面，咁究竟有幾天使，有幾魔鬼？原來只係表面。沒有內心既掙扎，亦沒有內心既魔性散發出現實之中，利用宗教既元素去包裝，但運用唔到天使與魔鬼既極大分野及影響力。

誰不知經歷過第一集既失敗後，對第二集當然有點卻步，首先我覺得我並不太有興趣睇呢個系列，因為題材真心覺得有點悶，講宗教講科學，可能會有好多宗教背景及意念會灌輸入腦，科學上有好多深奧理據去探討，點知電影內係有提及到的，但欠缺深度，好表面，單憑湯漢斯演的教授的片面之詞就去解謎，略帶兒戲，好似顯得班差人好無能，匪徒好無法無天，想點都得，點知最後謎底解開，反而用上天網恢恢，疏而不漏，衰係個CCTV手上，竟然可以睇到又聽到，一切既事都好似即刻明晒咁，真係欠鋪排欠連貫性，即係之前所有既案件及謎團係拖時間，夾硬製造出黎，幸好電影今集改用節奏明快及緊湊既氣氛來掩飾內容既不足，才挽回不少分數，如果見到咁既結局：見到幕後黑手伊雲無厘頭走去自焚咁荒謬既一場戲，真係睇完點會唔嘆一聲廢氣呢。

伊雲麥葵格演的幕後主腦主張宗教大於一切，但其實其私心作惡，滿口歪理但理據不足，立場唔夠鮮明，一方面又想幫手搵反物質，另一方面又想主宰一切，矛盾性格，最後更離奇自焚，敗筆之處。

演員方面，成套戲主打湯漢斯，其餘角色含糊不清，女主角更係花瓶，行行企企就算，湯漢斯要一人打救全片係相當困難，皆因故事有點散亂，沒有高潮位之下只見到角色們手忙腳亂，只見到個殺手大搖大擺係街上行走，一人去挑戰所有人，確係有點荒謬，湯漢斯只能做好自己本份，但無助電影質素上升。其他演員樣貌模糊，已經難分辦之下真係冇話邊個做得好。

整體而言，技術上今集比起第一集已經有進步，起碼節奏比較緊湊，似一貫荷李活典型犯罪片格局，但高潮位欠奉之下，故事亦略欠深度，不能夠就住謎團帶出宗教的背後值得商榷的意義及歷史，亦都用左唔係咁科學既理由去解謎，結局更帶點兒戲草草了事吧，第三集現正上映，期望不大吧。

天使與魔鬼 Angels and Demons
導演：朗侯活 Ron Howard
演員：湯漢斯、Ayelet Zure、伊雲麥葵格
級別：IIB
片長：138分鐘
評分：6/10

＜＜奇異博士＞＞：大玩時空場景交錯 雜抄於一身

英雄片氾濫係現今荷李活電影不可缺少的一個種類，既可長拍長有又可賺大錢，就算故事有幾舊酒新瓶，特技有幾誇得咁誇，觀眾仍然會願意入場睇，Marvel今趟開拍<<奇異博士>>，可能係為左幫Advengers第三集鋪路，今集搵左近期人氣男演員班尼狄去演奇異博士，選角合適，外型好戲好，奈何我覺得呢套戲故事好一般，欠重心，亦會估到下一步會點，情節及特技又明顯係雜抄大成，難免有好多位似曾相識，呢套英雄片只屬不過不失吧。

電影大玩空間轉移，似向<<Inception>>致敬，又睇到眼都花埋，特技雖勁畫面又靚，但無助故事既娛樂性。

電影多番提及到人體內的靈魂可於現實世界中實現自己想做的事，橋段新穎但犯駁位有好多，當中醫院內靈魂大戰其實好多不合情理地方。

故事非常簡單，世界知名神經外科醫生班尼狄為人高傲自大，知識廣博，因一次交通意外令到自己雙手重傷，不能再做醫生，係身心受重創既時候，得知尼泊爾有位世外高人可以有機會治返好對手，於是有理無理就去尼泊爾博一博，點知各位大師各懷絕技，而自己更有幸被傳授絕技及法術，同時間亦都踩入了黑暗勢力範圍，而自己卻只想醫好隻手既同時，又發現既然自己有能力去捍衛地球，於是就跟黑暗勢力決一死戰。

故事非常一般，就好似睇緊<<Batman Begins>>咁，有個人發現自己有事所以就去修鍊，點知又練得一身好武功，及後發現左好似<<Inception>>咁，個世界可以任砌任你點玩，將你眼前既野點扭點走都得，畫面係靚特技亦都好勁，但好多都見過，而且睇到眼都花埋，新鮮感減低左；場景亦都好似<<Inception>>咁去到一個以木系為主題既地方做修鍊，再玩時空交錯，係<<Jumper>>，然後去到尾段，玩既係另一個科幻世界，玩時間無限Loop，世界似係<<Interstellar>>，再玩<<月光寶盒>>玩不停循環，煩死又笑死，就係就湊成呢部<<Doctor Strange>>，好多都似曾相識，講得好聽就係致敬，講得唔好聽就係技窮冇橋，所以話呢套好唔好睇？實屬見仁見智。

感覺上奇異博士不如其他英雄般實力強勁好得打，但知識廣博，係用腦去取勝，當中一招時間無限Loop係笑話，但確係一個辣招。

電影為左打入亞洲市場，硬加入香港場景作為尾段重要決戰基地，但香港人明眼人一睇假到爆，好多都係以中國大陸為本眼中的香港，值得欣賞既係道具全用繁體字同埋道具像真度好高，極細緻。

呢套戲亦都係非一般的英雄片，因為佢唔係好好打個隻，而係玩法術食腦既英雄，所以冇期望會有好激烈既打鬥場面，只有一大堆既哲學理念，講既係人生所追求既事，有好多事都唔想去做但偏要去做，為左令自己更強而遺背自己，有D人天生天才，變高傲自大，到自己有事有要事相求就不得不死死地氣去求人，亦都要有勇氣去面對將來既事，係一件非常困難既事黎。電影透過人體內的靈魂其實就似每個人心裡面既良心，往往都可以睇到現實既自己係點，靈魂就會想辦法去做返好自己，甚至救返自己，人本性真的唔壞，只係人一有權就人性被垊滅，去破壞好多事黎，時間是不能返轉頭，現實又點會好似電影咁可以無限Loop有得挽救呢？

選了班尼狄做奇異博士非常適合，外型高大又討好，演技又好，近期佢又係灸手可熱既男演員，要有咁既質素演員電影至少有吸引力，因為呢套故事咁一般既電影唔去靠演員唔去靠特技真係死得。就算電影加入了其他地方元素，如尼泊爾及香港，有國際化既視野，但通通都係外國人眼中的地方，始終擺脫唔到有D假既地方，得個殻但內涵欠奉，因為沒有該地方真正的傳統味道，個種味道唔係搭景就可以有，做得假只會得到當地人的恥笑，不過呢個係英雄片重點始終放係特技之上，其他野已顯得不太重要。黎緊長拍長有，希望越拍越好吧。

奇異博士 Doctor Strange

導演：史葛迪歷克遜 Scott Derrickson

演員：班尼狄甘巴貝治、蒂達史雲頓、楚伊特艾治奧福、麥斯米基辛、麗素麥雅當絲

級別：IIA

片長：115分鐘

評分：7/10

＜＜殺破狼II＞＞：密集式動作場面喜見技術層面進步

第一集打起左甄子丹，打得爽，口碑載道，來到第二集，人面全非，跟第一集無關之下，故事可重新出發，更發展到泰國，可以玩得更多，場面更見龐大，今集重點當然仍然放係動作場面之上，實感一流，密集式動作場面令觀眾睇得好爽，因為演員均是打得之人，故事情節上亦都具好多元素，有親情、溫情、義氣等等，呢一集比起第一集更具睇頭。

呢一場一Take過的對打場面一氣呵成，難度高在係群戲，所有排練一有差錯又再重新黎過，而且打戲好連貫，又跳由上至下打到熱血沸騰，單係呢幕已經覺得值。

三位主角都係打得之人，去到最後三人相遇，打得精彩，拳拳到肉，亦有驚險鏡頭，係動作設計指導的功勞。

故事由古天樂演的變態哥哥出發，為左延續自己生命不惜要跟自己弟弟恭碩良換心臟，香港警察就奉命阻止；卧底吳京身份被揭發後就被困在泰國監獄裡，Tony Jaa見到眼前有好多不公義，於是協助吳京，同時為左救回患癌的女兒，到處尋找合適血型既人，獄長張晉受命於古天樂幫佢搵合適心臟，護主心切，不惜對抗吳京及Tony Jaa，眾人相遇，引發一場內戰。

故事分左好多條線，交代眾角色的人物關係及問題，算係交代得清𥇦，而且不見雜亂及不合情理，相當難得。先係Tony Jaa條父女親情線，不落俗套，而且帶點動容，預左Tony Jaa會好誇張地去不停咁打，但今次又唔覺太誇，收斂左效果更好，今次更要演技，係尾段死極都死唔去，略嫌有點英雄主義；然後有古天樂及恭碩良既兄弟之情，其實講到尾點解唔一早換細佬個心，講到自己有幾偉大，幾對細佬有情有義，最後咪又係要佢個心，更加無所不用其極，引發一場角力戰，最後都敵不過班打手，即使自己有命活下去，都敵不過等天收，對現今香港好諷刺，中國人不斷奪取香港好多原本屬於香港人既野，但佢地冇等天收，反而係我地香港人日日過著艱苦生活，邊個可以話事？至少下把香港人冇得話事。

電影加入了Tony Jaa既父女之情，令呢部陽剛味極重既男人戲緩和一下，而且都刻劃得幾細膩，豐富了電影劇情。

古天樂特別演出的變態哥哥，為左自己犧牲其他人都在所不惜，其陰沉演繹都恰到好處，戲份少但印象深刻，算係佢近年比較少見但演得好的一角。

然而去到泰國監獄，好似講到好恐怖，因為有太多惡人惡霸，又有地下交易，然後講到吳京以一敵百，好鬼犀利，都拍出個張力，吳京似係去到盡頭便豁出去，有理無理殺出去唔係咩事既心態，再爆發力量遇神殺神，再加上一Take過由上至下跳黎跳去不停打，還有強勁配樂，一氣呵成，打得爽睇得爽，睇得出導演既野心好大，想試另一個角度去拍打鬥片，攝影技巧上都好強，以致整套電影既技術層面更見進步，所以話香港動作片真係最強。唯一不足之處係我寧願結局係Bad Ending，而家好似夾硬要圓滿結局仲反而唔知點咁，Bad Ending既用處在於可能代表每人總會事與願違，有心做但往往世事偏偏唔俾你去做到，有時盡左力已經足夠，好過而家結局似係總之我點做都得，任去打任去殺博條老命我都換返個結果返黎，咁樣未必合乎現實吧。

演員方面，重點放在吳京及Tony Jaa身上，原來兩位都可以演得，尤其是吳京，佢演得不俗，係香港時成為道友個種散漫及無助，其頹爆既造型更見落漠，到了泰國監獄後情緒爆發，無助感倍增，其歇斯底里演出真的刮目相看，原來佢打得都仲可以演得，而且講廣東話對白，對港產片的一種尊重，值得欣賞。Tony Jaa都演得好，演慈父多文戲，都睇到其實佢好愛佢個女，表情加分，落力地打當然有分，整體不俗；張晉演的獄長有型不失奸樣，打得睇得。古天樂特別演出，卻係我覺得佢近年演得比較好的一部，角色上有突破，演變態哥哥，其陰沉演繹恰到好處，造型上幫了不少。

整體而言，演員上的性格有層次分明有立體感，係會隨住劇情發展衍生出黎，所以故事情節相當重要，要電影好睇最基本係有故事，清楚地去描寫人物性格，情節理據，呢集做得到，密集式動作場面並無忽略劇情發展，使動作場面並不突兀而且越打越爽，導演執導功架見進步，係我地觀眾對香港動作片仍然有信心既保證吧。

殺破狼II (SPL II : A Time For Consequences)
監製：葉偉信
導演：鄭保瑞
演員：Tony Jaa、吳京、張晉、任達華、古天樂、恭碩良、盧惠光、林嘉華、艾威、蔡瀚億、姜皓文
級別：IIB
片長：120分鐘
評分：8/10

＜＜三人行＞＞：貫徹杜氏風格 但故事演員水準一般

杜琪峰近年既作品大多在中國大陸拍攝，但大多均能保持港產片風格，沒太多大陸味道，係導演既功架，不過相對地作品質素卻沒以往的精彩，好似上一套<<華麗上班族>>顯見有力不從心既感覺，到今套<<三人行>>又嘗試用全廠景去拍，皆因全片大部份時間都發生係醫院內，更有一場人肉加畫面慢動作槍戰場面，有新嘗試係好事，但電影水準質素都好重要，而這套電影卻顯得力有不繼之感。

貫徹杜氏風格畫面構圖，除左型只有型，就算電影未算好睇，淨係睇杜氏風格都夠了。

最後一場人肉慢動作再加後期慢動作既槍戰場面，一Take過，再向高難度挑戰，拍得好但效果一般，卻沒有令電影情節有推進作用，仲好突兀，眾演員演出好壞參半，係再一次顯示有野心但做得唔夠好既示範。

電影故事一開始發生於手術室內，趙薇演的腦科醫生進行手術，經歷失敗後信心受挫，後來遇上悍匪鍾漢良演的病人，為左要幫佢做手術令自己重拾信心，不惜對抗演警察的古天樂，然而鍾漢良的同伴入侵醫院，意圖劫走他之時，經過一輪混戰後，三人更得到各種結果。

首先電影的攝影風格仍然係杜琪峰獨有的，Wide Angle、Zoom In、Close Up一件事再去發展人物性格及將會發生既事，有型有格，而且杜生近來多在大陸拍戲，更多用片場去搭景拍攝，可以點拍都得，限制又少左，但像真度減低左，好明顯睇到好假添個景，我既觀感係呢D係用錢堆砌出黎既場景，係你地覺得係咁既野，而唔係實景帶黎既歷史感同埋真實性，呢樣野係搭景永遠都唔會有既感覺。

其實電影前半段劇情上都頗模糊，未知實際上講乜，只係知古天樂想破案，但不斷留難鍾漢良，而鍾漢良又唔知等乜，又唔似將會有大查飯，各人的目的好唔具體咁表現出黎。結局都係一個敗筆之處，最後一幕鍾漢良吊吊Fing，明知死路一條都咁做，仲要得到古天樂良心發現，天要佢唔可以殺佢反而仲要救返佢，呢個轉拆位好唔順，搞到我地觀眾條氣都唔順，仲要突然間硬插王梓軒坐住輪椅碌樓梯自殺，死唔去仲要行得返，似係拖時間同埋好無稽，不合情理，就算前段拍得幾有風格幾有氣氛，結局差點都扭轉唔到爛既命運。

眾演員都演出木納，只得一個表情，就連好戲的趙薇都不見得做得好，整套戲顯得不知所措。

演員方面，每個演員都好似失去靈魂咁，表情只得一個：木納。就連好戲的趙薇都做得唔好，演得不知所措，唔知角色上的定位係邊，亦都睇唔出佢既立場係邊度，但佢呢個角色係全片既靈魂人物，反而唔見得佢可以帶動其他人既演出及劇情推進，係失手之作。古天樂依舊做警察，依舊木無表情，依舊一個樣去做整套戲，反而鍾漢良演得不差，可能係比較少睇佢演出，但奸狡度不夠，可以更好。其他演員過去都在杜氏電影中演出過，演出沒太大驚喜。

整體而言，我覺得對上一套比較好睇既杜琪峰電影已經2012年既<<毒戰>>，主要因為電影雖係全大陸拍攝，但拍出港產片既味道，係高手之作，但近年大陸味越來越濃烈，以致失去香港味道之餘，電影劇情更加不合情理，呢種用錢堆砌既所謂港產片真係不敢恭維，真心希望杜琪峰可以拍返以前電影既味道吧，作為粉絲的我不想再失望了。

三人行 Three

監製：杜琪峰、游乃海

導演：杜琪峰

演員：古天樂、趙薇、鍾漢良、盧海鵬、林雪、張兆輝、龔慈恩、謝天華、黃浩然、王梓軒、洪天明

級別：IIB

片長：88分鐘

評分：6.5/10

＜＜神勇飛虎霸王花＞＞：零劇情之下不見得有幾神勇囉

乘著首集的成功，多數都會再有續集，而續集多數都會唔好睇，而呢個系列既續集既質素，真係跟第一集既相差大遠了，只係用上大部份既原班人馬去胡混地拍多一集，零劇情，欠連貫性既情節處處皆是，就算加了新人物，根本幫唔到成套戲質素，睇完都覺曬時間。

今集主要圍繞教官鬥生鬥死，只係為左要鬥贏女教官既芳心，結果只能夠靠身邊既下屬幫佢地圓夢，無聊到極，警察訓練變成追女仔橋段，係咪要搵咁既野去做娛樂性故事？唔覺囉。

今集加入了新角色，最搶要數葉子楣，但佢既作用只係佢既身材上，其角色性格上於片中毫無用處，只係點綴畫面罷了。

電影故事不濟，片名更係有誤導成份，以為係會講霸王花會跟飛虎隊於案件中大顯身手，鬥過你死我活，噢！錯晒，大部份時間只在學堂內發生，但重點卻不在於兩隊加強訓練，而係睇見教官們如何利用警隊資源、時間及人材去追女仔，真係無聊到極。就因為全片只係追女仔為主，完全睇唔出有幾神勇之處，所以去到片尾15分鐘先有劇情講到有案件需要去行動，奈何因為只有15分鐘，所以成個犯案過程以致破案過程非常倉促及兒戲，而呢個部份更加和前大部份學堂戲份完全冇關係，原來之前曬左咁多時間去睇無關痛癢既情節，非常失望。

演員方面，重點已放在吳君如身上，搖身一變由上集既配角成為主角，但佢既作用只係提供搞笑，但笑點嚴重不足。另外重點放在三位教官胡慧中、馮淬帆及黃錦燊身上，但在於故事毫無亮點之下演出一般，其他演員戲份不份極少，沒戲可言。

整體而言，呢個續集完全不合格，沒有延續首集既成功，睇唔出有幾霸王花，於上集至少見到班差婆真係好打得，才有霸王花呢個稱號，今集大部份時間於學堂內胡鬧，完全沒劇情可言，結果只會覺得曬時間，浪費左呢個系列既神韻及帶來既口碑。

神勇飛虎霸王花 The Inspector Wears Skirts II
監製：成龍
導演：錢升瑋
演員：胡慧中、吳君如、惠英紅、羅美薇、葉子楣、馮淬帆、樓南光、黃錦燊、盧惠光
級別：II
片長：96分鐘
評分：3/10