＜＜賊王＞＞：被騙了 不是講犯罪的警匪片

電影係1995年上映，由任達華做賊王，確係一個明智之舉，任達華於當時演的角色多數都係變態佬、舞男、殺人犯等等瘋癲角色，皆因佢拿捏得非常精彩，無人能及。但當你以為你會係呢套戲見到任達華如何做個賊王就大錯特錯，不單止呢個賊王冇乜點犯案，而且只係做一個囚犯多過做一個賊，係劇本本身既方面有錯，全片只睇到班警察點樣查案，點樣用酷刑去虐待犯人，尤其係滿足觀眾慾望虐待關秀媚，呢套戲真心覺得差，冇內容。

任達華演痴線佬同埋高智罪犯真係一流，所表現出既瘋狂及癲喪既性格係一絕，無人能及，但做得好都冇用，因為劇本太差，救唔到全片近乎垃圾既級數。

關秀媚今次豁出去，不單止有情慾戲，而且有被虐待場面，有透點有身材有插下體等限制級情節，奈何佢演技欠奉，或者觀眾只睇呢D已滿足，根本唔會理佢做得好唔好。

任達華及關秀媚既情慾戲都頗大膽，兩人戲中既默契都有，兩人落力既演出都算可觀。

故事講賊王任達華屢犯案但卻逍遙法外，演警察的李修賢誓要搵到證據入佢罪，一次搶劫案係一個好機會，於是更藉呢個機會去威迫甚至嚴刑拷問賊王，最終都夠料令賊王治罪。

電影本身可以係一個好好既題材去拍，但偏偏電影主線落在虐待拷問部份，令電影不倫不類，或者當時犯罪電影主流係多講查案過程及拷問犯人居多，使電影欠缺個性及劇情推進，亦都係當年B Movie的弊病，有更好的題材都好難拍得出好電影，或者呢個亦都係九十年代香港B Movie的一大特色吧。

感覺被騙了。去到一個點係睇完套戲係冇乜Comment。

賊王 Twist
監製：李修賢
導演：李修賢
演員：任達華、關秀媚、李修賢、關寶慧、周文健、樊少皇
片長：92分鐘
級別：III
評分：4/10

＜＜蝙蝠俠對超人：正義曙光＞＞：頭段慢熱後段激烈 難掩故事不濟情況

由一開始話拍呢套戲個時已經對此片期望不大，純粹覺得為左搵錢而拍既片，中伏機會極大，跟住知道班仔做Batman，心諗：唔X係呀嘛！一D都唔型，一D都唔襯，完全冇晒感覺，好喇！到左出Trailer都知會出事，好多野似係夾硬黎，重點夾硬蝙蝠俠點樣決戰超人，明眼人都知兩者根本冇得打啦，預計故事都將會爛爛地，期待感仍然冇。直至睇完喇真係，又發覺又真係唔係咁差喎，要講既野好多，長氣之後尾段既打鬥確係拍得好，配樂及視覺效果出色，挽回唔少分數。

班亞佛力亦都冇前幾個演員咁好，角色上亦都實力最差一個，更刻意塑造佢有邪惡一面，令蝙蝠俠於今套電影裡淪為陪襯品。

超人本身實力屈機，最後大戰多放焦點係佢身上，畫面又亮麗，拍出本片應有既氣勢。

電影最後硬加了神奇女俠上場，中和電影剛陽味過濃，神奇女俠演員亮眼又夠索，係一個好好既搶鏡位，實力亦都不錯，選角正確。

故事講述蝙蝠俠係葛咸城既無名英雄，超人係受萬人景仰既眾人英雄，蝙蝠俠眼見超人的出色表現反而擾亂左社會既秩序及市民既強烈控訴，而超人很想多點了解蝙蝠俠，於是雙方便處於交著狀態，蝙蝠俠更有意挑戰超人，同時間有另一惡勢力濔漫整個葛咸城，就係謝西演的高智眾犯，意圖製造一個擁有超強力量既獸人去搞亂整個城市，誓要殺死蝙蝠俠，於是二人放下成見，聯手對抗強敵。

電影節奏上前半部係好慢熱，始終要交待好多野，包括蝙蝠俠及超人的過去，然後二人對社會有咩影響及問題，跟住長篇大論去講二人點樣對戰，跟住又要講奸角起源，呢度起碼講左成個鐘，一堆堆既對白冇動作場面確係會令觀眾吃不消，稍為訓著都未必跟得到甚至想繼續跟落去，幸好尾段的對戰部份拍得精彩，雖然明知只有超人先有力一戰獸人，配樂及視覺效果應記一功，配合得好好，好有氣勢，呢部份確係挽回不少分數。

謝西艾辛堡演的奸角意圖塑造一個瘋癲既奸角，演繹上係可觀，奈何小丑太過深入民心，任何奸角只有佢既影子，甚至用任何狀態去演的會有比較，佢今次演得好但冇奸角味，落力但唔得難忘。

最後打大佬係一隻怪獸，真估佢唔到，醜爆而且實力一般，估唔到睇Batman好似睇緊哥斯拉，驚愕！

演員方面，各演員基本上演出尚算合格，係蝙蝠俠好唔掂，係最差的一個，聽聞係因為要跟返漫畫原著既造型，所以先有班亞佛力呢個版本，但真係唔俾劣評唔得，又矮又冇型格，Batman服裝上更似機械人，雙眼更發光，完全泯滅晒過去蝙蝠俠既型佬形像；超人依舊型格，心理交戰上既演繹都到位，所以我會為超人而感動；神奇女俠選角得宜，真心覺得索得黎係有型，實力高低已經唔係重點，實力又點會夠超人玩呢，男人味咁重之下見到個樣眼女角係會眼前一亮；奸角謝西唔係唔夠奸，但先前小丑太深入民心，就算你做得幾癲幾狂都係會有小丑影子，今次謝西都算合格，但嫌佢個性不足，話佢癲既又唔夠，奸又唔夠奸，演出落力但印象唔深，係做奸角既一大弊病。

整體而言，從冇期望之下看呢套電影已經覺得未算太差，至少動作場面係真係拍得好精彩，所有野都好配合，只係有時面對呢D大堆頭電影，劇本上一定不濟，要掩蓋劇本唔好既情況下唯有靠特技去補救，今時今日特技已經唔係主導，觀眾已經愛睇貼地既電影，若果電影公司再只為賺錢而夾硬再做呢類電影，英雄片遲早會被搞死。

蝙蝠俠對超人：正義曙光 Batman VS Superman : Dawn of Justice
導演：薩克薛達
演員：班亞佛力、亨利卡菲爾、艾美雅當絲、謝西艾辛堡、姬嘉鐸
片長：152分鐘
級別：IIB
評分：6.5/10

＜＜消失的兇手＞＞：消失的上集精妙佈局 鬆散欠高潮

承接上集<<消失的子彈>>口碑載道，顯伸出第二集<<消失的兇手>>，風格依然暗黑，半幽默式的敍事手法，文戲動作戲兼備，不過電影原本的神髓卻消失了，尤記得上集佈局及電影調子卻係好精密及巧妙，毫無冷場係因為劇本編排得好，電影節奏明快且演員演出高水準，又有好多動作場面，娛樂性十足，不過去到續集一定差過第一集既宿命又應驗，第二集水準急降，劇情較鬆散，連貫性欠奉，由本來既懸疑片變成愛情片，且似係劉青雲獨腳戲，佢自己一個充撐全片，全因演員間欠缺火花，最終睇完失望而回。

全片好似全線係講劉青雲同江一燕既愛情線，查案次要，兩條線更係亂，欠缺高潮位，睇到我地都好混亂。

劉青雲以外的唯一香港演員林家棟，其實演得不俗，演一個陰沉且熱血既兇手，但始終佢跟身邊的演員欠缺火花，似係一個人的奸角，顯得呢個奸角冇料到，係今集既敗筆。

故事講述江一燕演的監犯逃脫成功，逃到香城，於是劉青雲便前來搵線索搵佢，同時更牽涉一單連環自殺案，順便查埋，原來背後卻係牽涉一大班被苛刻既工人，呢班工人更得到學生們既支持及舉行運動，咁多單自殺案同班學生及工人有關，於是劉青雲又用佢自己屈機既智慧去查出真相。

其實合拍片最唔好處係一來演員又唔識多個，二來一定要配音以致口形唔夾，成件事即刻冇Feel，上集成功之處係因為有劉青雲搭謝霆鋒，既親切又增加投入度，今集將謝霆鋒換上林家棟，叫座力當然立即大減，雖然林家棟演得不俗，不過今集演員之間的互動性欠奉，對白又太長，要觀眾好集中精神去睇每一個細節，會好攰，而且動作場面極少，娛樂性都減少了，劇情又鬆散，一時查案一時談情再返去查案，好亂，冇晒上集精炒既佈局，使今集變成沉悶既偵探片吧。

整體而言，今集只是劉青雲獨撐全片，相信如果唔係劉青雲都一定唔會睇呢集，演員卡士弱，劇力稍遜，係後尾火車之戰較有睇頭，而且案件既不複雜又冇追看性，最後更變成愛情片，咁亂既一集真係叫人失望呀。

消失的兇手 The Vanished Murderer

監製：爾冬陞

導演：羅志良

演員：劉青雲、林家棟、江一燕、李小璐

片長：121分鐘

級別：IIA

評分：5.5/10

＜＜迷城＞＞：林嶺東的自我迷失

對於這部林嶺東久休復出之作我本身係充滿期望既，林導演作品一向都以火爆見稱，今次見到題材係林導演拍開個範，諗住差極有個譜，點知上映後劣評就越黎越多，大多都話離晒譜之餘又離晒題，搞咁多野唔知做乜，係林嶺東的自我迷失，的確係，我睇完，都令到我地覺得林導演唔知自己拍緊咩，所謂的迷城有幾迷，為咩迷？佢自己都唔清楚。

又係古天樂，由於佢太多電影，角色上大致類同，今次佢做一個好有規矩既警察，最後卻被金錢迷失，忘了自我，但欠缺伏線，話變就變但又唔覺前後角色上的性格變化，令到佢唔知自己做乜咁。

電影以男性作主導，余文樂演一個性格衝勁重情義的弟弟，演出算是落力，但張孝全演的大賊出事了，外型唔似，又唔夠兇狠，做賊又冇乜目的唔知做乜先最弊，呢個係林導演的問題吧。

故事主要圍繞佟麗婭的支線，包括於酒吧邂逅了古天樂及余文樂，然後其實係跟張孝全演的賊匪有關係，更有被殺的危機，原來咁多個人串連幾黎都係因為一個箱，入面可能牽涉龐大巨款，呢筆巨款卻被各界人士去爭，包括最後被牽涉其中的古天樂及余文樂，最後每個人都只為左個箱走黎走去，唔知為乜咁，原來講既係公義。

原來呢套戲想講既野就係公義，最後一幕張孝全一槍射爆立法會的天秤，代表了呢個世界根本不存在任何公平的事，沒有一件事能用天秤去衡量件事邊個岩邊個錯，亦都對呢個世界顯得好灰，太多不公義的事存在於世上。不過睇晒成套戲只有頭同尾極少部份講關於公義，中間部份只係見到飛車，演員跑黎跑去，為左個箱搞場大龍鳳咁，真正的雷聲大雨點小，想唔到林導演今次都失去方向，冇晒以往火爆風格既一面，最期待的林氏風格電影都係睇唔到。

演員方面，各演員因為劇本不濟既關係發揮有限，整體演出不算太好，古天樂又係做警察，沒甚驚喜；余文樂算係演出落力，又跑又飛車表情多多，算係眾人演出最好的一個；張孝全外型都係太靚仔，完全冇大賊氣魄及氣勢，又唔奸又唔似賊，演技上都較木納；貫穿全片的唯一主要女角佟麗婭卻係一個花瓶，沒戲可演，跑黎跑去行行企企而言，選角不宜，兰鉇演員只屬過鏡，難以論好唔好呢。

整體而言，林嶺東導演係繼<<奇逢敵手>>後又一失手之作，完全欠缺林氏獨特火爆電影風格，卻拍出一部唔知做乜亦都相信連導演都唔知自己拍乜既電影出黎，相信觀眾們只會睇唔到火爆而係睇到眼火爆吧！

迷城 Wild City

監製：劉晶、陳煒、周其良

導演：林嶺東

演員：古天樂、余文樂、張孝全、佟麗婭、任達華、謝天華、李燦琛、高捷

片長：100分鐘

級別：IIB

評分：5.5/10

＜＜最後判決＞＞：欠缺高潮位的平凡法庭戲

一見到<<暗色天堂>>的題材，就即刻諗起呢套俾人遺忘的港產片<<最後判決>>，由拍慣寫實及社會性題材既趙崇基執導，故事係講述劉青雲演的滿口宗教規矩既神父，認為做神父不能與女性發生性關係，由於一次的邂逅遇上了滿身騷味的黃佩霞，終被色誇成犯下罪孽發生了關係，黃由於不服劉之後對他冷淡，於是屈佢強姦，然後劉找黑道好友曾志偉幫忙，並聘請大狀李若彤去打官司，結果官司敗訴，各方面都冇得到任何利益。

黃佩霞係有獨有既騷味，幾搶鏡，由於角色上只要性感便行，不用理會佢既演技如何，至於劉青雲演出水準之內，將規矩既神父演得踏實，但沒甚搶鏡位。

曾志偉演的黑幫大佬演得有霸氣十足，沒甚難度，同時李若彤都演得好，演一個以錢為先的出色大狀，既高傲又善良，兩者平衡得宜。

故事略嫌過於平淡，不過睇開趙崇基作品的人都會覺得唔出奇，佢既作品多於偏向真實多點，不造作，講得唔好聽就係冇娛樂性，不過呢個風格黎既，佢既戲批判性較強，所以睇完都會有所反思。神父犯禁於香港電影題材的確好少見，亦都好避忌，不過當年九十年代電影題材的確係比而家更廣範，導演拍呢套戲的確好有勇氣。

演員方面，各演員都做得好好，水準之內，各個實力派演員都具壓場感：演得沉實既神父劉青雲、演得霸氣十足的黑幫老大曾志偉、演得高傲自大既大狀李若彤及演得豪邁既騷婦黃佩霞，選角得宜之下掩蓋了欠缺高潮位及娛樂性的平凡法庭戲。

最後判決 Final Justice
監製：杜琪峰
導演：趙崇基
演員：劉青雲、曾志偉、李若彤、黃佩霞
片長：105分鐘
級別：IIB
評分：6/10