＜＜哪一天我們會飛＞＞：三位新演員演出可人 香港情懷滿瀉

黃修平繼<<狂舞派>>後再執導的一部純香港本地電影，今次拍既係年少時及成人後的情懷，更道出一個簡單既人生哲理都足以拍得出一部有口碑自然的港產片，主要係佢既拍法好接近台灣校園青春片，比較貼地，演員都演得好自然，而且當中既情節能讓人有反思作用，今次的作品比之前的更見進步。

電影大篇幅較多既係講年少時既校園生活，戲中飛機的意義及人性刻劃都係用年少時代去交代，一班年青演員都演得好，可能呢類戲其實毋須演技，只要演回自己就可以，所以彈出左蘇麗珊及游學修吧。

今次由楊千嬅及林海峰任主角，兩人都演得好，成熟兼沉實，戲中利用製作飛機去道出人與人之間以及夫婦之間的人生哲理，係值得反思的一環。

電影一開始出現楊千嬅及林海峰的一對夫婦很淡淡然地生活，不久楊發現林出面有外遇，卻過著一個沉重及哀愁既生活，係離婚與復合之間，兩人懷緬過去校園時的一點一滴，有愛情、友情，更不時記起兩人與另一已死去的死黨去為飛機學會所做的事情，每一件都有血有肉，畢生難忘，從而修補了兩人之間永不磨滅既傷痕。

電影好明顯用上台灣校園青春片手法去拍香港校園青春片，效果理想，不太賣弄情感及造作，更用上香港電影題材比較少接觸既飛機去做一個元素，從而帶出人生哲理，係好語重水月女火長。其實男人有外遇真係好容易，只係自己能唔能夠把持住個一刻先係重點，夫婦間問題時常都有，最主要係缺乏溝通，不是話所有事都要攤晒出黎講，而係要用時間去談吐及分享，從而減低一切不必要既誤會，要知道人與人之間最複雜既係感情，可以感情用事，亦可以去用唔知真定假既感情去解決件事，只有自己先知道咩感情先係最真，若果人與人之間根本已經不存在感情，所以事情都只係枉然，白做。

若果對另一半的感情開始減退，其實已經證明左你唔再愛佢？不是，可能係已經大家熟絡左，變成一種習慣，見到面唔使多講，心照便行；又或者可能真係冇晒感情，因為外界誘惑太多，永遠唔會有最好，只有更好，做人只要知足，兩人之間既感情根本好易維持到，只係人係貪心，每一刻都需要比昨日更好的待遇及態度，所以先產生好多問題，呢個人生哲理係呢部戲可以話俾我地聽，人與人之間既感情之所以能夠產生，係因為有回憶，有一堆好難忘好有血有淚既經歷，而呢一D既經歷能令人回心微笑及作出一D反省，從而亦係維繫感情既一道重要橋樑，要與另一半有呢類經歷係唔容易，要好好珍惜，先得到安穩既生活，亦係人與人之間既生活之道。

楊千嬅演出越見成熟及自然，今次多場戲更少了化妝，更加貼近現實的演出，確係值得一讚。

演員方面，楊千嬅演出越見穩重及自然，少了以往浮誇及零演技既情況，可能人生歷練多了，演出多元化左，得到幫助吧。男主角林海峰比較少電影作品，但表現都不俗，收起了平時的搞笑面孔，換上一個成熟而踏實的張臉，發覺林海峰都可以好正經地演戲。年青演員們都做得好好，蘇麗珊、游學修及吳肇軒都好搶鏡，演得自然，相信係將來電影新星。

整體而言，黃修平確係近年比較成功既新晉導演之一，主要拍既題材貼近香港，使香港觀眾於近年反合拍片情況下容易接受，而且佢拍既電影不離熱血及香港情懷，呢份感覺已經係近年香港電影比較少見，眼見香港電影於題材上越見新鮮及開始大膽創新，呢件事對於我呢類香港影迷係值得開心既一件事。

P.S.: 同樣地，一部電影有好的主題曲係真係可以幫到電影加分，情感上亦都增強不少，黃淑蔓主唱的<<差一點我們會飛>>好聽，全因有一把未聽過而且覺得好純好真的聲音，選角難，選主唱者更難，今次兩者都做對了！

哪一天我們會飛 (She Remembers, He Forgets)
監製：陳心遙、泰迪羅賓
導演：黃修平
演員：楊千嬅、林海峰、蘇麗珊、游學修、吳肇軒
級別：I
片長：108分鐘
評分：7.5/10

＜＜我的少女時代＞＞：夠動容夠真挈 冇得輸

當<<那些年>>既成功，已經對台灣青春片再不能低估，點知事隔幾年後再黎呢套<<我的少女時代>>，呢套再一次令香港人鍾愛既校園青春片，都算係爆一個小冷，本來我都唔抱好大期望，不過睇完之後都會明白其實一部電影雖知道成功係得來不易，當中一定有個位先會令呢部戲成功，而我睇完之後我會諗到呢個成功係因為大家都有同樣既經歷及幻想，電影卻好自然地擊中當中的共鳴及情懷。

王大陸及宋芸樺固之然唔算係靚仔靚女，卻有一個好典型既配搭：壞孩子及傻大姐。劇情當然好自然的壞的變好，傻的變索，最後係埋一齊，典型既愛情故事就係好簡單咁進入觀眾的心霏，於是產生共鳴，呢個係電影一大成功之處。

少女電影不一定只有女孩子才有共鳴，男孩子有的共鳴是同樣地都有愛慕及各種情懷，只要代入個角色去幻想，自然地投入到呢個電影世界。

電影以宋芸樺為女主角的林真心本身係一個傻大姐，外表傻氣不漂亮但很天真純樸，崇拜偶像劉德華，一日偶遇學校壞孩子王大陸，王大陸被傻氣的宋芸樺吸引住，宋芸樺原本痴戀校園最靚仔最有才華個個，點知跟王大陸相處後其性格被吸引，因而產生了愛情，可惜中途出現另一個校園校花，戀上王大陸，及後王大陸要去美國留學斷然離開各種關係，到各人成長後，宋得知王為左佢而舉辦一場劉德華演唱會，深表感動。

電影女主角對偶像既愛慕程度卻係眾人既寫照，不誇張但好貼地，更得到另一半同樣既瘋癲，係眾人渴求既理想事實。

劉德華係電影出品人，亦係電影中的靈魂人物，客串一鏡都無可厚非，但佢獨具慧眼，投資一部可以令觀眾喜愛及有口碑既電影，我真的不得不佩服佢既眼光。

呢齣真係一套好典型既校園愛情片，所有劇情都好順理成章咁發生，觀眾亦都好輕易咁估到，雖則係咁，但個份情懷卻係每一 個人心裡面都永不磨滅，當中既學校裡對有才華又靚仔既傾慕、外表不揚既女仔一定係愛情輸蝕但又學業成績好、女主角一定有幾個差唔多性格而又唔靚既老死、一定有個壞孩子男主角而最後因為被女主角既純而感化變成好人、女主角永遠都會唔要靚仔鍾意一個被人詬病被人睇死既衰仔、最後結局一定係未能團圓而繼續心裡面繼續愛等等，呢D情節係現實生活中係非常貼地，而且台灣片大多都能拍得輕鬆舒服，以致觀眾接受程度更易，所以呢類片好難唔好睇，內容夠動容夠真挈，輕易打動觀眾的心，當年<<那些年>>都係因為咁而大勝。

演員方面，宋芸樺演活了一個充滿傻氣的女仔，由前段的外貌不揚到後段的美麗動人，對比之大更能顯出宋芸樺利用了外表更加令個角色更立體，演出自然及配合，令到我被佢既演出吸引住，比陳妍希有過之而無不及；至於王大陸，本身不算靚仔，做壞孩子卻入型入格，雖然唔算型仔，但演出恰如其分，沒有造作沒有狂Chok已經抵讚，其他演員都整體演得好好，夠自然。

整體而言，呢類台灣校園愛情片真係冇得輸，首先香港觀眾都普遍喜愛台灣的事物，台灣的事物大多都予人有舒服自然既感覺，所以台灣人拍的電影都有呢種感覺，不造作，故事拍得有條理及貼近生活化，以致容易令觀眾得到共鳴，而台灣演員都會演得自然，更貼地，加上台灣景同人又靚，香港電影係好難有個種感覺，希望香港多多學習人地既製作及感覺吧。

P.S.:當然Hebe主唱的主題曲<<小幸運>>幫助不少，好好聽，好配合電影情節！

我的少女時代 (Our Times)
監製：葉如芬
導演：陳玉珊
演員：宋芸樺、王大陸、李玉璽、簡廷芮、陳喬恩、言承旭、劉德華
級別：IIA
片長：131分鐘
評分：8/10

＜＜末日先鋒：戰甲飛車＞＞：嶄新風格 攝影強勁 畫面亮麗

本身冇乜大興趣睇呢套電影，奈何見到先前金球獎及奧斯卡有好多提名及拎左好多技術獎後，真心想知佢有幾巴閉，咁岩今次係飛機上有呢套戲睇，二話不說就揀黎睇下，睇完之後終於明白點解可以拎咁多獎，不論係美術、攝影及整體演出都好出色，風格嶄新及色調強烈，呢部戲真心覺得堅勁。

電影大部份時間都以人車之戰作賣點，卻拍得極之緊湊及一氣呵成，拍攝難度可見很高，全靠整體演員演出及合作性，係一次見證拍攝新技巧及大師之作。

電影中的壞蛋多以型爆出場方法，呢個單槓埋身搏擊好新穎及型爆，搶鏡度十足。

電影一開始就提出有班人誓要逃出強權管治，於是受到強權人士的威迫及推進，用戰鬥去反抗呢班熱血人士，男主角湯哈迪本來想獨自生活離開呢個管治之下，點知捲入另一件事，就係偷走了首領的寶物，最後卻沒辦法之下與反強權人士結盟，引發一場革命。

講真，故事其實好薄弱，電影賣點只係戰鬥過程，動作場面拍得緊湊及一氣呵成，全賴一眾演員整體出色既演出，以及電影拍攝嶄新風格，以致畫面上豐富不少，以快速CloseUp及Zoom In Zoom Out既鏡頭，FastCut既剪接技巧，使電影凝成強烈既型爆風格，雖則場景極之單薄，單單只係沙漠及沙石背景，但不停的爆破及飛車場面卻彌補到一切空洞的事情，尤其演員的落力程度及化妝，令呢部電影欣賞的地方卻不少，比起同類的動作片更有值得欣賞價值，呢個就係令呢部戲贏獎既地方。

查理絲泰朗化身型格中性戰士，與一眾分唔清邊個打邊個既同黨殺敵，化妝之功力好細緻及出色，尤其係身上的花紋，睇得出好用心去做呢件事。

湯哈迪近年大勇，登上電影主角連連，呢部都係主要角色，雖然戲份不算搶眼，但外型及搶眼度搭夠，係未來電影的重要一員。

所以，一部電影既成功，係現今社會上已經唔係特技片橫行，而係觀眾已經懂得睇，懂得睇部電影究竟有冇用心去拍，有冇去突破以往常規電影的框框，今次的成功全因好多技術層面都令到觀眾都覺得好新鮮同埋強勁，只要電影人肯去用心拍一部電影，不依靠爛爆的特技及卡士，拍得好拍得新鮮拍得有誠意先係皇道。

末日先鋒：戰甲飛車 Mad Max: Fury Road
導演：佐治米勒
演員：湯哈迪、查理絲泰朗
級別：IIB
片長：121分鐘
評分：8.5/10

＜＜樹大招風＞＞：有文有路的非一般警匪片 保留杜氏風格

近年真係多左好多新導演執導電影，呢次更加係由三個新導演去拍，並由杜琪峰及游乃海做後盾，呢個真係難得既機會睇到呢三位新導演係強勁前輩之下可以有咩新野出到黎，題材已經夠新穎，用賊王做主角，但反而係用沉實貼地既手法去講呢三位賊王犯案背後人性的一面，敍事有文有路，文戲需多但沒有冷場，係杜琪峰監製之下仍然保留他一貫既暗黑風格，甚至係銀河映像電影格局，劇情更貼香港，係近年一部最香港的港產片。

任賢齊演技日漸成熟，外表陰沉做到賊王的奸險形象，而且神態亦都有大佬風範，三個賊王演得最好。

林家棟演的賊王係較為小心謹慎，佢亦都比過去作品演得好，不再木口木面，有種對兄弟及小朋友既真挈情感顯露出來，但又不失賊王霸氣，演得不俗。

反觀陳小春演的賊王相對浮誇，服裝造型上亦較鮮艷而顯出佢富貴大口氣性格，可能係角色所需，但流於表面，並冇賊王既本色，當然近年已經比較少睇佢演出，呢次佢都演得不錯，比以往已經成熟好多。

三大賊王葉國歡、季炳雄及卓子強各人戰跡輝煌，警方明知佢地係大賊卻因證據不足而冇佢地符，令人聞風喪膽，隨著就黎97回歸，三大賊王想做返一件大事，由卓子強策劃，一手聯合三大賊王再犯案，實行回歸前作最後一戰。

可惜既係結局係Bad Ending，最後三大賊王並冇合作，只安排佢地於一間酒樓作為唯一一次碰面，而那時係並未相識，呢個安排算係新穎亦都感到可惜，新穎係結局令一貫警匪片格局有一個突破點，不再是槍林彈雨作結，而是用文戲及畫面去交代，係比較另類，而交代得不突兀；可惜的是，我就真係想睇佢地三個最後真係聯合再去犯案，睇下有幾大排場及震撼，不過當然，咁樣就會去返一貫港產警匪片了。

電影情節方面也趨向文戲居多，槍戰很少，雖則係咁，都冇悶場，而且多得三大賊王演得好，三人都演得好沉實，表現出賊王背後一絲絲的遺憾及失落。任賢齊越演越好，或許是多得演得多杜Sir作品，令佢既演出更穩陣及更內歛，不論是眼神及形態都交足功課，今次佢演的葉國歡眼神相當兇狠及陰沉，但卻帶點無助，當佢身邊無晒手足既時候相當失落，於演出上係三人最好；林家棟演的季炳雄亦都不俗，亦都演得沉實，表情不再木口木面，面對兄弟時兩難局面卻表現進退失據，面對兄弟女兒卻帶回天真快樂的表現，演出有層次；反觀陳小春演的卓子強卻浮誇得很，用鮮艷既外型去突出角色性格的浮誇，用大聲講野語氣去突顯角色的豪邁，不過礙於演出過於表面而欠缺內心演繹，使三人演出上欠缺深度，不過角色係最鮮明的一個。

導演安排三位賊王於結尾相遇，亦係片中唯一一場三位同場出現既情景，呢種手法好少見但又好突兀，要硬夾佢地原來晨咁早已經見過面但最終事與願違，呢個Concept係好亦都帶有遺憾，如果俾我揀都想佢地三個一齊再犯案，總好過而家兩頭唔到岸。

在港產警匪片角色中，呢套戲既格局係好少見，不過槍戰場面亦都保留了杜Sir電影風格，有型到爆，而且有杜琪峰及游乃海做後盾，呢套戲既質素已經會有保證，三個新導演各有風格，敍事方面都好順暢及有板有眼，期望日後有更多一反傳統電影風格既港產片睇到。

樹大招風 Trivisa
監製：杜琪峰、游乃海
導演：許學文、歐文傑、黃偉傑
演員：任賢齊、林家棟、陳小春、林雪、姜皓文、歐錦棠
片長：97分鐘
級別：IIB
評分：7/10