＜＜愛麗絲夢遊仙境：穿越魔鏡＞＞：又一套特技主宰一切的電影

未睇過第一集的我認為睇第二集係冇乜問題，因為呢類電影多數都唔會有任何關連既，其實本身都冇咩興趣睇，因為今集並唔係添布頓執導，只任監製，只係覺得作為添布頓及尊尼狄普粉絲，姑且睇住第二集睇下咩料先，其實都唔係咁難睇，俾小朋友睇？又唔算係，俾我地大人睇？又覺得好似太童話咁，縱觀今集，其實算係唔錯的。

尊尼狄普近年魅力大減，以致電影表現下滑，始終都係要靠呢類古靈精怪既角色去活現返尊尼的演出，今次都係好彩有佢做主線，令電影生色不少。

尊尼前妻海倫娜演的奸角既可愛又陰險，大頭造型性格突出，係略嫌結局太童話化，未夠去得太盡而覺得奸角並冇想像中奸。

承接上集，愛麗絲重回倫敦，卻無意間發現有一塊可以穿越時空既鏡子，意圖穿越佢再次返回仙境，更得知瘋帽行為失常，為左令到瘋帽變回正常及搵箇中原因，便去半人半機械人的時間借個魔法球回到過去，但再次得到紅皇后既阻撓，令到愛麗絲同時兼顧兩方面的事宜，身陷險境。

皆因我冇睇第一集，我當佢重新去睇一個系列的電影，電影充滿了童話色彩，好童話故事書的故事背景及佈置，人物性格極之浮誇，又有多場好驚險既情節，如果喜歡鍾意童話故事既朋友一定收貨，故事夠簡單直接，又有特技去表現不可能的畫面，電影內容非常豐富。奈何我本人睇慣晒特技電影，再不覺得特技係一件好勁好睇既事，我而家反而著重劇本多過畫面，今次仍然係特技主宰一切，沒有特技，根本冇可能拍得到，冇可能做到一D以為童話故事先會發生既事，相信沒有特技，電影一定好悶，因為畫面一定沒甚睇頭。劇情平鋪直敍，沒有高潮位，只有特技帶動的驚險鏡頭，彌補了劇本上的沉悶，因為好多事我地都預計得到。

女主角愛麗絲並不美麗又不可愛，總覺得選角係今次敗筆，演技又欠奉，以致電影拖低不少分數。

全片依靠特技去塑造多場不可能的畫面，質素不俗，不過看多始終會膩，觀眾分得到特技同現實既配合的真與假，今次有幾個場口並未做得融合程度，使畫面顯得有點假。

電影特技有欣賞地方，令電影更豐富店，演員方面都下了不少功夫。主角愛麗絲反而係演得稍遜的一位，外貌已經唔算漂亮，唔算可愛，加上演技欠奉，只失去愛麗絲於童話故事中的重要位置，只淪為一個普通女子在電影中出現。尊尼狄普第N次化身古靈精怪角色，駕輕就熟，只有尊尼才能駕馭到呢類角色，才演活箇中的人物性格，令到佢近不濟的表現重新起步；奸角的紅皇后海倫娜本身角色好突出，大頭外型已好搶，而演出亦都水準之內，只係略嫌結局太童話化，未奸到盡，使我覺得其實佢都唔算奸姐，其他如安妮夏菲維及波叔戲份不多，演出合格。

既然係童話故事格局，我不應俾太大期望去睇件事，睇完我覺得拍得唔差，而且應具備既元素都有齊，正因為太順理成章，只能穩陣地過，但冇一個位覺得呢套戲好睇，係因為冇一樣野去突破件事，不論係拍攝手法或劇情轉折都未算係好出色，唔錯只係基本，去突破個框框先係首要，如果唔係之後再拍類似既題材既電影只會換成新瓶舊酒吧。

愛麗絲夢遊仙境：穿越魔鏡 (Alice Through The Looking Glass)
導演：占士保賓
演員：蜜雅瓦斯科斯瓦、尊尼狄普、海倫娜寶咸卡特、安妮夏菲維、沙格畢朗高漢
級別：I
片長：113分鐘
評分：7/10

＜＜非常盜2＞＞：兒戲劇本及魔術 只顧報仇欠驚喜 被騙既係觀眾

荷李活電影中要續集比第一集出色係超級難，接近90%的續集一定差過首集，而且接近爛到爆，近年要數續集比首集出色只能夠數到<<黑夜之神>>，魔戒系列，至於呢套<<非常盜>>，第一次確係好出色，將魔術玩到出神入化，睇到目定口呆，黎到第二集，只能夠用爛去形容係最貼切的。

一眾演員演出沒有靈魂，個性不明顯，只係見一到呢班人走黎走去，你追我逐，冇明確既目的，係電影其中一個敗筆之處。

最有睇頭要數電影中段的玩啤牌偷取資料情節，犯駁位勁多，班警衛全是廢柴同埋盲既，情節上不太合理，畫面上都加不到好多分，牽強程度達致頂點，如果話呢部份已經最好睇，可想而知其他部份幾難睇。

電影承上集結尾部份，四騎士智取FBI後消失於世上，使幕後其中一個集團老闆被判入獄，老集團要員眼見不甘被擊敗於是報仇，令四騎士再現江湖，更令佢地成為通緝犯，四騎士於是用自己既方法，誓要揪出終極幕後黑手。

劇情可以話係極之薄弱，四騎士明明好聰明，但都要被幕後黑手陷害及操縱；四騎士明明係第一集玩人玩到好通透，但黎到第二集好似小朋友咁玩D低能魔術，所有野都要靠人，成班人都好似小學雞咁；幕後黑手明明好似好勁，睇穿好多野，黎到結局竟然被呢個兒戲玩意玩返轉頭，睇完呢套戲真心覺得我地係被導演玩多D囉。

片中魔術極之唔合理，嚴格黎講唔係魔術，而係欺騙觀眾雙眼的把戲，小兒科既技倆去拉賊恥笑一下，大陣象去欺騙壞蛋慨嘆一聲：下？唔係咁都得呀嘛！導演真當我地小朋友啊！

電影硬插華人演員，周杰倫沒戲可演，只係懶型耍幾個流到爆既魔術，劇情方面更係雜亂無章，去到澳門完全係另外一件事，浪費時間，沒推進劇情的情況下只淪為拖延時間。

前半部當佢合格，正正常常玩幾個魔術過關，係偷取資料個Part雖然犯駁處處，但都見到至少有諗過點鋪排同埋係觀眾期望睇既玩意，要比第一集更好玩更過癮既玩意，點知黎到澳門後真係越黎越離譜，成件事係錯晒，莫講話魔術，就連本身玩魔術既四騎士就好似唔識玩魔術咁變成一個行屍走肉既普通人，完全失去電影首集既應有既神髓，觀眾只覺得係拖延時間，根本冇幫助電影情節發生，我地熟悉澳門既朋友更見憤怒既係，有好幾場好明顯係廠景，卻被塑造出係西方人眼中的東方場景，硬加一D不知名霓虹光管，加上假爆舊式酒樓及街市，明眼人一睇就知失實，睇到眼火爆。

最緊要係我地想睇既魔術真係九流，結局極之兒戲，滿以為有好誇張好華麗既龐大魔術，未知係咪使到冇晒錢，最後咁既掩眼法咁都過到骨？過到幕後黑手都過唔到我地觀眾個腦啦！演員方面，基本上冇一個交足戲，老戲骨如米高堅或摩根費曼都做得一般，太多人太多散亂劇情，根本唔能夠令演員交足戲，相信連佢地都唔知自己拍緊乜，所以故事爛既程度真係真冇眼睇！

荷李活最唔好既地方就係唔識見好就收，係都要整臭個名為止，第一集口碑載道係因為感覺新鮮及魔術令情節更豐富及意想不到，個種千變萬化的技倆係令到我地睇到嘩嘩聲，第二集好顯係要顧及大陸市場，硬加周杰倫根本幫唔到電影本身，現今電影仍然好多都睇錢份上，拍出一大堆只迎合大陸市場的爛片，或者於電影投資者眼中，仍然覺得大陸市場係賺錢來源，將佢放第一，而拍到冇野可以再拍既電影本身質素放最後，電影往往都敗在一班不懂電影的投資者身上。

非常盜2 (Now You See Me 2)
導演：朱浩偉
演員：謝西艾辛堡、麥克雷法路、活地夏里遜、麗茲卡潘、戴夫法蘭高、丹尼爾域基夫、摩根費曼、米高堅、周杰倫
級別：IIA
片長：130分鐘
評分：5/10

＜＜勇敢傳說之幻險森林＞＞：劇情沉悶欠鋪排 難以投入失敗之作

滿以為呢套動畫會係一貫好緊張，不斷有動作場面既歷險故事，誰不知大失所望，對白之多令觀眾覺得納悶，講一大堆道理原來只係圍繞住一個簡單道理：有能者居之。像花木蘭般有好強既戰鬥力，但卻被迫埋沒，呢個道理更係套動畫度不斷重複，欠缺觀眾想睇的驚險情節，動畫回響不大正確，但得到奧斯卡最佳動畫真係爆左個小冷，我本人覺得呢齣動畫係失敗的。

皇后唔想女兒做戰士，要係皇宮做靚靚公主，但本身戰鬥格既公主偏偏要用行動去證明自己，呢個就好以花木蘭咁講一個道理：女兒身也可匹敵，不可存在歧視，戰鬥係一視同仁的。

母親變成熊，從而更加了解女兒所想，彼此的感情更進一步，現實中每對母女都要咁先溝通得好了解更多，係現實既反射。

皇宮內，有個女兒好想成為一個弓箭手，可惜被皇后極力反對，女兒無意間得到一個魔咒，令到令其煩厭的母親變成一隻熊，女兒後悔之下誓要保護隻熊，從而令母親了解到女兒所想，誓要成為一個出色的弓箭手。

故事其實編得不俗，但拍得好沉悶，對白好多，動作場面好少，大多時間都講女兒如何歷盡艱辛去令母親覺得佢想成為一個出色既弓箭手，但略欠篇幅講實戰經驗，令到動畫欠缺高潮位，冇緊張刺激既畫面，只有一大堆要人思考既對白，加上長期都係黑夜時分，畫面咁黑，觀眾想唔訓著都幾難。

女兒所謂想成為出色既弓箭手，但篇幅卻少講點成為世人認同既弓箭手，少了動作場面，說服力減弱，係觀眾預期太多？還是製作人根本想做一部另類動畫？

我明白唔係每一套動畫都需要動作場面，驚險鏡頭，但呢套失敗位係欠鋪排欠高潮位，使觀眾難以投入動畫世界內，加上故事背景模糊而且畫功一般，動畫迴響不大理所當然。配音方面都救不了全片，陳慧琳已經做足本分，只係皆因動畫冇劇情轉折及高潮，使配音都平平無奇，以致成為一套沉悶非常既動畫吧。

勇敢傳說之幻險森林 (Brave)

導演：馬克・安德魯斯 Mark Andrews、布蘭達・查普曼 Chapman Brenda

聲演：陳慧琳

級別：IIA

片長：94分鐘

評分：5.5/10