＜＜金田一手稿之奇異檔案＞＞：最奇異係借金田一之名胡混地查案

90年代既港產片其實種類有好多，但涉嫌抄襲或者用人地既題材及內容變成港產片既題材都有好多，呢套電影既產生係因為當年日本漫畫金田一好受歡迎，變成真人版後更加風靡全港，於是呢套電影就有理冇理用人地既角色去大造文章，因為版權問題，卻只能用上人地個名去做片名，內容完全跟金田一毫無關係，呢種混水摸魚既電影90年代多的是，水準當然係去到極低點吧。

電影有提過主要圍繞許志安演的偵探和梁漢文演的探長一個大鬥法，可惜只係表面，沒有任何鬥智鬥力，三言兩語就揭曉答案，兒戲到爆，完全冇查案個種懸疑感。

有金田一就有阿雪，不過就由黎瑞恩飾演，真係完全錯晒，將阿雪既氣質完全掩沒，不過佢係呢套戲係花瓶，冇戲可演。

電影以三個殺人事件湊成的，故事內容唔講，其實係冇咩好講，嚴格黎講都唔算係查案，只係見到許志安演的偵探好求其好順理成章咁諗到又搵到線索就可以破案，冇鋪排冇伏線，佢話係就係咁，而且頭兩個故事都發生係深圳，代入感又減低左，好地地一套港產片點解無拿拿上大陸拍？

電影分三個故事去講係90年代中都出現不少，我冇預期三個故事會有關連，但睇完呢三個故事都唔知佢做乜又過目即忘就大件事，偵探片最基本元素係要讓觀眾一齊去代入角色一齊查案，從中搵出真兇，可惜電影每一個故事只有20-30分鐘，係冇時間交代好多野，所以呢種電影格局根本不適用於偵探片，係一大敗筆之處。三個導演拍出黎既質素都係同樣地糟糕，沒有戲劇性的故事，沒有特別的攝影角度或有誠意的美術，更加沒有一點的懸疑感及驚慄情節，平鋪直敍，有粗製濫造之感，作為一部以偵探片掛飾既電影絕對不能收貨的。

演員方面，卡士不強之下都見到演技欠奉既情況，同樣是歌手身份出身既許志安、梁漢文及黎瑞恩鮮有大銀幕演出，真係冇乜演技可言，其實電影重點只放在許志安身上，其他實屬配角，但許志安的演出真係一般，表情木獨，冇充份發揮大偵探既特質及性格，加上劇本不濟，演出同樣不濟。其他演員只係過場居多，未能發揮演技罷了。

整體而言，呢套戲被埋沒係理所當然，其實題材幾好，可以發揮到，只係呢套戲睇得出係低成本製作，見到不論係場景，服裝或演員都係求其過骨就算，白白浪費故事本身既原創性及方向，其實呢類片拍得好既話絕對可以成為一個系列，只係電影內容及觀眾反應有如片名一樣咁奇異吧。

金田一手稿之奇異檔案 Mystery Files
監製：梁鴻華
導演：梁鴻華、黃靖華、蔣家駿
演員：許志安、梁漢文、黎瑞恩、張慧儀、黃德斌、蔡少芬
級別：IIB
片長：84分鐘
評分：4/10

＜＜霸王花＞＞：青春熱血的成龍式動作喜劇

最近有錢國偉翻拍了呢套<<霸王花>>為新片，雖則作為藍本，但以佢之前既作品黎睇，信心不大，且卡士唔吸引，故此我睇返第一集就算。其實我係未睇過呢個系列既任何一套，姑且睇睇係咪一套既好玩又打得睇得既一套動作喜劇，第一眼見到監製為成龍，咁呢套一定有好多動作場面睇，而且女角眾多，又可以睇下笑下咁，第一集的<<霸王花>>確係有佢一定既觀賞價值。

全女班演員做賣點，勝在夠青春夠熱血，睇返女演員相當後生，清澀味濃，略嫌角色性格上只有兩三個突出，其他好混淆，整體合拍度足夠。

貴為成龍監製的電影，當然少不了呢類跳高跳低既動作場面，睇到賞心悅目，係以前既動作片先覺得不落俗套。

電影故事其實好例牌，警隊要訓練一班女警察，所以塑造一班"霸王花"，經過一場訓練後，被安排去執行任務：保護珠寶，同時又要對付班珠寶大盗，霸王花及飛虎隊合力將他們繩之於法。

故事簡單直接，係觀眾比較易接受既情節，由一班白紙一張既女仔由零開始被訓練到有姿勢有實際既差婆，從中有隊員之間既衝突，意見不合，有不和有復合，跟飛虎隊一齊玩談戀愛有少許笑料，之後就排除萬難攜手破案，好典型既港式動作喜劇，易入屋，易明，所以可以唔駛用腦都可以睇到賞心悅目，而且當時成龍電影盛行，加上有靚仔靚女睇，呢套戲點會唔好睇，雖然犯駁位點都有，以戲論戲，整體都值回票價，加上睇埋當時的香港情景及演員樣貌，睇見到勾起不少回憶。

電影除左女演員為主，都有男演員去襯托，只有杜德偉比較亮眼，但眾人演出有如青春片，現今港產片已經少有。

除左動作場面有睇頭外，個人比較欣賞電影中段有眾男演員踩住Roller跳勁舞，又合拍難度又高，其專業演出值得欣賞。

演員方面，呢類戲確係唔使點演技，眾演員都可以做返自己，因為始終係青春動作片，淨係個份清澀味都已經贏晒，只係靠突出既有傻大姐既吳君如同埋好勝自大既惠英紅，其他角色性格上比較模糊，胡慧中有樣貌而且演惡死女教官，像樣兼有睇頭，外型討好，可惜戲份不多。男角戲份同樣不多，只是作為點綴作用吧。

整體而言，呢套戲係成功既，因為各種元素都具備，因此產生之後既幾部延續篇，同樣的受歡迎及收得，睇返以前既電影點解可以成功，主要係電影內容元素多，演員演出落力，大多親自上陣及以前港產片係可以拍出味道來，以致到而家都仲可以睇返後都覺得好睇，而家真係冇呢支歌仔唱咯。

霸王花 The Inspector Wears Skirts
監製：成龍
導演：錢昇瑋
演員：胡慧中、羅芙洛、惠英紅、吳君如、柏安妮、馮淬帆、杜德偉、樓南光、董驃
級別：II
片長：91分鐘
評分：7/10

＜＜國定殺戮日：全民瘋殺＞＞：沒有瘋只有殺

黎到第二集，同一個導演，故事仍然一樣，仍然係美國製訂其中一天的12小時，任由市民盡情於市內盡行一場殺戮，為該死的人得到一個懲罰。第一集之所以成功，係因為拍出個氣氛來，題材新鮮又得到過癮既心態，到第二集就由屋內困獸鬥伸延到屋外大肆破壞殺人，電影用全民瘋殺做片名，冇錯！我們係睇到班人係周圍咁殺，唔知為乜而殺，但我唔太覺得佢地係瘋，直情嫌佢地唔夠瘋，或者呢一次只係意識上的瘋，為殺而殺。

同樣地有班人會戴住面具去周圍殺人，至於為乜而殺，去到電影尾段揭曉係為左得到有錢人既快樂而已，驚慄欠奉，殺不性起。

整套電影只以5個人作掛帥，不靚仔既不靚女，沒有鬥智鬥力，只有行屍走肉，係街上行黎行去罷了，更加冇乜任何駁火，對抗性反抗，其實去到中段已經好悶。

滿以為劇情講到屋外會好多野玩，未知係咪Budget有限，去到街上沒有大肆破壞，只係見幾丁友周圍殺人，而有5個主角卻係無人的街上行屍走肉，驚慄感欠奉之餘，更有雷聲大雨點小既格局，非常失望，開頭更有個帶頭始作俑者以為佢好掂，點知只係去到尾段先出現，毫無作用。

我預期既殺戮係會瘋狂地殺人，不論咩手段咩離譜行徑，總之破壞殺人行先，而唔係變成一個死城，當然我唔係Challenge一定係要咁，但至少咁先做到呢個系列本身要有既元素，才會得到呢個系列本身既精髓，而家只係俾人覺得細路仔玩泥沙，又毫無目的，只係係度拖觀眾時間，失敗在睇時唔覺緊張，唔夠瘋狂，咁又點叫觀眾覺得呢日"國定殺戮日"有幾令人心寒有幾令人恐懼呢？

國定殺戮日：全民瘋殺 The Purge : Anarchy
導演：占士迪莫拿高 James DeMonaco
演員：法蘭格里羅、碩吉霍、姬拉珊查絲
級別：IIB
片長：103分鐘
評分：5/10

＜＜禁室殺戮＞＞：緊張得停止呼吸！

話說電影於美國上映時口碑載道，連奪美國電影票房冠軍，再一次以刀仔鋸大樹得到成績，而且電影以驚慄片掛帥，確係可以引起觀眾觀看意慾，而我一向對於低成本製作高效果成績電影情有獨鍾，呢套戲自然成為必睇既電影，而我睇完更加覺得呢套電影一定要係戲院睇先能深深感受到呢套電影既威力。

電影大部份時間於屋內發生，拍得緊湊而合理，於小小的空間拍出咁高水準既質素導演有功架，而戲中的老軍人非常聰明，令到一眾賊人抖唔到氣，緊張萬分。

電影中段有幕以夜視鏡去拍一個全黑的密室內你追我逐，有新鮮感之餘又有驚慄感，確實係做到觀眾能夠置身其中，令恐懼感倍增，投入度加強。

電影故事非常簡單，有三個賊人食過番尋味，想做完最後一單偷竊就收手，目標係一間盲的老人家既屋，闖入屋後發現該老人家好有錢，以為實食冇黐牙，豈料該老人家原來係前軍人，雖然已經盲左，但敏感度極高，每每賊人去到邊，憑著自己一套經驗及對自己屋企瞭如指掌，都可以殺對手一個措手不及，一眾賊人就要諗諗計如何逃出生天，點知發現地牢原來收埋左個女人，係老軍人的女兒的殺人兇手，眾人既要救佢救自己，與老軍人鬥智鬥力。

電影一開始就用長鏡頭由高至低去拍老軍人拖住女主角係條馬路度行，雖然已經顯示左眾賊人死剩女主角，但個氣氛已經令人緊張起來，沒有對白，沒有音樂，純粹係一片寧靜既環境裡只有環境聲音及拖住人既聲音，更拖出一條血路，已經感受到個種壓迫感，老軍人是否得到最後勝利？幸好只是俾個思考空間俾觀眾，最終答案卻係女主角得到暫時的勝利，更有可能有下集添。

整套電影多運用角色特色去製造環境氣氛及恐懼元素，好多時都沒有任何聲音，只用動作去突顯電影恐懼感，例如：當老軍人懷疑有人係屋內時，靜得只聽到賊人們的呼吸聲，用動作去避過老軍人既耳目，呢個拍法簡單而好有力地帶動觀眾既恐懼情緒，拍得緊張萬分。電影出奇地不算十分血腥暴力，只是意識上偶然比較大膽，就好似尾段老軍人捉了女主角，吊起佢之後意圖用針筒係女主角下體注射自己雪過既精子，確係非常變態，迫人同自己生仔呢個Idea係好變態，同時亦拍到我地都好同情個女主角，心諗：走啦，唔理你係咪賊，希望走到啦咁。呢個逆轉係導演的功架，呢個高潮位恰到好處，同時為呢個緊張氣氛得以緩和。

電影另一重要角色係隻狗，非常關鍵且好玩既一角，對主人非常忠心及醒目既狗，確係嚇得一眾賊人及觀眾一陣陣，而且幫到個盲佬好多，狗果然係人最忠心既朋友。

做賊當然唔岩，青少氣盛，做錯事就一定，貪得無厭最終係得到惡果，無疑好多青少年都自以為是，有勇無謀，係現今社會既一大問題。電影反映了薑還是越老越辣，任憑你幾勇幾有腦，經驗還是勝於一切，老軍人雖然盲左，但有利因素係訓練了一隻忠心的狗，狗永遠是人類最信任的朋友，速度又快又兇狠，極難對付；而且呢間係老軍人既家，對呢間屋既設計瞭如指掌，任憑你有幾跑得幾跳得，根本冇一個人比老軍人更熟悉屋內每一條通道，所以片中地牢部份，老軍人巧妙地運用地牢設計去搵年輕人，可以話係易如反掌，加上運用夜視鏡去拍，更突然黑密密空間的恐懼感，只望到主角們的瞳孔，可算係其中一幕值得一看的地方。

演員們都演得出色，當然首選係盲的老軍人，只有數句對白，只運用面部表情去表達內心既無助及失落，到了絕處逄生境界又顯得非常兇狠，難度極高且有層次，好戲。而女主角都演得不俗，外貌討好且落力演出不錫身，我都俾佢吸引到，必有前途。

整體而言，呢套戲名如劇情一樣：Don't Breathe，緊張得抖不氣來，呢鋪刀仔鋸大樹非常成功，只有四個角色，場景只有一間屋，對白只有數句，只用低成本製作就能拍出高水準既驚慄片，係高手之作，雖不能與<<恐懼鬥室>>相比，但呢套已經可以成為其中一套必睇既驚慄片，值得推介。

禁室殺戮 Don't Breathe
導演：費德亞發拉斯 Fede Alvarez
演員：珍麗菲、戴仁明奈特、丹尼爾索費圖、史提芬朗
級別：IIB
片長：88分鐘
評分：9/10

＜＜國定殺戮日＞＞：氣氛不俗 略嫌整體格局小兒科

電影與政治從來都有關連，為左滿足電影人心裡有些不滿及洩憤，會透過電影情節及題材去宣洩，而背後意思係對現實社會上其實存在有好多不公義，利用一些現實不可能存在的活動及暴力去滿足自己其實有好多人應該要得到懲罰，從中得到觀眾共鳴。呢個係咪算係創意？我覺得唔算係，呢個方向只能夠話係將來驚慄片的趨勢，與現實掛勾去做電影，的確係可以滿足觀眾無限的幻想。

電影壞角色多須戴面具去殺人，各種面具好有特色，令人難忘，亦都將會成為一個壞事分子既新標記。而奸角個樣又真係好衰，型得黎又邪樣，可惜係戲份極少，大而無當。

電影全片都主要係屋內困獸鬥，拍得氣氛不錯，不過以為佢呢類片係大片格局，出現而家呢個情況就好似成件事細好多。

故事係講美國為左降低社會犯罪率及令人民有一個洩憤既機會，每年就定左一日其中12小時為"國定殺戮日"，社會就會進入無政府狀態，市民可於呢12小時盡情去做自己想做既事，殺自己想殺既人，盡情破壞，係唔會有任何警察阻止，唔會有消防員醫生去救人，電影就一個家庭作出發點，一次意外地收留左人地既目標，而被警告於法定時間內交人，結果觸發了一次困獸鬥。

我本身以為呢類片係會有大片格局，會有一場廝殺，原來只係主要係間屋裡面你追我殺，成件事細左好多，不過細有細拍，都拍得出驚慄片本身既感覺，氣氛不俗，雖則血腥味唔夠，但都足夠滿足到觀眾想殺戮既感覺，都殺得性起。然而，呢D故事唔知點解永遠個主角都會同個故事好有關連，主角係一個保安系統主任，係對於房屋防護設備有一定研究，點知最後被拆招牌，一眾壞事分子屢破系統而大開殺戒，永遠都會自打嘴巴，係咁先好睇既。

演員方面，呢類片基本上零演技都可以做到戲，反而要留意奸角，一眾奸角形象突出，面具令人難忘亦具特色，邪惡得黎帶點玩味，相信將來會係一個奸角標記。

然而，呢類電影本身雖然有好多犯駁位，但結局算係特別，而電影背後相信係市民想有好耐既活動，確實係現實社會上有好多不公義，但又得唔到應有既理性後果，從而助長不公義越黎越多，令市民生活困苦及心有不甘，當然係冇可能滿足所有人，但面對社會上有咁多奸人當道，法律治唔到我地都想人治，先得到絕對既警戒，不過呢個橋段只能夠係電影度發生，如果現實生活中真係有呢個日子，社會只會越黎越亂，越黎越冇秩序囉。

國定殺戮日 The Purge
導演：占士迪莫拿高 James DeMonaco
演員：伊芬鶴基、琳娜赫迪
級別：IIB
片長：85分鐘
評分：7/10

＜＜愛麗絲夢遊仙境＞＞：一個字：悶爆！

自問自己都係半個添布頓粉絲，理應對呢部岩晒添布頓風格既童話故事電影好有期望及興趣，係唔知點解一睇條Trailer就覺得唔多對路，比我想像中既好期待變零興趣，主要因為角色上冇吸引人的元素，愛麗絲唔靚，畫面上偏陰暗，冇故事大綱兼好精彩既劇情，所以隔左咁多年而家先第一次睇，無他既，因為近排上左第二集，咪睇返第一集作個比較先，可惜，真的是失望而回。

畫面上的場景佈置及道具都係一貫添布頓個人風格系列，睇慣睇熟，一樣的出色，美術上當然高分，但不過偏陰，加上沉悶既劇情，兩樣加埋就變成爆全場，呢個係終極敗筆的地方。

縱使尊尼特普有幾演出可人幾咁搶鏡，更加係佢演怪人既拿手好戲，不過有差劣既劇本之下，都係救唔起全套戲，浪費一班演得好的演員。

故事講述愛麗絲意外地發現古怪既兔仔，被引到一個洞前，突然間跌落洞裡，發現洞入面係另一個世界，係個仙境。認識到一班古怪朋友後，被紅頭女皇下命令活捉愛麗絲，於是產生了一場對抗性戰鬥，誓要保護仙境。

糟透的劇情在那裡？咪就係做咁耐都唔知佢做咩囉，係入左個仙境後好似迷失方向咁，如果唔係場景佈置既幫助，我真係唔太覺得原來佢係仙境度，因為完全欠缺仙境會有既情節，預期會有既天馬行空的歷險故事，奇形怪狀既角色等等，而家呢個感覺係我會覺得似魔境多於仙境。魔境係因為不論係角色或者地方都好唔童話世界，甚至係好邪惡偏重，令觀眾好唔投入佢地既世界，又沉悶又離地，同期望既畫面有好大差距。

劇情唔吸引，唯有睇下演員有冇睇頭，我覺得首先愛麗絲一角選得差，既不可愛又不好戲，平凡得很，演技幼嫩，令愛麗絲一角毫不起眼之餘，更覺得佢係配角添；反觀配角比較搶鏡及有戲可演，尊尼特普都係要演D怪雞角色先好睇，係得佢先可以Handle到呢角色，真奇怪！故事發展都幾圍繞佢，將瘋帽貫穿整套電影或者都係添布頓既意思，要個星撐起整片都係必要，而尊尼都冇令我地失望，縱使近年佢既電影水準大幅下滑，但當佢演回古怪角色時仍有相當既吸引力。

整體而言，真係只得一個字：悶爆！近年添布頓作品大不如前，完全冇令人難忘及深思既作品，於是觀眾對佢既作品有時會卻步都無可厚非，結果呢次都係失望而回，就算美術部份依舊出色，但演員及劇情不濟既情況下，只好睇完即忘，睇一次就夠既情況出現了。

愛麗絲夢遊仙境 Alice In Wonderland
導演：添布頓
演員：蜜雅瓦斯科斯瓦、尊尼特普、安妮夏菲維、海倫娜寶咸卡特
級別：IIA
片長：108分鐘
評分：5.5/10

＜＜老笠＞＞：可以玩得更盡更癲 結局出人意表

好高興睇到再有港式Cult片出品，今次執導既係火火，本身對佢冇乜好感，不過上一套作品<<等・我愛你>>水準不俗，畫面上有佢自己風格，令到我今次對佢有點期望，加上我係Cult片粉絲，睇下今次點玩法，不過我有少少失望的，因為玩得唔夠盡唔夠癲，比起荷李活Cult片真係小巫見大巫，只係今次加左唔少香港社會命題，令成件事更貼地而唔突兀，值得一讚。

電影賣弄血腥，爆頭血花四濺，想玩港式Cult片格局，略嫌未玩得太過份，比起同類型電影同屬小兒科，但都可以合格有餘的。

故事講述廢青曾國祥入到便利店見工，卻不幸牽涉及後發生的血腥事件及接觸到不同界別的人士，突然有個前殺手阿叔馮淬帆不甘受辱，公然老笠及對店長林雪行兇，及後不斷有顧客進入令到人質增加，弄致一切奇怪事發生，然後不斷血腥事件發生，眾人諗辦法如何逃出生天。

其實劇情真係十分薄弱，劇本一去到老笠之後就失控，完全係亂黎，先由馮淬帆做主導，中段插鉸剪拆彈一幕係有創意但係好無聊，然後到姜皓文爆出既前警察怒殺差人，離奇被殺後再由林雪做主導，夾硬黎之下又變返馮淬帆，然後夾硬收尾，結局係估唔到既，但好似<<殭屍>>橋段，玩輪迴再生大講人生，講返其實之前眾人其實跟曾國祥都有關係，呢個扭橋不過不失，有驚喜但亦有犯駁位，突然間尾段講人生係好似怪怪咁，呢類戲雖則唔使講情理，但要講人生好似多左D，如果整套戲可以玩得更盡更癲，血花更加四濺，爆炸爆得更狂，唔合情理去殺殺殺，呢套戲其實可以好好玩好過癮，只係一有時間就硬插一堆人生哲理及回憶，可能呢個就係突破唔到傳統港產片固有既框框。

故事貼地都好重要，好貼近香港近年既社會命題，有店鋪因租金太貴而被迫搬遷；廢青家庭一定係雜亂，以致生活不協調；香港社會上的人積聚太多怨氣，以致民不聊生等等，呢一類命題以香港觀眾睇一定好有共鳴，再恰當地於電影情節上出現，有相映成趣的功效，呢個係現今香港電影少見的做法，做法大膽但寫實，讚！

林雪絕對係電影的靈魂人物，狂爆粗令電影喜感生色不少，而且中段做主導係一個高潮位，角色設定上都只有林雪駕馭到。

崔碧珈係電影一大亮點，原因真係好簡單，滿足晒男人睇佢既一眾慾望，中段的一Part桌上舞係無聊硬插，只係自High一環，其身材賣點已經掩蓋一切佢幼嫩既演技。

火火電影我留意到既一件事係佢好著重道具方面，每一場戲都見到好多道具都好細緻，不惜工本去製作手作道具及好Graphic既東西，同埋場景佈置好唔香港化，較Colorful，係認真製作既，好少可見到導演咁注重道具於畫面上比例上較重，而且畫面色調偏濃，形成強烈懷舊片風格，呢個係值得欣賞既地方。

演員方面，演員眾多但其實實質發揮並不多，皆因情節局限係便利店內，以致演技上難有突破，做得最好要數林雪，便利店店長完全係為佢度身訂造，流利粗口及搞鬼外型成功搶鏡；其次係馮淬帆，久未露面既佢諗佢會好搞笑，點知今次玩認真，做歷練既老殺手，係有點型，佢亦都係吸引我去睇既一位；還有一個崔碧珈，我亦都為左睇佢，睇佢有幾爆，睇佢可以有咩睇，睇佢可以有幾露肉，結果係不負眾望，露幾多睇幾多，除左演技；其他演員曾國祥、J.Arie、姜皓文、Eric Kwok都恰如其分。

整體而言，以我睇咁多年Cult片，呢套算係小兒科，其實既然係有機會去拍呢類片，就應該玩得最盡最癲先夠好玩，有血腥就勁血腥，有色情就更色情，觀眾先睇得過癮，唔使任何人生哲理，呢個係我對呢類片既一大感受。

老笠 Robbery
監製：黃柏高、陳慶嘉、鄭振邦
導演：火火
演員：曾國祥、雷琛瑜、馮淬帆、林雪、姜皓文、郭偉亮、崔碧珈、周祉加、馬志威、盧惠光
級別：III
片長：91分鐘
評分：7/10

＜＜桃姐＞＞：葉德嫻的細膩演繹掩蓋平庸的故事

通常對於關於人物電影我比較抗拒，我成日都會覺得呢類係攞獎戲，但一定會偏悶，而且劇情都會好淡薄，娛樂性不足。近來有套港產片<<幸運是我>>上映，得知外界有好多口碑，於是我就想睇返同類型電影<<桃姐>>，都有另一番體會，其實都唔算太悶，許鞍華最拿手的女人戲真係拍得好細膩，重要角色上的人物性格都描寫得好清𥇦，而且故事好貼地，係每個人都會必經既經歷，加上葉德嫻超班既演繹，呢套戲其實都幾感動。

葉德嫻無論係外型以致神態都捕捉到桃姐既神髓，將一個當少爺仔做自己兒子的那份感情演得好立體，絕對唔容易，威尼斯影后實至名歸。

葉德嫻及劉德華由八十年代做母子做到現在都看不厭，觀眾真的可以直情當左佢地係兩母子，呢個情意結好似一直係香港觀眾心裡面，今次再結合兩者，情感上已加分，畫面上更見說服力，呢個組合真係無懈可擊。

故事係真人真事改編，講述桃姐係由細到大湊大少爺仔劉德華，但劉華長大工作後冇停過，減少了時間陪伴桃姐，有一天得知桃姐中風，被安排入住老人院，劉華發覺時間越黎越少，應該擺多D時間陪住桃姐，期間更見盡老人院中的人生百態，感慨人性之短暫及桃姐既偉大。

許鞍華的女人戲得獎無數，主要係因為佢自己本身係一個歷練既女導演，佢贏在起跑線係因為佢係一個女人，自然可以將女人內心既感受、處境及經歷有更深一層既了解及體會，所以每憑做佢作品既女主角都可以獲獎，加上佢選角得宜，每一次獨具慧眼選中好演員去演活好角色，佢既功力真係唔容易。

電影道出年老時既悲哀，好多老人家最終都係會被送到老人院養活，好似係一件好可悲的事，佢地只會好似坐監咁，生活苦悶，跟外界脫節，只能跟老人院內的老人家談心、耍玩，甚至與一班無心做善事的人做場騷，最後只會死係老人院內，所有野都好被動，確係件好悲慘的事。其實在香港做人真係好辛苦，人要工作的時間又長，能夠陪到屋企人既時間又少，係好悲哀，永遠去到最後先黎去感慨去懷緬先得黎後悔，其實係冇辦法，只能夠做既係係餘下既時間用盡方法去珍惜愛的人，生老病死確係難以避免，能夠從快樂既回憶中送走愛的人，呢個先係無憾吧。

演員方面，葉德嫻無敵就唔使講，演出細緻度極高，每一個動作及神態、說話既語氣及速度真係落左唔少苦功，演技真正爐火純青，能夠演到桃姐活生生企係銀幕面前，呢種氣場真係唔係個個演員都有，好勁！令到其他演員都比下去，雖然劉德華都拎左金像獎影帝，但其實並非演得十分出色，甚至太過平淡，而且戲份不太多，評審覺得好我相信或多或少都係有葉德嫻帶動下凝成既火花，以致得到拎獎機會。

整體而言，呢套電影係葉德嫻既個人騷，劇情都很貼地，未致於悶爆全場，而且許鞍華電影一直有深度，所以具欣賞價值，然而，呢套戲也可帶出香港老年人的悲哀及社會問題，呢一環確係值得我地香港人反思既一個重要環節。

桃姐 A Simple Life

監製：李恩霖、陳佩樺、許鞍華、劉德華、于冬、宋岱

導演：許鞍華

演員：葉德嫻、劉德華、秦海璐、秦沛、王馥荔、黃秋生

級別：I

片長：118分鐘

評分：7.5/10