＜＜偷天毒犯＞＞影像強烈但劇情鬆散 小兒科的犯罪情節

故事講述兩男主角係墨西哥賣大麻賣到風生水起，吸引了墨西哥犯毒集團要求合作，點知兩男角拒絕，想過返正常生活，點知俾犯毒集團綁架他倆的知己女主角，要脅合作，他倆唯有就犯，之後就不如你敬我一尺，我敬你一丈，綁架返集團首腦個女，要求放生佢地，所以展開雙方的攻防戰。

嘩！先睇片長，成兩個幾鐘喎，心諗咪會好多野睇？唔理係槍戰、追車定Sex場面，點知片長係大部份時間都係拖長時間的情節，以上我提過既元素通通都得好短時間去交代，其餘時間口水多過茶，甚至有悶場，我心諗既毒犯犯罪片一定會槍林彈雨，殺黎殺去，有個大奸角同主角去鬥智，點知到頭來係講愛情、友情、親情，好！我唔介意，有乜理由兩個男主角可以召風喚雨，能夠班馬去對抗集團，人地話晒係集團，點知我發覺人數極少，智力幾低下，女首腦最後被綁架個女，然後又就範聽晒話死晒狗咁進行交易，令我覺得個集團好流；跟住又可以Head住尊達拉華達既聯邦探員去點佢做野，賣大麻可以賣到咁沙膽，真係奇怪。

電影最突出係呢個罪犯面具，係電影既一個標記，但發揮不到面具背後令人恐懼及高智既一面。

結尾交換人質玩幻想加真實，我諗如果就咁用幻想個個場面做結局，會震撼多D合理D，點知又要玩扭橋，結果真係睇到O咀，不禁要冷笑一下，笑佢唔係咁樣完呀嘛！

班尼史奧狄多路做開毒犯似係定左型咁，咁又真係幾入型入格既，加上佢既賤格到極點既行為，令電影較有睇頭，可惜劇本令角色發揮有限，浪費佢既演出，佢既演出係唯一亮點。

呢套戲係講毒犯，但中文片名加上偷天兩字，睇完後即刻清楚晒，偷天又可解偷天換日，同電影中的交換人質配合得到，原來電影主要講毒犯要脅人質時既犯罪，而唔係主要講毒品交易及毒品帶來既戰爭，片中既綁架情節及交易極之小兒科，好容易咁互相通信，好容易咁綁架到人質，好容易去就範，好唔緊張刺激，更用塔利班最興既斬頭，燒人既情節，但通通都一閃即過，唔覺震撼及令人心寒之處，係導演處理手法問題所致，以致對白過多，動作情節極少，而且推動唔到劇情張力，後段更見失控，鬆散及婆媽程度更甚，導演奧利華史東今次失手了。

演員方面，我覺得演得比較稱職及搶鏡的只有班尼史奧狄多路，佢演的奸角賤佬好入型入格，而且不失有型，點知最後搞笑離場，令到佢之前既出色演出毁於一旦；其他角色演出可能受制於不濟劇本，發揮所限而演出一般，戲份最多既係艾倫莊遜及碧琪麗芙莉，碧琪性感係有，靠多場慾戰去搶鏡，但演技欠奉。

整體而言，呢次係奧利華史東失手之作，電影過長，對白過多而且期望既槍林彈雨欠奉，唯有靠影像色彩強烈去搭夠，但真係唔夠，因為毒犯既所作所為係小兒科，浪費靚景以及一班有卡士既演員。

偷天毒犯 Savages
導演：奧利華史東 Oliver Stone
演員：泰萊傑舒、艾倫莊遜、碧琪麗芙莉、班尼史奧狄多路、莎瑪希恩、尊特拉華達
片長：131分鐘
級別：III
評分：5.5/10

＜＜換命快遞＞＞：港式動作場面 有靚景欠劇情

睇完後會覺得好似睇緊成龍式動作片咁，見到好多好動作設計出黎既場面，當然我地香港人由細睇到大，自然覺得都係咁啦，幾好睇既，起碼打鬥場面真係拍得有睇頭，至於外國人睇完後當然會大呼過癮，拍案叫絕，因為導演係元奎，自然打鬥場面好多會經佢手，外國人睇返真正中國人既動作片，實會新鮮感，事實上，呢套戲係真係拍得唔錯既。

積遜斯特咸成名作，皆因佢係呢套戲入面真係幾型又酷，又打得又大隻，演出落力，抵佢長拍長有。

動作場面大多親身上陣，又不時大騷肌肉，外型討好，打得好睇。

舒淇進軍荷李活之作，但似係花瓶居多，戲份唔多又賣弄性感的多，講英文順暢但發音好突兀唔好聽，怪怪地咁。

電影在法國取景，靚景處處，打到橫街窄巷，飛車飛到高速公路，公式動作場面配合美景，係一套好電影既必備元素。

劇情主要係講Jack係一個退伍軍人，現職幫人完成地下任務，但從不過問對象、物件及目的，只堅持自己原則駕駛快車去執行任務，有一次心血來潮違背自己原則去偷望條肉蔘，發現了舒淇，亦透過佢發現一個專由亞洲運人蛇到法國既秘密人蛇集團，於是就利用舒淇去瓦解集團。

劇情當然係唔會透過動作場面去發展啦，只憑幾句對白就去講晒成套戲既劇情，我地做觀眾亦都唔太理呢D野，我地只會睇打得好唔好睇，有冇靚女靚景靚車睇就夠啦，好彩所有野都冇失望，雖然劇情有好多犯駁之處，例如尾段Jack可以好簡單地挾持住警察好友就可以施施然離開差館；咁多槍射入屋，下下對住舒淇射但一D事都冇等等，Anyway，動作場面拍得好睇就夠了，確實Jack打得唔錯，身手敏捷又拳拳有力，身型又大隻，以動作演員黎睇絕對演出落力，有誠意，值得一讚，抵佢有呢套代表作。

至於舒淇，我不求佢演得好，因為好多香港演員拍西片多數不好看，因為感覺怪怪地，佢講英文係流暢但口音唔正宗，好突兀唔好聽，同埋好讀出黎冇乜感情，呢個問題好難解決，因為始終唔係我地聽慣拍西片既演員口音，係難聽左D，投入度大減，呢個唔係佢既問題黎既，至於做得好唔好，我就覺得一般，似花瓶多D，作為女主角戲份少左D。

呢套戲拍到最近上映既第四集＜＜極速快遞＞＞，可見呢個系列係受歡迎，可惜Jack只拍到第三集就冇拍，第四集換左全新人物及故事，如果有時間，我會睇下其他作品拍成點既，不過我有心理備呢類戲既續集一定唔會好睇。

換命快遞 Transporter
導演：元奎、盧域斯羅特希 Louis Leterrier
演員：積遜斯特咸、舒淇、麥迪舒爾斯、法蘭高斯巴連洛
片長：92分鐘
級別：IIB
評分：7/10

＜＜鬼靈精怪大酒店2＞＞：教育性強 娛樂性不足

呢套卡通片可以拍到第二集都算係奇蹟，我睇完第一集之後覺得唔算好睇之餘，仲要已經唔太記得第一集講過D乜了，公仔又唔算可愛，點解仲可以有第二集呢？仲奇怪既係我女友話想睇，所以我先陪佢睇呢一集，真係百思不得其解。

故事講述主角殭屍的女兒已經結左婚，仲話咁快有左個仔添，但佢就好疑惑究竟個孫有冇殭屍血統呢？要等到個孫五歲先知，但呢段時間就想測試下個孫有冇徵兆係殭屍黎，但個女就想過著平淡生活，更加唔想個仔係殭屍，似個老公係個正常人，就咁父女就出現意見分歧了。

有邊個做老豆既唔會覺得自己仔女會大架，永遠都覺得佢地一日係細路一世都係仲係，所以好易代入佢係個孫度，有時意見上既分歧就係因此而起了。

今集主要圍繞住呢班角色，當中林支支最搶鏡，笑位亦都係靠佢，可惜整個故事太有教育意義，笑位唔多，變左悶戲連場。

故事係咪好有教育意義呢，小朋友睇可能未必有共鳴，只係嘻嘻哈哈見班人係度傻下傻下咁，但大人睇既話就真係會覺得悶，因為呢個故事真係陳年故事，況且我地係想開開心心咁睇套卡通片，但呢套野就冇任何歷險元素，冇奸角，造就呢個故事一定平淡，發揮唔到一眾角色設定上可以玩野既元素去衍生出黎既情節，而笑位亦都好少，唔夠連續地放笑彈，所發生事故既地方又唔夠悅目，畫面上已經冇驚喜了，而故事上又得唔到娛樂性，觀眾們只會放蚊吧。

整體而言，呢一集仲唔好睇過上集，仲有D悶添，可能說教味濃，以致觀眾滿足唔到想得到既娛樂性，故事上同大酒店更離左題添，所以今次又會再過目即忘，至少在場我好少聽到班小朋友有反應，如果咁都有第三集，我一定唔會去睇。

鬼靈精怪大酒店2 (Hotel Transylvania 2)
導演：甘地塔他可夫斯基 Genndy Tartakovsky
配音：張錦程
片長：90分鐘
級別：I
評分：5.5/10

＜＜失蹤罪＞＞：得罪女人非同小可

上映既時候已知道呢套戲好評如潮，大衛芬查有返以往當年勇，既然咁多好評我當然會諗住跟風去睇，只係當時冇時間入戲院睇，而呢排有套戲新戲叫做＜＜心蹤罪＞＞，於是我點抽下時間睇下呢套戲有幾好睇有幾勁。結果，我係冇失望，真係幾好睇，好睇在女主角真係做得好好，最後一個鏡頭我真係有D心寒。

就係呢個鏡頭，本來冇乜野，一開頭見到冇乜感覺呀，一個女人而已，當睇晒成套戲後，用返同一句說話同一個鏡頭同一個人，竟然睇既感覺係兩回事，會睇到心寒，呢個就係導演既功力。

故事講述原本有段美滿婚姻既夫婦班仔及露莎，生活本身冇乜問題，但係佢地結婚五周年既時候露莎突然失蹤，而種種證據更令到班仔成為嫌疑犯之一，甚至係謀殺罪，更揭發了其實係班仔不忠在先，原來其實係露莎經過心思細密既計劃黎，製造了一個假失蹤情況，因為佢不忿自己丈夫出軌，情緒受到波動致精神錯亂，之後見到班仔透過傳媒認錯，露莎即時諗到另一個計劃就係殺死前度再秉用傳媒去修補夫婦關係，一舉兩得，結果最後大獲全勝，班仔黯然地接受返那個神經質既老婆。

班仔極力勸市民幫手搵老婆，點知越揭越被嫌疑為殺人犯，又出軌，令事件更複雜，呢種男人確係唔值得嫁，唔抵幫。

露莎尾段呢幕自虐再加造住愛一刀割落前度既喉嚨度，冇得還拖之餘血花四濺，畫面極之震撼，暴力美學更呈現眼前。

有話大衛芬查既回勇之作，有一開首有城市靜景既剪接，表達了犯罪前呈現一片安靜，生活如常，好似唔似有大事發生咁，之後就利用平行時空既插敍班仔同露莎點認識點開始點荒淫點樣開始結婚生活，一步一步令到劇情更明朗化，懸疑程度越黎越深，雖然中段已拆解原來係女主角既計劃，但之後男女主角之間既攻房戰都好出色，劇情峰迴路轉而不失高潮位，而觀眾亦可以清楚明白劇情發展，導演功勞功不可沒。

演員方面，班仔演的不忠丈夫不過不失，其形象或者不似係一個咁既人，而佢演得平淡平實，當中既原因可能係已被女主角露莎蒙碧姬Rosamund Pike 搶晒鏡，佢演既深不可測既女作家老婆演得好陰沉，將角色既陰暗面冇浮誇地表現出黎，反而用眼神同埋陰陰地既表情及語氣去演起角色既計謀多端，演得非常好，最後歇斯底里地殺人既氣場及我要控制你既表現，令到班仔束手無策，呢個氣場真係唔係個個都可以做到，榮獲奧斯卡影后提名的確實至名歸。

睇完呢套戲後，真係會覺得女人真係一個好可怕既動物，係會恐怖到你想像唔到既程度，非同小可，因愛成恨的確係可以去到一個無止境既憎恨程度，自己所做的事會想像唔到的咁變態，女人更係鍾意控制另一半，佢地鍾意點就點，只要對自己有利既野就點做都可以，女人，真係唔得罪得架！

失蹤罪 Gone Girl

導演：大衛芬查 David Fincher

演員：班亞弗力、露莎蒙碧姬

片長：149分鐘

級別：III

評分：8/10

＜＜宇宙深慌＞＞：劇本空洞 一D都唔覺得慌

故事講述地球面臨考驗，環境因素以致人類需要尋找第二個地方居住：火星。但因為計劃進展上出現問題，於是派了六個太空人乘載人太空船上火星探測，點知意外發生了，太空船被迫解體，其中五人意外地降落火星，亦都意外地發現火星其實可以利用氧氣生存，但中間五人之間更受到各種問題而產生考驗，亦要為返回地球而想辦法。

故事極之空洞，一句講晒：有班人產生意外去到火星，然後互相你殺我我殺你，突然間又發現左拯救地球物料，又可以被人救返黎地球繼續研究。唉！但電影好似好長咁，其實係拖長黎做，有好多對白都係閒話家常，對劇情並冇大幫助，睇完後會覺得：喔！完喇？做過咩黎？所謂互相廝殺真係兒戲，電影中的機械人以為會有好多戲份，會製造好多麻煩及問題出黎，點知發覺其實佢唔知想點，一方面殺死其中一個同僚，但另一方面又好似幫緊班太空人逃生咁，冇意識又冇作為既機械人吧。

主角們意外地降落火星，但製造有點粗糙，太空船似橡皮艇，柔軟度十足，點撞都冇爛到。

眾人在火星諗辦法生存，但又係硬要佢地互相廝殺，但又冇伏線，之後的逐個死真係搵戲黎做。

呢個機械人係主角韋基馬既傑作，唔似奸角但又唔知有乜作用，有時幫手有時做殺手，作用模糊。

最後得男女主角成功逃離火星，易過借火，好似講到來回火星就好似搭地鐵咁方便，睇到有點O咀。

睇開頭既部份時候心知不妙，因為開頭已經話要上太空，更只用文字去表達去左幾耐，其餘時間係拍佢地傾計，講以往既生活點滴，噢！算！跟住無拿拿有意外然後迫住解體，咁樣先有伏線係要女主角去救個班人，好！然後又要有個無辜犧牲咁例牌，又跟住一定有人唔憤氣殺死自己人，然後又被機械人殺返，再有個人被唔知咩怪獸或昆蟲食左，死淨男主角然後同女主角返地球，成件事好似好標準科幻格局，但劇情係毫無高潮，無進展，亦都冇大篇幅講地球有幾危險，班人有幾熱血，去講點樣先救到地球，又唔講返人既人性刻劃，成套戲總之只見一班人係火星唔知做乜咁，演員們都冇咩戲可以演到，唯一既係我真係為左韋基馬而睇，＜＜宇宙深慌＞＞中的慌是什麼？不明所以，因為我一D都唔覺得慌，難怪當年被評為爛片之一，我睇完都搖頭了。

宇宙深慌 Red Planet
導演：安東尼荷夫曼 Anthony Hoffman
演員：韋基馬、嘉莉安慕絲、湯薛斯摩亞
片長：107分鐘
級別：IIA
評分：5.5/10

＜＜華麗上班族＞＞：會嘗試總好過一成不變 難度甚高的歌舞時裝片

我的偶像杜琪峰導演又有新嘗試了：時裝歌舞片。港產片其實極少歌舞片，因為片種唔太商業味濃而又包含了藝術成份，加上極度難拍，需要既時間極長，所以好少投資者肯俾錢去拍唔會賺到錢既戲，當然，有級數既導演就可以，對上一次既歌舞片係陳可辛既＜＜如果．愛＞＞，拍得唔錯，呢次到唔擅長拍呢類戲既杜Sir拍，效果真的好壞參半，睇你點睇囉。

廠景搭了一個大的辦公地方場景，肉外景都有，利用幾廿萬光管去打造一個華麗上班地方，美術指導張叔平應記一功，真係駛左唔少錢呀！幫到套戲呀！

首先話明華麗上班族，就自然唔會拍到好打工仔好平民咁，冇的！全部都係一睇就知要用金錢堆砌出黎既，一睇成套戲都係廠景扮外景，連辦公室既地方都扮得金碧輝煌，周圍都係幾廿萬光管砌出黎既情景，外觀又真係幾華麗既，而且工作地方有個大鬧鐘見著齒輪轉，所有傢俬都主要造到通透，用線及鮮艷顏色去代表，美術指導張叔平應記一功，將成件事變成華麗一族，呢個美術方向絕對會令部戲加左好多分，因為其他部份都扣左幾多分。

戲內場景好似舞台劇咁只換上前面佈置道具就當係下場戲，製作上當然係簡單左，整體上亦有一個好玩既地方，電影風格強烈左，不過睇唔慣既一定覺得好悶。

今次主角係圍繞張艾嘉及陳奕迅，前者繼續做女強人角色，駕輕就熟，戲份不算好多，可能係因為要兼顧埋編監工作吧。至於Eason，甚少見佢做呢類賤格角色，發揮不錯，但始終歌舞部份比演戲部份好得多。

電影其實係張艾嘉同名舞台劇衍生出黎既，所以觀眾會見到戲內無論係室內或者係外景都係廠景，打造到好似舞台劇咁Background一樣，只係換上前面佈置及道具就當係一場戲咁，感覺係幾新鮮，好少見，電影風格亦都強烈左，就係因為咁彌補了劇本上的乏力。

故事其實平平無奇，劇情亦都好老套：後生仔好有拼勁，對工作好熱血，然後受老細欣賞而扶搖直上；老闆女兒隱瞞自己身份入辦公室度做，了解平民生活而有苦自己知，好悲哀；部門阿頭為左自己而踩界，包括犯法、瞞公司去做其他生意、造數等等，最後受到應有懲罰，真係就咁講都知劇情會點發展，老生常談既故事不見得有驚喜，可能因為華麗，所以冇乜點提過正常打工仔會遇到既慘況及辛酸，令到我地呢D低下階層難有共鳴，或者從藝術角度去睇呢套舞台劇會好D掛。

演員方面，整體演員都演得不俗，主角陳奕迅歌舞部份係比演戲部份好得多，其實今次佢演的賤佬都演得不俗，只係唱歌始終係佢強項吧。發哥及張艾嘉演的角色其實發揮不多，角色設定上穩陣，演出駕輕就熟，湯唯是次屬於特別演出，但戲份其實都頗多，接近女主角，唔明點解叫做特別演出，另外兩個戲份極重既大陸演員都演得不俗，較自然，演了活潑既一面，其他演員車婉婉、張兆輝及洪天明等都不錯，一班唔係唱家班既都唱埋跳埋一份，都算唔錯架喇！

其實音樂部份都唔算太好，班底係總監羅大佑x陳輝陽x林夕，黃金組合但做了幾首不太入耳既歌曲，算係有少少失望，歌舞片內的歌曲其實真係好緊要，最緊要易入腦，唔好太多字太多Message，觀眾會好難了解，所以先有咁多人評話呢套戲唔好睇，大多都同音樂有關吧。

整體而言，杜Sir今次既嘗試係值得欣賞，畢竟現時港產片真的缺少呢類電影，雖然唔係擅長但勇於向高難度挑戰係值得我們學習，好唔好睇就見仁見智吧，如果製作上黎講，呢套戲係睇到難得的認真的。

華麗上班族 Office
監製：杜琪峰、張艾嘉
導演：杜琪峰
演員：周潤發、張艾嘉、陳奕迅、湯唯、王紫逸、郎月婷、張兆輝、天心、車婉婉、洪天明
片長：119分鐘
級別：IIA
評分：7/10