＜＜屍殺列車＞＞：爆冷有理 人性描繪出色 節奏緊張刺激

<<屍殺列車>>狂收六千七百幾萬，不斷破盡紀錄，成為香港電影史上亞洲電影及喪屍類型電影票房第一位，真心覺得好勁！近年韓風係香港吹得好勁，任何有關韓國的事物都令到香港人特別鍾愛，想不到連電影都可以得到意想不到既成果，都不無道理，因為韓國進步神速，遠視到人們所得到的追求及創意，呢套電影假若係香港，甚至係荷李活都拍唔到既自家附有感動位既喪屍片，所謂的突破以往喪屍類型片格局，只係多左韓國以往電影均具備既必有完素：婆媽必喊位。確係計得好精準及到位，冇浮誇但又Make Sense，呢個就係呢套電影勝出的重要一環。

全片大部份時間都係列車裡人類與喪屍鬥智鬥力，情節都正路，係一個咁狹窄既空間內拍出劇力迫人既情節確係功力十足，當然演員演得出色都應記一功，我特別喜歡馬東錫演的暖男，具感動位。

當喪屍空群出動，於火車站追殺人類一幕極具氣勢迫人，震撼畫面的程度令人驚嘆，韓國電影也可以拍出呢類大場面來。

故事講述一對父女為左修補家庭關係，於是乘坐一客列車到釜山與妻子會合慶祝女兒生日，同時間韓國多處地方受到病毒肆虐，病毒散佈更會變成喪屍。然而，佢地乘搭個架列車臨走一刻卻上左一個已染了病毒既女仔，至此化成喪屍後周圍咬人，喪屍越黎越多後眾乘客要用智力及武力擊退喪屍，而過程中更漸見眾人的陰暗人性。

故事係老正既，通常呢類戲一定有個好打得既男人、有細路、有自私人、有盡忠職守既車長、有患難見真情既情侶等等，係有例牌既人物關係，但卻難得有可以感動到既位，唔只係打打打、殺殺殺就算，反而導演嘗試著墨多一點人物性格刻劃及人性可以有幾邪惡，正正反映了現實生活中不論係韓國或香港，全世界皆有共鳴既人生百態得到觀眾的同感。一個普通人究竟做任何事係咪可以去得好盡，人既本性究竟原本係點？最終可以會點？

其實真係可以好恐怖，不論係好與壞，好人可以豁出去，不惜一切去保護自己心愛的人，甚至犧牲自己，受傷或死亡其實並不可怕，可怕的是眼見心愛的人受盡折磨及襲擊而自己幫不到忙，呢種感受真係好難頂；壞人當然係可以好壞，不離自私、搵人做擋箭牌或者覺得你死你賤咁，導演刻劃呢D人性既劇情處理得好恰當，不落俗套而又貼近現實，作為導演第一部執導的長片，功架真的十足。

睇返幕後花絮，電影大部份都係廠景佈景搭置列車出來，像真度極高，而外面既風景更係用LED 螢幕播放畫面，絕非Key畫面，用心製作及減少特技係值得一讚，識得用錢去拍先係識拍電影的人。

演員方面，我比較喜愛的是演為妻子安全不惜一切犧牲自己性命既暖男馬東錫，佢外型討好，身型肥肥地又健碩，劇情又令到佢超級好打，佢個表情都好得人歡心，最後一幕佢犧牲自己確係催淚既一環。男主角孔劉表現平穩，表現到愛女心切及初段置身事外至後段盡地一煲有強烈對比，但論迴響最大、印象最深刻的是奸角自私阿叔金義聖，真係睇到在場觀眾咬牙切齒，其沒有人性既表現真係會越睇越火，常常問：點解仲未死？其他演員如大肚婆、小情侶等都演得好好。

整體而言，呢套電影爆冷破盡紀碌都不無道理，本身大家一定唔會諗到呢套戲莫講話迴響咁大，咁收得真係意想不到。睇得出呢位韓國導演好俾心機拍呢部韓國第一部喪屍片，唔使有好強既特技及卡士，但有強勁既故事內容及人物性格背景清楚，情節拍得緊張刺激，肉緊到爆，觀眾自然睇得高興及振奮，真係好簡單，韓國成功就因為咁之嘛，只係香港電影人根本唔識拍電影，仍然覺得只有錢搵卡士整D爛特技就糊混過關，一句說話已經證明到香港人係識睇電影的！

屍殺列車 Train To Busan
監製：李東河
導演：延尚昊
演員：孔劉、鄭有美、馬東錫、金秀安、崔宇植、安昭熙、金義聖
級別：IIB
片長：118分鐘
評分：8.5/10