＜＜赤道＞＞：題材有野心但凌駕不來 劇情凌亂兼最差扭橋

<<寒戰>>空前成功，於是造就兩位新導演人氣爆燈，因而野心加強，拍了這套香港少有既反恐題材，心諗既然之前咁成功，兩位既作品一定有信心保證，點知期望越大，失望越大不得止，仲要嘆氣一聲：唔係呀嘛！<<赤道>>真係一部會𠝹櫈之作！

外號赤道的頭號通緝犯偷取了韓國軍方研製的秘密武器，諗住係香港進行地下買賣，於是警方聯同韓國派來的武器專家及係香港物理系客席教授一齊去搵資料，誓要搵返武器及捉拿赤道。

故事看似簡單，總之係有危險武器係香港，於是有班人就為左呢件武器殺黎殺去，鬥黎鬥去，所以就將件事簡單複雜化左，令到劇情極之亂，觀眾其實會覺得睇左成個鐘都唔知做緊乜，件武器係點樣係D乜有幾危險冇人知；點解班人為左件唔知係點既所謂武器咁著緊，但香港方面又只係坐係度開會又冇乜實質行動去部署或者去搵件武器，就憑一個教授就可以靠佢把口就搵到及研究到？韓國個兩位武器專家真係可有可無，最多拍左場幾好睇既槍戰場面，其他地方用不著；結局爛到咁都出到街，好喇，明知佢就係赤道都仲可以單人匹馬去單挑，乜槍都唔拎咁勇就抵死，最後仲要話係"而家先係開始"，真係心諗咁我地之前睇既野即係算係咩呢？係浪費緊我地時間咁話呀！！

好多場戲都係香港警方同埋官員就咁坐係度開會及討論，更加講到明香港官員只懂耍官腔同埋卸膊，雖然好貼地，但都講出香港班人有幾廢，因而成套戲好似欠缺邏輯，成班人只聽個教授一言一語，莫非教授先識用腦而香港班高官唔識？最荒謬既係同現實的一樣吧。

文詠珊轉型做打女，型格都有，打得都稱職，但始終有一樣野就係演技欠奉，戲份又唔多，令到個角色冇乜立體感及個性，對電影情節作用不大。

電影故事確係有好多不合情理既事，究竟一個物理教授可以有幾高學識，竟然佢講乜其他人都有信到十足十，其實佢係咩物理系教授都未知囉！導演係好有野心，將視野放得更闊更遠，去到國際層面，但奈何力不從心，一開始都唔覺有D咩問題，張震好有型咁偷取武器，但到左香港，成件事好似好流，講既警察內部問題好片面，停車場一幕槍戰係拍得有張力但極度誇張失實，到及後韓國明星加入變到每個演員冇乜戲可演，太多支線要講，弄致只有國際層面既題材，並沒有國際層面既質素，最終輪為笑柄。

韓國明星參與港產片係會令到件事更加大片格，但就因為咁而支線太多，人物又多，所以交代既野都需要好多，可惜交代凌亂，令到兩位韓國明星只係負責行行企企，最有用就係拍左場碼頭槍戰，係特別有型，不過對劇情推進不大。

全套電影只覺得張震演得稱職，外型冷酷得來帶點兇狠，要演殺手並無難度，只怪劇本太差，演得好都變得差。

演員方面，全套電影只放重點在兩大主角張家輝及張學友身上，以戲論戲兩位演得都是水準之內，張家輝演的警察當然駕輕就熟，今次更有場更Janice Man的對打戲，難度不大；至於張學友演的電影不多，但一直都覺得佢可以好演得，今次佢演的最終奸角不過不失，可能係劇本太差未能發揮得最好，未突顯到奸角背後有幾陰謀有幾奸，其他演員只有張震演得稱職，戲份不多但有點發揮，外型百搭所以今次演的殺手都有型格，角色相對較突出；文詠珊不是演得不好，今次更以打女登場，不過戲份太少，未能充份其演技；其他配角如余文樂、池珍熙、崔始源、王學圻等都只算係行行企企咁，浪費一班演員演出。

整體而言，電影最敗筆當然係最終結局：所謂埋下伏線留待下回分解，真係荒謬到絕倫！要我地觀眾以為睇緊壞人最終係咩結局，班差人點樣破案，頂！差人就死晒，壞人先話而家先係開始，係冇事先張揚會有下集既電影整個咁既結局，一個普通人都會諗係咪晒緊我時間，咁扭橋法就算之前拍得幾好幾有氣勢幾咁劇力萬鈞，你呢一句說話令我地覺得導演係玩緊我地咁，莫講話下集，呢一集就已經變成永恆的"驚典"了！

赤道 Helios
監製：管東銚
導演：陸劍青、梁樂民
演員：張家輝、張學友、張震、文詠珊、池珍熙、崔始源、余文樂、王學圻
級別：IIB
片長：114分鐘
評分：6/10