＜＜白宮淪陷2：倫敦淪陷＞＞：爆不停 打不死 單天保至尊 爽！

經過首集既屈機過五關斬六將而得來既好壞參半，電影人食過番尋味，再一次炮製多一套又爆多次又屈多次機既動作片，今次唔止謝勒自己打，加埋總統打埋一份，實行動作場面加碼，兩個打點都好睇D既局面，不過今集雖然仍然偏向誇張及一個打十個，但好多都算比第一次處理得較恰當及冇咁屈機，而且電影毫無冷場，無間斷的飛車打鬥爆破，完全滿足好官能刺激既觀眾。

成套戲最離譜首選兩男角坐直昇機轉幾廿個圈再墜機都居然冇咩事，血都唔留多滴，仲好清楚逃生方向及清醒地跑，呢個能人所不能既野真係拍晒手。

謝勒再次演貼身保鑣，打鬥連場，亦都有幾個擺Post場面，只有型，有冇實際冇都變有呀。

正當有如上集結局後的情況天下太平，另一班恐怖分子亦都埋手製作另一個驚天陰謀，首先英國首相無故身亡，於葬禮上集合多國的總統及首相，恐佈分子於是在當日進行一連串既恐佈襲擊，多名首相相繼身亡，當然謝勒演的貼身保鑣及美國總統順利逃脫，為左避開襲擊，兩人密謀合力對抗恐怖分子。

其實故事不需要太理會，多數例牌菜，睇既重點當然係動作場面吧。電影無間斷咁製造多場飛車槍戰動作場面，實行令觀眾冇氣抖，的確今集的動作場面拍得不錯，相當緊湊及刺激，於特技幫助下使畫面一氣呵成，空中直昇機對戰確係拍得幾好，將不可能變成可能，雖然劇情仍有犯駁之處及離譜，就係因為咁先係呢個系列既標記：主角點打都得，點打都冇乜點傷，死極都死唔去咁既款。

空中直昇機對戰係拍得幾好，緊張到爆，兩架機穿越城市更見壓迫感，將劇情推上高潮位，雖則假兼離譜，但睇得過癮。

電腦特技玩盡倫敦城市的爆破及淪陷狀況，所以話特技幫助好大，明知假都會睇到嘩嘩聲。

其實睇得多呢類唔使用腦既電影都唔錯，娛樂性十足，又唔會比起睇D爛片咁浪費時間，睇呢類片都總算好充實咁過，睇一人點單天保至尊確係爽爆，至少港產片拍唔出呢類電影，如果拍到都只會變成爛片，變成西片後就會覺得正、爽！就係咁簡單！

白宮淪陷2：倫敦淪陷 (London Has Fallen)
導演：Babak Najafi
演員：謝勒畢拿、阿倫艾克特、摩根費曼、夏洛特懷莉
級別：IIB
片長：99分鐘
評分：7.5/10