＜＜人再囧途之泰囧＞＞：大陸片難得的破格喜劇 略嫌未玩得盡

就睇下點解呢套戲點會破紀錄，好似好勁咁，口碑又有，開埋續集咁，加上以大陸片黎計又好似呢類破格喜劇咁，仲要去到泰國度玩，諗住會有好似Hangover咁既情節，奈何呢套係大陸電影，好多野都只能夠輕輕帶過，踩界都唔得，最終都係要賣溫情做結尾，老套到爆，就算題材有幾新穎，就係呢D大陸傳統封建思想搞到大陸電影好多都有頭威冇尾陣。

呢一場戲算係最踩界既一幕，剪接得非常好，樂而不淫，作為大陸電影都算係一種破格既情節。

最後還是硬Sell友情，係老套仲好長篇添，不過都唔突兀，睇得舒服既。

多得王寶強，全片笑位多數源自佢，佢既演出都幾生鬼又可愛，冇佢相信呢套戲悶之極。

故事內容好簡單，主要都係圍繞徐崢係去泰國工幹，點知發現死對頭黃渤又黎泰國蹤佢，諗住想走又唔見左本護照，同時又偶遇黎泰國旅遊既王寶強，於是比黃渤早一步一齊去搵幕後老闆簽份建議書，途中更爆出不少笑話。總之好似寶貝智多星咁，不過係大陸人版，即係凡事都不能夠玩到好盡。

其實睇返套戲都可以唔使去泰國拍，主要既景都係間廟，其他街或樹林可以係其他地方都得，呢個賣點真係浪費，冇好好地去玩泰國元素。故事亦離不開友情，發人深省既大道理，好彩我對呢套戲冇好大期望，只見識到原來大陸片可以幾好笑，拍喜劇都有板有眼，而呢套戲既動作場面都很可觀，三位演員演出落力，只係好多時劇情好計算出黎及順理成章，無他，大陸電影嘛。

演員方面三個都做得好好，徐崢身兼導演及演員，但冇楂流灘，拍得唔錯亦演得唔錯；黃渤造型都襯絕，既奸狡又不失調皮，佢堆頭髮同眼鏡認真一絕；王寶強喜劇感強，可愛又天真，冬菇頭當然合襯啦，再不時拎埋棵仙人掌同埋心裡面只有范冰冰呢D宅男先有既特徵，所以好多笑位都係靠佢，亦都係因為演員演得好，呢套戲成功我覺得都係主要因為咁咋。

人再囧途之泰囧 Lost In Thailand
監製：陳祉希、徐崢、鄺文偉、陳志良
導演：徐崢
演員：徐崢、黃渤、王寶強、范冰冰
片長：105分鐘
級別：IIB
評分：7/10

＜＜消失的子彈＞＞：懸疑氣氛足夠 美術劇本有水準

中國版福爾摩斯格局既合拍片，用劉青雲及謝霆鋒做號召力，都係一個明智既商業決定。

劉青雲固然演活了中國版福爾摩斯，將破案當食生菜而心思慎密既性格展現出來，好有說服力既演繹，不是劉青雲演我相信很難搵到另一個比佢更好；另一個係謝霆鋒，明顯打埋年青人市場，做中國版華生，不過係終極奸角，總覺得謝霆鋒演戲都係演出來，太造作，又要兼顧自己形象，又要配合角色設定，所以佢演的每一個角色我總覺得不是去演繹角色，而係謝霆鋒去製造角色，我點都投入唔到佢演戲時既情景，有時佢成功，分分鐘係因為角色成就左佢而唔係佢演得。

中國版福爾摩斯及華生由劉青雲及謝霆鋒合演，角色搵岩左，而且佢地合作都有火花，有互動，使電影不致沉悶反而更有趣，劉青雲的戲真係上晒身，都係靠佢食糊呢鋪。

配角上廖啟智都係渾身是戲，做一個狡猾而且心狠手辣既奸角入木三分，更將塊面塗白色煙屎牙更顯得角色更立體更加面目猙獰更可怕，係設計上成功的其中一個元素，對劇情及代入感幫助好大。

雖然如此，呢套戲的佈局、編排、氣氛以致製作上都係水準之作，懸疑氣氛做得好，暗黑世界表露無遺，襯托案件的曲折離奇，一步步拆解疑團的劇情都好精巧，劇本上花了不少功夫。縱使係合拍片，但唔太濃中國電影味道，可能係香港演員出色演出而淡化，亦因為係合拍片，才有咁多錢去製作一部好戲，不論係場景設置、多場動作戲以及演員分佈都係錢造成，咁都要有好既導演質素及製作團隊，沒有浪費太多金錢，呢一點都值得一讚，呢套戲絕對值得欣賞。

美術場景設置上好精細，舊中國呈現眼前，係令觀眾代入戲中劇情重要既一環，各種製作值得欣賞及學習。

消失的子彈 The Bullet Vanishes
監製：爾冬陞、羅曉文
導演：羅志良
演員：劉青雲、謝霆鋒、楊冪、廖啟智、井柏然、吳剛
片長：108分鐘
級別：IIB
評分：8/10

＜＜踏血尋梅＞＞：殺人過程並不殘酷 真相才令人傷感 編導演俱佳

一開首就聽到春夏唱住鄭秀文的”娃娃看天下”，心諗：點解係呢隻歌呢？原來當你睇完呢套戲之後，就會明白晒。講既係呢個女仔好嚮往一個溫暖既家，一段平平淡淡既生活，但事實話俾佢知冇可能，佢所想的得不到，反而卻得到一個很殘酷及令人痛恨的一生，睇完呢套戲後真係會傷感離場，春夏演的呢個角色註定係一個悲劇人物，悲慘收場。殘酷並不是殺人過程如何殘忍，而係得知點解去殺人，海報上的”真相殺人”好到題，真相才係令人覺得殘忍既事，不得不讚導演的功力，一段段的鋪排見得出精心，係一套有水準既港產片。

春夏呢個角色本身已經被設定為一個悲劇人物，所以佢面對既野要以一個女仔黎講要有咁慘得咁慘，而春夏亦都做得好好，選角正確，佢呢種天真幼稚而又要歷盡多方面既慘痛經歷，作為觀眾既我睇到最後一刻都非常同情佢。

白只呢個角色都設定得好好，係一個暴躁而有份同情心既肥仔，最後迫於無奈殺死春夏其實兩個都好慘，本身佢個樣都好陰沉，配合角色好好，勇奪金馬獎最佳男配角實至名歸。

殺人過程其實著墨唔算好多，但都算震撼，有割皮，抽內臟，放血，但就好多時都模模糊糊咁帶過，始終呢套主要係著重人物心理層面去講故事，咁去處理件事都岩既。

郭富城演的老差骨都演得唔錯，雖然已經被其他配角搶晒鏡，但都恰如其份，佢呢個角色都困難處處，要維持老婆同女兒既生活，又要破案不惜一切搞盡腦汁，心理演繹都到位。

金燕玲演的春夏母親雖然戲份不多，但每一場戲都顯得好傷感及霸氣，得知女兒死訊但仍希望佢生存緊，唔能夠接受現實既傷感，之後回顧之前做母親既用心但得唔到女兒既支持個種霸氣，到及後接受左可以淡然繼續生活下去，場場都係渾身是戲，最佳女配角非佢莫屬。

故事係講春夏係大陸得唔到好好既生活，於是來到香港博一博，以圖發明星夢做模特兒去賺錢，點知去做左援交少女，雖然賺到好多錢但得不到快樂，本身已經得不到家人支持而進入死胡同，一次交易中結識了白只，但卻踏上死亡之路。從而郭富城演的老差骨就要揭破呢單肢解案既一切真相，最後發現真相之可怕。

真相有幾可怕？我要劇透一點，諗都諗唔到春夏呢個角色慘到要人殺自己，成全自己脫離呢個悲慘世界，可能某種生活實在太令人窒息，太令人失去理想既原動力，點解一個人要不折不扣咁叫人殺自己，其實好難做到，亦都好難令人做到，生活上的折磨係人都有，要解決呢種慘況當然冇可能一朝一夕可以解決到，有另一種話：死亡可以解脫自己，當然，選擇去係一種勇氣表現，你要放棄世界，放棄身邊的親人及朋友並唔容易，個種負能力係好可怕，我自己當然有呢種負能量，但並未選擇去死，因為去死呢個行為係好愚蠢。

死亡係好易既事，但選擇去解決件事係最難，面對難題每人每日都會面對，人生存就係要去面對，要去學習才得到人生的意義，我唔係要利用呢套真人真事改編既電影去責駡一班輕輕生既人，只係我覺得有時死係未必可以解決晒所有問題，反而衍生往後更多的社會問題而係未知的，呢個折磨才係人類生活上的一項重大挑戰。

講返套戲，睇之前見到口碑載道，心知呢套野應該有料到，以港產劇情片黎講當然合格有餘啦，娛樂性唔算太豐富，只係呢類戲主要係睇班演員點去演繹角色為主，所以電影有好多演員大特寫鏡頭去捕捉演員心理的感受衍生出黎既面部表情，而去衍生出黎既表演，係其中一個值得看的部份；而電影分4個章節去一步步剖析殺人的事件真相，安排得好，可以令到觀眾一步步進入呢個悲慘世界，好顯功力，導演執導作品並不多，能有此質素確係難得。當然，演員亦都幫了一把，郭富城固然演得不俗，一眾配角更見高水準，金燕玲、春夏、白只、譚耀文渾身是戲，編導演攝影俱佳的水準之作，終於可以為近來港產片出了一口氣。

踏血尋梅 Port of Call
監製：朱嘉懿、唐慶枝、曹敬文、古玉芬
導演：翁子光
演員：郭富城、金燕玲、譚耀文、春夏、白只、蔡潔、邵美琪、李逸朗
片長：120分鐘
級別：III
評分：8.5/10

＜＜拼命戰羊＞＞：過於平淡 米奇洛基的寫照矣

膚淺既我真係以為呢套戲將會係連場激戰，打到飛起，米奇洛基會由紅極一時然後跌入低谷，之後放縱自己，再因一D事而重生振作，再重踏擂台，最後一戰然後死左去，呢個係我心諗期望我會睇到既戲，但係一切意料之外既係，呢套戲原來擂台比賽係其次，講米奇洛基演的過氣摔角手所面對既問題為重點，結果故事編排過於平淡，並沒有好轟烈既一戰，只有內心戲重的劇情。

最後呢一場戲講到米奇洛基即使身患惡疾，但仍然做自己值得光榮的事而去完成賽事，最後一跳固然感動，感動在於人生可以好似呢一跳咁，縱使有好多遺憾，不能繼續與喜愛的人一起，不能再做自己喜愛的事，有勇氣去拼盡最後一口氣，卻係值得尊敬的事。

米奇洛基身邊極少朋友，只有少數知己，難得身邊有一知己，加上兩情相悅，要勇氣去愛也要勇氣去面對現實，總不能順順利利去成全自己，係人生其中一個矛盾。

自己同女兒關係唔好，於是用努力去挽救，點知最後徒勞無功，呢種感覺真係痛到入心，個種無助之感就算事業有幾成就都難免一臉茫然。

女主角瑪莉莎湯美演的為了湊大家中兒子而去做脫衣舞娘，不惜失去尊嚴及賣弄身段，及後幸得結識了米奇這個朋友而改變下半生生活，可惜兩人最後未能在一起，她演得不慍不火，個種無奈及內心掙扎帶動到我既情緒。

我對米奇洛基既認識不深，只知佢演過九個半星期，所以對於佢既寫照我並不有共鳴及同感，不過佢確係演得不錯，佢既角色要面對既係紅過以後所面對既現實：老了，不能像年輕時的自己要去博殺，老時要去找個生存賺錢生活的機會，縱使自己名氣仍有，但始終歲月催人，不得不面對現實有一大班後浪及年輕人掩蓋自己，加上要解決和女兒惡劣關係，找個跟自己並渡下輩子的伴侶，種種要面對既問題一下子要解決晒係好難，又突然間發現自己積存惡疾，令到自己想做的事都唔得，個種無奈及無助之感正正係人類要思考的一環，呢個咁有深度既難題難怪得到威尼斯班評審垂青，得到最高榮譽金獅獎，不過對我黎講，得獎戲係永遠唔會係最好睇的。

想睇摔角打鬥片既人一定覺得悶，然而我間中都會睇劇情片，幸好我覺得呢套戲都算適中，唔算太悶，可能米奇演得太好，將一個角色活生生地代入去自己度，使我都投入埋佢既世界裡，人生係咁無奈，即使一下子有幾豐功偉績及得到心頭好，有身邊既摯愛扶持，疾病確係一個頭號殺手，永遠不能防範，往往令人留憾的事宜，都係個句：活在當下，應快樂時且快樂，要珍惜下一秒下一步，珍惜身邊的人，永冇錯架，呢個課題永遠都要記住，要去實踐。

拼命戰羊 The Wrestler
導演：戴倫阿羅諾夫斯基 Darren Aronofsky
演員：米奇洛基、瑪莉莎湯美、伊雲麗素活
片長：109分鐘
級別：III
評分：7/10

＜＜兇手正在看著你＞＞：前段氣氛緊張 後段自討苦吃

呢套2000年的作品，當年好似迴響不大，一來一睇就知呢套係低成本製作，宣傳力不足，二來卡士弱，只有奇洛李維斯擔大旗，號召力唔多夠，幸好電影走懸疑路線，都會吸引到一班愛睇查案既觀眾去睇，包括我。

其實呢套戲可以做得更好，開首氣氛不錯，未揭曉兇手是誰，然後用上以攝錄機影像做畫面去製造更強懸疑感，令觀眾代入了兇手身上，以兇手身份去觀察周邊既人好似係受害者及警察，呢方面導演確係別有用心，值得一讚。然而當中段大家都好明顯知道奇洛就係兇手，懸疑感當堂盡失，一來觀眾冇得再估邊個係兇手，二來以奇洛呢一身裝扮，點會估到佢係一個殺手，因為太靚仔太型仔，流露唔出任何殺氣，三來，殺人原因極之牽強，好似一個同性戀者得不到別人的愛，就要去做一堆事去引他注意，甚至做一些全世界會轟動既事例如連環殺手去俾全世界知我有幾愛你咁，好似好荒謬咁，最後更係自投羅網俾位人入，叫個Target去搵自己，但又唔殺佢住，講一大輪野最後被暗算，自討苦吃，被燒死，呢鋪真係自己攞黎衰。

電影以奇洛李維斯演的連環殺手專搵一班獨居少女去殺，但殺人目的極牽強，只有殺，冇其他。

以為會係一套警察與兇手鬥智鬥力既電影，點知只係一套你追我我追你，追到你然後殺死你毫無緊張既電影，有點失望。

奇洛李維斯殺手造型不合格，毫無殺氣，只有黑色皮製服裝叫型，只有靚仔不似殺手。

劇本虎頭蛇尾，演員方面亦都不夠好，奇洛李維斯其實只算配角，角色重要但戲份唔多，導致奇洛沒戲可演，只有殺人，跟警察追逐及鬥智，但佢既演繹不到位，冇殺手會有既高傲性格及勝券在握既態度，可能礙於外型塑造到佢太型仔太靚仔太白關係，殺手本質唔覺有；男主角其實係演警察既占士史柏達，戲中人物都貫穿佢，主線係佢度，但演技認真麻麻，佢演既係一個經驗豐富但有次俾賊走甩而導致人質喪生而耿耿耿於懷既警察，從而靠藥物去控制自己，但佢演得唔好，表達唔到內心有幾痛苦及掙扎，至少係佢面部表情唔見有，所以佢同奇洛對手戲唔見有好大火花，呢類鬥智鬥力既電影係需要呢個火花先能夠令電影更有睇頭及趣味，而家兩頭唔到岸，怪不得呢套戲當年迴響不大，甚至到今日都未必有人記得起。

兇手正在看著你 The Watcher
導演：Joe Charbanic
演員：占士史柏達、奇洛李維斯
片長：97分鐘
級別：IIB
評分：6/10

＜＜屍城＞＞：未睇過只有更垃圾的世紀爛片

真的：沒有最垃圾，只有更垃圾的電影：＜＜屍城＞＞是也。上映後已經看到一大堆劣評指呢套戲極之爛，極之垃圾，而導演過往既一級"傑作"已被踩到天上有地下無，適奉喪屍呢排大行期道，於是我就要睇下呢套戲有幾垃圾，有幾難睇，嘩！連我睇爛片大既都頂佢地唔順喇，根本拍呢套戲既所有人都係度浪費時間。

一開波就係呢幢不知名似屋邨但又似工廠既地方有喪屍出沒，係唔知點解會出現，而又唔知點解可以越殺越多，而安志杰以一敵N隻喪屍，極度好打得難以至信，只有喪屍行黎行去，其他不值一提，都唔知其他人做緊乜呀嘛！

鏡頭一轉，幾句說話就去到另一個不知名地方作困獸鬥，真係摸不著頭腦，不知因由，不明結局，成件事唔知做乜，唔知為乜。

其實一套喪屍可以玩到好多野，就好似之前個套Scout咁，雖然都係個D橋段，但包裝得好，又好玩，但偏偏香港既喪屍片真係拍得唔好睇，仲接近垃圾添。首先喪屍片基本上套套都零劇情，但最起碼都要有個主旨，中心思想呀，呀！呢套乜都冇，極之空洞，一班人無端端被班喪屍圍，又冇任何個別故事發展到落去，一味有班喪屍周圍走周圍咬，主角們一味走一味大叫，頂！最後只有大量血漿同埋斷手斷腳，喪屍既化妝尚算可以接受，呢個係連凱既勁勞，不過加埋特技就出事喇，假到無倫，比起打機既畫面真係差勁十倍有多，喪屍更係無演技又唔恐怖，WTF！咩事呀！

主角們演技都係零，Jessica C既一個表情，瞪大對眼大叫，真係睇到大叫：頂你係又叫唔係又大眼，想點呀！至於安志杰例牌冇表情，其他演員當然冇戲可演，亦都冇戲可言。冇故事，冇劇情發展，角色冇血冇肉，冇結局，所以令到我地冇心去睇亦都係成正比，無可厚非，睇既理由只係因為Jessica C。

越講越燥，真不明白為何會有呢套戲誕生．．．

屍城 Zombie Fight Club

監製：鄭振邦、陳嘉上、黃柏高

導演：錢人豪

演員：Jessica C、安志杰、高捷、MC HotDog、尹子維、伍允龍、王敏德

片長：94分鐘

級別：III

評分：1.5/10

＜＜戇Scout打爆喪屍城＞＞：多多鹹多多趣血花四濺又低能 睇得過癮岩晒我

我一睇條Trailer就已經知道我一定要睇呢套戲，唔係因為萬聖節要應節而去睇，而係呢類戲我真係期待已久，好耐冇上映一套抵死而多多鹹多多趣既B級Cult片，呢類戲一直都係小弟鍾意睇既片種，所以無論如何我都會睇，結果我係冇失望到，我覺得如果本身鍾意睇呢類戲既人會覺得，劇情係估到，結局預左會點，但就因為好多野預左，今次都見到有好多位玩到好盡下，亦都見有創意，好笑之餘亦見認真，呢套戲係近年難得一見我可以睇得好開懷既戲。

呢套戲都係用青春片做底，角色上設定為童子軍，所以男主角們都係後生0靚仔，去襯托佢地既當然係要一班活潑青春而肯露既青春少女，今趙女主角定為型女，全場背心波睇到我地目不轉睛，女主角樣子都幾靚女，選角合適，投入度大增，係電影成功既一個元素，起碼至少有樣野記得先啦。

電影中的化妝技術我認為都值得留意，雖然係典型B Movie，但化妝絕不馬虎，每隻喪屍都化到好行，姑勿論喪屍們演技如何，眼見皮開肉裂以至喪屍們的潰爛皮膚都做得好好，唔會被人覺得流流地，呢一點已經係一個值得欣賞既地方，當然電腦特技幫左好多。

B Movie又點會冇斷手斷爆頭劏肚，呢套戲都算幾密集式，程度適宜唔氾濫，亦都做到一氣呵成，大殺四方可以大呼過癮，睇呢類戲最緊要過癮，如果就住就住就見負評了。

呢D戲係要多多鹹多多趣先得過癮，更有時會有共鳴及幻想，如果咁咁咁就好喇，呢次滿足到男觀眾部份既好奇心，而且玩得幾盡睇得開心，除呢幕扯爛衫摸胸自拍外，另一條橋扯爛JJ再跳彈床逃過一眾喪屍耳目，鹹得黎見創意，Like！

故事好簡單，三個童子軍畢業，其中兩個一心離開童子軍進入成人世界，諗住三人露營慶祝時偷跳去蒲，點知入左個喪屍艷舞吧，之後就發展周街喪屍，於是聯合型女戰士三人一起利用童子軍知識去對抗一班喪屍。預左冇劇情，見步行步，真係勝在有幾鹹得幾鹹，有幾爆得幾爆，最緊要睇得High。首先，開首個段其實同本身劇情冇乜關連，只係帶出個題目出黎，不過都幾得意，幫喪屍做心外壓但壓爆個心，然後一如所料食晒D人；之後就有個又靚又型既女主角著住背心波周圍走，係好樣眼，然後童子軍笑料盡出；有幕跳彈床避過喪屍，係有創意，玩埋扯JJ，之後的摸胸、食鮑魚等等都鹹得黎過癮，所以B Movie既好處係唔駛用腦諗而覺得好玩好睇。(當然要睇III級版先叫做好睇！)

睇得過癮過後，真係想搵一堆呢類B Movie既電影黎睇，其實都幾難搵，因為好多都係獨立電影，而且街邊好少呢類影碟存貨，呢類電影先最難拍得好睇，係好考功夫既片種，呢套都算係咁咯。

戇Scout打爆喪屍城 Scouts Guide To The Zombie Apocalypse

導演：基斯杜化蘭登 Christopher B.Landon

演員：泰謝爾丹、羅根米拿、祖兒摩根、莎拉杜蒙特

片長：93分鐘

級別：III

評分：7.5/10

＜＜魔間迷宮＞＞：殘暴的現實與純真的童話之間 還是要面對現實吧

呢套係墨西哥及西班牙合資的電影，照計我應該對佢冇乜興趣睇，但呢齣電影係美術層面上其實做得很好，此片當年勇奪奧斯卡最佳攝影、美術及化妝，實力不容忽視，而此片導演最近有套新片＜＜血色莊園＞＞上映，令我又突然間留意返呢齣電影，睇完之後，發現其實海報上的迷宮並不是主角，而背後的深層意義及故事中所隱喻的意思才是電影的主旨，電影穿梭現實與童話世界之間，話俾我地知現實係有幾殘酷，幻想係有幾純真而不真實，說穿的我地不如面對現實吧啦。

羊頭人發現戲中女主角係公主，於是叫佢要完成任務，然後先可以重返人間，羊頭人係呢套戲既icon，但戲份不多，而且對故事的作用未夠大，不斷地向女主角呼喝及命令但欠情節推進，頗浪費此角色的設定。

片末出現了女主角死後去到童話幻想世界中的國王及母后的身邊，兌現了故事書所帶出的情節，成功逃出殘酷的現實，是好的結局嗎？這是自欺欺人的一種想法。 

男主角演的是一個殘暴不仁的上尉，手法極為殘忍，令此片出奇地暴力，佢係做得好，咁先令到觀眾知道現實就好似佢咁殘酷，根本沒有充滿童話式的情節。

話明勇奪最佳化妝，就睇下佢有幾厲害，其實並不算標青，只係感覺上新鮮，睇得出有認真製作，片中的羊頭人及幻想中的魔人，樣子奇異又不失奇幻，係化妝的大功勞。

電影故事講述西班牙內戰後仍然有好多游擊隊四處攻擊及游走，作為上尉的男主角就要誓死將他們一一殲滅，同時女主角奧菲莉亞及她母親改嫁了上尉，便搬到上尉屋企，及後奧菲莉亞發現了屋後有個迷宮，仲被發現佢自已原來係主角，得到精靈幫手搵到羊頭人，羊頭人命令佢得到鎖匙及故事書後要完成三個任務，才可以重返人間，奧菲莉亞不斷在現實及夢幻世界之間游走，更要面對後父殘暴不仁的行動，兩者能選其中一個世界生存？還是要與現實作出對抗...

故事其實講既係暴政背後帶來的影響及對世界有幾控訴，而所謂的魔間迷宮只係好點綴式咁提下，亦冇好詳細去講個迷宮有幾魔幻，只知佢係一個迷宮但個迷宮不見得好難行，只見羊頭魔人唔知賣咩狗肉咁向個女仔落命令，但又唔見得佢既背景好魔幻，而中段既唯一一個想預料既驚險場面亦都好快咁過，反而電影著墨講既係上尉暴政對抗，以致有好多突如其來既暴力場面確實預料不到，令我覺得以為電影片名好似改錯名咁，導演可能唔想只係拍一部只有冒險的迷宮動作片，想講下政治，點知越講越多，忽略迷宮為基本，反而得到奧斯卡的垂青，得到好評而得不到觀眾想得到的預期，有得有失，這不是殘酷的現實嗎？

或者我係個好膚淺既觀眾，有A元素就必有B既劇情，導演咁做岩既，有分別才突顯此片的另類及獨特性。然而一眾演員們演得確係好，尤其男主角，他演的暴君確係癲喪，內心個種殘暴係會隨住劇情發展而漸漸地呈現出黎，演得內歛而不失霸氣。女主角奧菲莉亞亦都不俗，以細路女黎講要對住空氣以及班怪獸做戲確係唔容易，壓場感亦都好好。

整體而言，呢套戲係唔岩我睇，因為我期望既冒險情節欠奉，但美術部份係值得留意，細緻度好高，只係嫌特技稍遜，融入唔到現實畫面裡，而背後的理念我並唔在意，只係佢講既中心思想係真係好岩既，現實係咁殘酷，暴政往往打擊人們的美好思想，有邊個唔想係童話世界中生活呀？！

魔間迷宮 Pan's Labyrinth
導演：哥連慕迪多奴 Guillermo Del Toro
演員：伊雲娜芭昆露、瑪莉貝維度、沙治洛庇薩、杜鍾斯、雅蓮娜芝兒
片長：119分鐘
級別：IIB
評分：7/10

＜＜一咬OK＞＞：靚人靚景但欠缺內容 虎頭蛇尾的港產殭屍片

電影可以話係冇劇情可言，只係知道林子祥演的吸血殭屍伯爵係一次意外中用血救了小柏林，卻被奸角徐少強發現，亦唔覺意吸了關芝琳的血而擁有魔王力量，於是林子祥就要設法打敗魔王。雖然我可以三言兩語講個劇情出黎，但其實電影入面觀眾只會見到有班人走黎走去，打打殺殺，唔知做緊乜，皆因劇本不濟，演員唔知想點都無可厚非。

林子祥於一次宴會中邂逅關之琳而一見鍾情，但係無鋪排下林子祥可以搵到關之琳，而又可以成功追到佢，人物描寫可見非常淺薄，說服力不足。

奸角徐少強最後變成魔王吸血殭屍，但不見得有幾兇，招數之少以及最後不堪一擊，只係擘大口就叫惡，真正雷聲大雨點少。

小柏林戲中搶鏡不少，因為佢好有演戲細胞，捉到可愛既一面去表演而又表現醒目，難怪當年咁多人鍾意。

電影頭半部去到英國取景，有靚景再加上關之琳靚人，本以為會係一套應該幾好睇既戲，吸血殭屍配城堡係常識吧，而取景的地方可見宏偉及歐陸風味盡現，背景做得好，配合到電影主題自然令到觀眾更加代入電影中，不過到香港後劇情開始亂黎，最後更變傳統港產鬼片鬼打鬼對戰，就係飛黎飛去，射黎射去唔知做乜野，最後同歸於盡更係兒戲，但都唔及最後關之琳眼淚變出林子祥BB出黎仲要話翻生咁鬼離譜，哈哈，原來我當年係冇諗得咁多野，純粹睇戲而冇去思考，估唔到廿幾年後睇返原來有咁多犯駁位同埋咁多無理劇情，或者以前電影風格都係趨向近科幻及反常理劇情為主吧。

演員方面，男主角林子祥竟然戲份比較少，主線落在女主角關之琳身上，但我總覺得佢做戲都係一個樣或者得個樣，演技一般但睇得已經係一個賣點，其他演員係劇本唔掂之下都只係平平無奇，不過港產片以吸血殭屍去做題材又的確係好少，所以比較想睇返以前D戲，因為確係有好多題材而現今電影中比較少見，可見以前班電影人的創意其實好高。

P.S.：我真係好鍾意電影主題曲<<似夢迷離>>，由林子祥作曲兼主唱，每一次聽我都覺得好傷感，電影畫面好強的一首歌。

一咬OK (A Bite Of Love)

監製：冼杞然

導演：冼杞然

演員：林子祥、關之琳、徐少強、鄭柏林、許紹雄、曾近榮

片長：92分鐘

級別：I

評分：6/10

＜＜偷天毒犯＞＞影像強烈但劇情鬆散 小兒科的犯罪情節

故事講述兩男主角係墨西哥賣大麻賣到風生水起，吸引了墨西哥犯毒集團要求合作，點知兩男角拒絕，想過返正常生活，點知俾犯毒集團綁架他倆的知己女主角，要脅合作，他倆唯有就犯，之後就不如你敬我一尺，我敬你一丈，綁架返集團首腦個女，要求放生佢地，所以展開雙方的攻防戰。

嘩！先睇片長，成兩個幾鐘喎，心諗咪會好多野睇？唔理係槍戰、追車定Sex場面，點知片長係大部份時間都係拖長時間的情節，以上我提過既元素通通都得好短時間去交代，其餘時間口水多過茶，甚至有悶場，我心諗既毒犯犯罪片一定會槍林彈雨，殺黎殺去，有個大奸角同主角去鬥智，點知到頭來係講愛情、友情、親情，好！我唔介意，有乜理由兩個男主角可以召風喚雨，能夠班馬去對抗集團，人地話晒係集團，點知我發覺人數極少，智力幾低下，女首腦最後被綁架個女，然後又就範聽晒話死晒狗咁進行交易，令我覺得個集團好流；跟住又可以Head住尊達拉華達既聯邦探員去點佢做野，賣大麻可以賣到咁沙膽，真係奇怪。

電影最突出係呢個罪犯面具，係電影既一個標記，但發揮不到面具背後令人恐懼及高智既一面。

結尾交換人質玩幻想加真實，我諗如果就咁用幻想個個場面做結局，會震撼多D合理D，點知又要玩扭橋，結果真係睇到O咀，不禁要冷笑一下，笑佢唔係咁樣完呀嘛！

班尼史奧狄多路做開毒犯似係定左型咁，咁又真係幾入型入格既，加上佢既賤格到極點既行為，令電影較有睇頭，可惜劇本令角色發揮有限，浪費佢既演出，佢既演出係唯一亮點。

呢套戲係講毒犯，但中文片名加上偷天兩字，睇完後即刻清楚晒，偷天又可解偷天換日，同電影中的交換人質配合得到，原來電影主要講毒犯要脅人質時既犯罪，而唔係主要講毒品交易及毒品帶來既戰爭，片中既綁架情節及交易極之小兒科，好容易咁互相通信，好容易咁綁架到人質，好容易去就範，好唔緊張刺激，更用塔利班最興既斬頭，燒人既情節，但通通都一閃即過，唔覺震撼及令人心寒之處，係導演處理手法問題所致，以致對白過多，動作情節極少，而且推動唔到劇情張力，後段更見失控，鬆散及婆媽程度更甚，導演奧利華史東今次失手了。

演員方面，我覺得演得比較稱職及搶鏡的只有班尼史奧狄多路，佢演的奸角賤佬好入型入格，而且不失有型，點知最後搞笑離場，令到佢之前既出色演出毁於一旦；其他角色演出可能受制於不濟劇本，發揮所限而演出一般，戲份最多既係艾倫莊遜及碧琪麗芙莉，碧琪性感係有，靠多場慾戰去搶鏡，但演技欠奉。

整體而言，呢次係奧利華史東失手之作，電影過長，對白過多而且期望既槍林彈雨欠奉，唯有靠影像色彩強烈去搭夠，但真係唔夠，因為毒犯既所作所為係小兒科，浪費靚景以及一班有卡士既演員。

偷天毒犯 Savages
導演：奧利華史東 Oliver Stone
演員：泰萊傑舒、艾倫莊遜、碧琪麗芙莉、班尼史奧狄多路、莎瑪希恩、尊特拉華達
片長：131分鐘
級別：III
評分：5.5/10

＜＜換命快遞＞＞：港式動作場面 有靚景欠劇情

睇完後會覺得好似睇緊成龍式動作片咁，見到好多好動作設計出黎既場面，當然我地香港人由細睇到大，自然覺得都係咁啦，幾好睇既，起碼打鬥場面真係拍得有睇頭，至於外國人睇完後當然會大呼過癮，拍案叫絕，因為導演係元奎，自然打鬥場面好多會經佢手，外國人睇返真正中國人既動作片，實會新鮮感，事實上，呢套戲係真係拍得唔錯既。

積遜斯特咸成名作，皆因佢係呢套戲入面真係幾型又酷，又打得又大隻，演出落力，抵佢長拍長有。

動作場面大多親身上陣，又不時大騷肌肉，外型討好，打得好睇。

舒淇進軍荷李活之作，但似係花瓶居多，戲份唔多又賣弄性感的多，講英文順暢但發音好突兀唔好聽，怪怪地咁。

電影在法國取景，靚景處處，打到橫街窄巷，飛車飛到高速公路，公式動作場面配合美景，係一套好電影既必備元素。

劇情主要係講Jack係一個退伍軍人，現職幫人完成地下任務，但從不過問對象、物件及目的，只堅持自己原則駕駛快車去執行任務，有一次心血來潮違背自己原則去偷望條肉蔘，發現了舒淇，亦透過佢發現一個專由亞洲運人蛇到法國既秘密人蛇集團，於是就利用舒淇去瓦解集團。

劇情當然係唔會透過動作場面去發展啦，只憑幾句對白就去講晒成套戲既劇情，我地做觀眾亦都唔太理呢D野，我地只會睇打得好唔好睇，有冇靚女靚景靚車睇就夠啦，好彩所有野都冇失望，雖然劇情有好多犯駁之處，例如尾段Jack可以好簡單地挾持住警察好友就可以施施然離開差館；咁多槍射入屋，下下對住舒淇射但一D事都冇等等，Anyway，動作場面拍得好睇就夠了，確實Jack打得唔錯，身手敏捷又拳拳有力，身型又大隻，以動作演員黎睇絕對演出落力，有誠意，值得一讚，抵佢有呢套代表作。

至於舒淇，我不求佢演得好，因為好多香港演員拍西片多數不好看，因為感覺怪怪地，佢講英文係流暢但口音唔正宗，好突兀唔好聽，同埋好讀出黎冇乜感情，呢個問題好難解決，因為始終唔係我地聽慣拍西片既演員口音，係難聽左D，投入度大減，呢個唔係佢既問題黎既，至於做得好唔好，我就覺得一般，似花瓶多D，作為女主角戲份少左D。

呢套戲拍到最近上映既第四集＜＜極速快遞＞＞，可見呢個系列係受歡迎，可惜Jack只拍到第三集就冇拍，第四集換左全新人物及故事，如果有時間，我會睇下其他作品拍成點既，不過我有心理備呢類戲既續集一定唔會好睇。

換命快遞 Transporter
導演：元奎、盧域斯羅特希 Louis Leterrier
演員：積遜斯特咸、舒淇、麥迪舒爾斯、法蘭高斯巴連洛
片長：92分鐘
級別：IIB
評分：7/10

＜＜鬼靈精怪大酒店2＞＞：教育性強 娛樂性不足

呢套卡通片可以拍到第二集都算係奇蹟，我睇完第一集之後覺得唔算好睇之餘，仲要已經唔太記得第一集講過D乜了，公仔又唔算可愛，點解仲可以有第二集呢？仲奇怪既係我女友話想睇，所以我先陪佢睇呢一集，真係百思不得其解。

故事講述主角殭屍的女兒已經結左婚，仲話咁快有左個仔添，但佢就好疑惑究竟個孫有冇殭屍血統呢？要等到個孫五歲先知，但呢段時間就想測試下個孫有冇徵兆係殭屍黎，但個女就想過著平淡生活，更加唔想個仔係殭屍，似個老公係個正常人，就咁父女就出現意見分歧了。

有邊個做老豆既唔會覺得自己仔女會大架，永遠都覺得佢地一日係細路一世都係仲係，所以好易代入佢係個孫度，有時意見上既分歧就係因此而起了。

今集主要圍繞住呢班角色，當中林支支最搶鏡，笑位亦都係靠佢，可惜整個故事太有教育意義，笑位唔多，變左悶戲連場。

故事係咪好有教育意義呢，小朋友睇可能未必有共鳴，只係嘻嘻哈哈見班人係度傻下傻下咁，但大人睇既話就真係會覺得悶，因為呢個故事真係陳年故事，況且我地係想開開心心咁睇套卡通片，但呢套野就冇任何歷險元素，冇奸角，造就呢個故事一定平淡，發揮唔到一眾角色設定上可以玩野既元素去衍生出黎既情節，而笑位亦都好少，唔夠連續地放笑彈，所發生事故既地方又唔夠悅目，畫面上已經冇驚喜了，而故事上又得唔到娛樂性，觀眾們只會放蚊吧。

整體而言，呢一集仲唔好睇過上集，仲有D悶添，可能說教味濃，以致觀眾滿足唔到想得到既娛樂性，故事上同大酒店更離左題添，所以今次又會再過目即忘，至少在場我好少聽到班小朋友有反應，如果咁都有第三集，我一定唔會去睇。

鬼靈精怪大酒店2 (Hotel Transylvania 2)
導演：甘地塔他可夫斯基 Genndy Tartakovsky
配音：張錦程
片長：90分鐘
級別：I
評分：5.5/10