即係唔係唔好睇，其實係幾好睇，仲好緊張刺激添，一次過晒冷班恐龍，仲唔夠皮咩，不過咁，只係因為第一集先入為主，同埋我地覺得好震撼，係因為當時仲未興起CG，以當時既特技做到咁逼真既恐龍係大銀幕出現，有乜可能唔睇到O咀呀，太強了。時至今日，科技進步得咁快，更加去到冇野係冇可能既地步，做乜都得既情況下，反而少左好多真實感，好多野明知係假，係Key，只係個樂園都已經好假，不過咁，電影中的特技已經做得好好了，至少冇第三集之流。
 |
| 今集講男主角同速龍做朋友，速龍係佢既寵兒，其實係離譜，速龍都冇性既，點會聽人講，食人都離唔切啦，有D離譜。 |
 |
| 另一隻新恐龍係滄龍，係唯一海中恐龍，又係極兇猛，中段個幕衝上黎食翼龍好震撼，不過臨尾又係屈機，有犯駁位。 |
 |
| 今集主角兇王龍係恐龍基因變種產品，所以好多時都見唔到佢全身個樣，可能太難做掛，係太難突出佢，不過性格就見人就殺又有智慧，屈晒機。 |
其實故事都係咁啦：一個樂園原本好地地，梗有一班人為左自己利益而利用恐龍去賺錢；；梗有對恐龍愛護有加；梗有一個肥佬係奸角，利用恐龍去得到好處；梗有一幕係人為疏忽，導致恐龍走甩；梗有一套高科技去講有幾勁，但到最後咪又係俾隻恐龍走甩；梗有一班唔識死既部隊走去送死；梗有一對小朋友唔識死去冒險，然後見到恐龍，哇！住走但又死唔去；梗有一班主角點走都仲有力走又會跑得快過恐龍而死極都死唔去；結局恐龍晒冷，最後屈機收場。故事我知好難有變化，都預左係咁，只係有好多犯駁位，冇法！呢D戲在所難免。
 |
| 女主角開頭唔起眼，但變左髮攣左之後就索左好多，加埋佢一身既造型，好有睇頭。 |
 |
| 今集加入不少第一集既元素入去，好似呢個紅光閃光彈咁，集體回憶呀嘛。 |
今集好睇在緊張刺激，最好睇係翼龍突襲樂園，一氣呵成冇氣抖；人類夥拍速龍去鬥兇王龍雖然離譜，但都好刺激，點知最後黎個屈機轉捩點；最後恐龍大戰都好有氣勢。主角們都演出落力，男主角基斯靚仔又有型，呢類戲好需要演技，因為要對住空氣做戲，做得幾好；女主角由直髮變攣髮，由斯文變型女，呢個轉變十分好，令我對佢另眼相看，當然唔計演技啦。當然會有下集，因為終極大佬走左佬，應該有條伏線俾下集，只係下集仲有咩可以拍呢，因為我覺得呢集都拍到幾盡，拍左好多野，恐龍又晒冷，有D擔心。
侏羅紀世界 Jurassic World
導演：哥連卓法羅 Colin Trevorrow
演員：基斯柏特、拜絲黛麗侯活
片長：125分鐘
級別：IIB
評分：8/10
沒有留言:
張貼留言