＜＜謎情追兇＞＞：人性刻劃為主 五分鐘一鏡追逐戰成焦點

呢一部阿根廷電影於2010年勇奪奧斯卡最佳外語片，心諗睇片名有幾勁呀，點解呢套咁既懸疑片都可以拎到奧斯卡既？甚至最近荷李活有個改編版本上映，係妮歌潔曼加茱莉亞羅拔絲做，嘩！乜咁勁架咩呢套戲，於是我就用兩個鐘時間去睇我第一套睇既阿根廷電影，睇下有幾勁有幾巴閉啦。

故事係講退休檢察官寫緊一本懸疑小說，而一直對於一單兇手得唔到法律制裁既姦殺案念念不忘，於是就重新展開調查，即使憑眼神搵到兇手，但因為法律漏洞而令到兇手逍遙法外，廿五年後搵返死者男友才得知兇手被禁錮，係死者男友私下尋找公義，後來檢察官得得到體會，要搵返失去廿五年的真愛。

睇完覺得唔係我杯茶，雖然我都鍾意睇懸疑片，但奈何呢套戲係用懸疑做包裝既愛情片，到最後原來係講兩段可歌可泣既感情(包括男女主角及死者的感情線)，節奏唔算明快，查案敍事手法並不高明，都係靠班人一味用直覺及推斷去搵證據出黎搵兇手，當然電影都有讚嘆既地方，就係中段個五分鐘一Take過既追逐戰，一氣呵成，難度好高，係一個經典既片段；另外接著就有一段激烈出位既辯論，女主角的胸部被兇手眼睛強姦，於是列舉一D反證去證明兇手既可能性，結果去到最後女主角提出兇手可能係有一個好巨大既下體才能令到死者下體受重傷，然後兇手諗都唔諗就抽出自己既下體出黎俾女主角驗證，畫面又真係幾震撼既，可能就係呢幕戲成為三級片，因為其他情節正常不過吧。

兇手逍遙法外，仲要係自己面前出現兼恐嚇，就似我地現今香港咁眼白白任由人宰剖但乜都做唔到，氣難下，心不服，係唔甘心但都冇辦法，這就是殘酷的現實。

用懸疑片種去包裝愛情故事，橋段不算新鮮亦拍得不算高明，但總算拍到細膩深情的一面，節奏不算快，係要用心機去細味的一齣戲。

中段的一鏡過長達五分鐘追逐戰技驚四座，由高空拍到人群再從人群中穿插再展開追逐戰再由大廈高處跳下跑去球場上，用主觀鏡去拍難度極高，技術高超，呢一幕值得一睇再睇。

電影講既係公義，兇手得不到法律制裁係因為有法律既漏洞，為左公義我地平民不惜自己尋找公義，自己做獨裁者，去為死者討回公道，令犯人受到懲罰，最後見到死者男友禁錮兇手，其實講到尾係為左公義還是為左啖氣？電影另一主旨係講眼神，眼神可以講故事，可以講心情，可以講善與惡，男主角就係用眼神去斷定兇手，從而係死者男友眼神亦得知最終結果，其實死者男友都在犯罪，只係私了而已，為左生活男主角不得不隻眼開隻眼閉，令自已好過D，所以事實上善與惡其實只差一線，幸好善與惡係可以分得好清楚，係現今社會上，公義二字係仍然存在，但只存在各人的心裡，一班無善心只顧自己利益既狗官當然唔知咩叫公義，就呢班狗婊子在場，公義難以長存，呢個就係現實既殘酷。我地普通市民唯有盡力去抗爭，再為公義二字長戰到底。

謎情追兇 The Secret In Their Eyes
導演：Juan Jose Campanella
演員：Ricardo Darin、Soledad Villamil、Carla Quevedo、Pablo Rago、Javier Godino
片長：129分鐘
級別：III
評分：7/10

＜＜復仇勇者＞＞：導、演、攝之強勁非筆墨能形容 里安納度真．演技之作

里安納度今回真係最有機會問鼎奧斯卡影帝！

今次夥拍墨西哥金像大導艾力謝路有感實食冇痴牙，有咁強既導演自然就要拼盡去演呢個角色，呢個角色難度其實都好高，好多獨腳戲要演，又要不怕寒冷環境下演戲，又要唔要靚仔樣，有幾慘得幾慘既角色，里安納度今次又真係睇得出佢真係可以懂得演戲，而唔係里安納度去做戲，而係里安納度去做個角色出黎，呢樣野佢終於可以吐氣揚眉，導演真的功不可沒。

大部份里安納度都冇對白，要靠浮誇表情及肢體動作去應付場口，真係好難的，又口水又周圍血都在所不惜，為左驘獎佢呢次下左好多苦功，如果真係佢拎就真係抵佢拎啦！

另一主角湯哈迪都演得好好，奸到不行，賤到無倫，我相信現實一定有呢類人係身邊，不理同伴，濫殺無辜都可以大搖大擺周圍走，最後隻揪里安納度都好精彩，大快人心。

故事係講一班探險家以賣羊皮為生，點知係一次旅程中被印第安人襲擊，乜都無晒，自此之後過著惶恐既生活，里安納度係一次任務中被一隻大黑熊襲擊，身受重傷，雖然已被同伴救返，但奈何長遠計並不化算，最終被同伴湯哈迪遺棄，還殺害其兒子，令到里安納度身心受到極大傷害，最後經過一段艱難日子後憑意志傷癒及重新振作，返村報仇。

電影一開首就拍出一段頗長既殺戮場面，多運用長鏡頭去拍D箭飛來飛去，D人走黎走去又騎騎射箭以致被射死，一氣呵成，執導之功力一眼睇晒，真係好強！當然演員既整體合作性亦都好好，攝影技巧更係上山落水騎馬再落地，真係好想知佢點拍，繼上一套飛鳥俠既一鏡過攝影技巧之強後另一鉅作。

呢一幕里安納度大戰大黑熊極之震撼，大黑熊真係好唔留情向里安納度進擊，咬到血淋淋，睇見到慘，攝影方面亦都一氣呵成，雖然明知佢係CG，但逼真度100%，里安納度演得極好，淨係呢一幕都驘。

電影強在冇用任何燈光拍攝，全用自然光去拍，超有難度及膽色，然而拍出黎既感覺係更加真實及自然美，觀眾真係可以更易投入其中，呢個拍攝技巧真係無人能及，強！

不過好唔好睇真係見仁見智，我就覺得好睇，但未至於十分好，小弟有時會覺得係，有好多畫面係拍得好靚，尤其靜態環境，真係靚絕，但真係好似國家地理雜誌咁，似有拖長時間之感，或者你可以當作里安納度度日如年既表達手法，只係中段有太多呢類鏡頭，難免令人覺得納悶。

幸好導得好，攝得好，演都很好，里安納度真的演得好，通常呢類絕地求生既角色都好好演，發揮空間極大，成就奪獎機會亦大，今次我都感受到佢個種絕望及痛心，以及記掛家人既思念，回家遙遙無期係有幾咁無奈，最後大報復係大快人心，將之前一切不如意及鬱結一次過抒發出來，係真係好爽架！至於奸角湯哈迪亦都演得好，真係奸到出汁，賤到無倫，被虐殺一場亦都一氣呵成，震撼畫面，痛快之極。

整體而言，呢部好明顯亦都係一部為攞獎而拍既戲，藝高人膽大去拍出呢部唔打燈既鉅作，導演功力深厚，長鏡頭拍出令人驚嘆既場口，同埋演員們真的演得好好，令故事性更感立體劇情化，掩蓋一堆靜態環境片段既納悶場面，雖然我冇睇晒其他提名電影，但睇完呢部咁勁既戲真係可以大膽咁講，最佳電影、最佳導演、最佳男主角點會唔係呢部戲拎呀！

復仇勇者 The Revenant
導演：艾力謝路高沙里斯依拿力圖 Alejandro Gonzalez Inarritu
演員：里安納度狄卡比奧、湯哈迪
片長：156分鐘
級別：IIB
評分：8.5/10

＜＜PARTY冇限耆＞＞：羅拔迪尼路主宰全片 豁出去突破戲路 值得尊敬之作

三級片？小弟係咁膚淺，知道呢套戲係三級片而且片種係少少鹹既喜劇，所以對呢套戲有興趣，仲要叫埋我女人一齊去睇添，因為佢係好喜歡睇呢類電影，加上我都想睇下羅拔迪尼路點樣同班後生一齊玩一齊癲。睇完後真的不得不佩服羅拔迪尼路，真係做到活到老，演到老，學到老的情況，真的豁出去，突破佢以往既戲路，做到一個可愛又曳曳既爺爺，演出極之生鬼，值得尊敬。

孫兒碩克大隻靚仔就梗係型，至於70歲既羅拔迪尼路依然Keep得好，隱約見到腹肌真係要寫個服字俾佢，搶鏡度當然係俾爺爺搶晒啦。

羅拔迪尼路回春咁同班後生一齊癲，不停講粗口又講不文笑話，打成一遍，縱使劇本正常到不行，笑料不算太多，但只睇羅拔迪尼路點挑皮都已經值啦。

故事係講爺爺岩岩喪妻冇耐進行大解放，更要求快要新婚既孫兒一齊去佛羅里達渡假，點知咁岩撞到阿孫舊同學，然而佢其中一個朋友更對爺爺有意思，於是大家更玩埋一齊，係玩、蒲、飲既過程中，阿孫碩克意會到心中所愛其實另有其人，得到了人生一大體會及對愛有新的睇法，最後兩爺孫係呢次旅程中得到自己想要既野，展開人生既另一頁。

劇情一反傳統係個長輩去教壞細路，過程中係的確幾盡既，冇諗到羅拔迪尼路會偷偷地打J；冇諗過兩爺孫好Close咁肉帛相見，更何況用自己弟弟發去個孫塊面度；冇諗到羅拔恨搞野恨到出面，不停講粗口，原來一切既事都係為左個孫著想，想個孫諗清諗楚而家個伴侶係咪理想結婚對象，意義深長，雖然好似搞咁多大龍鳳只係講出呢個大道理有點兒夾硬黎，不過阿爺咁用心良苦既另類教學確係值得我地去心思，因為而家已經好少長輩咁有心去花時間傳授教學或者思想去教化下一代，尤其現今社會怨氣咁多，根本冇時間去諗咁多正面既野，呢套戲雖然擺明賣性喜劇，但當中既中心思想我地都應該值得去探討。

Aubrey Plaza演的豪放女都好搶鏡，淫娃表現令我好讚歎，佢個種不惜一切為求上床既演繹更令我有所嚮往。

碩克少見的突破演出，只用小蜜蜂遮住重要部位仲要整郁佢，係其中一個笑位，之後更有疑似露蛋蛋場面，又另一個豁出去之場口。

演員方面，無得輸既係搵岩羅拔迪尼路去做個挑皮爺爺，演技一流，主宰整套電影，演出既生鬼又新潮，好似冇同班後生脫節咁，仲可以融為一體，係當今眾多老牌演員當中已經得返少係好似佢咁勁咁好，尤其係香港近乎冇添，於是搶晒戲都無可厚非；其他演員都係年輕一派，碩克依舊型仔大隻，演得平穩，女主角漂亮，跟新娘子既極權女強人角色有強型對比，各有各好，然而女配角Aubrey Plaza演的豪放女亦都搶鏡，佢恨搞野既表現真係睇到我有所嚮往呢。

整體而言，呢套戲雖然係三級片，但實質三級的地方可能只係露 J一幕吧，其他劇情我覺得算係小兒科，更未至於像美國處男般露骨吧，所以其實笑料並不算多，反而去到後段提供了說教情節，做人要諗清楚，尤其對身邊伴侶，要做自己想做，要愛自己所愛，咁先係真正的人生。

PARTY冇限耆 (Dirty Grandpa)
導演：丹麥斯 Dan Mazer
演員：羅拔迪尼路、碩克艾佛朗、茱莉安荷夫、素兒德芝、奧柏莉普拉薩
片長：102分鐘
級別：III
評分：7.5/10

＜＜魔街理髮師＞＞：暗黑風格依舊 歌舞加暴力睇得吃力

向亞倫力文致敬。

一聽見石內卜教授亞倫力文離開我地既消息，當然好震驚及難過，因為佢演戲實在好好，石內卜教授當然演得出色，而呢套<<魔街理髮師>>他演的變態法官都十分好，又要演又要唱係好難，佢都演得恰如其分，既陰險又變態，但尊尼都要比下去吧。

故事好簡單，尊尼特普演的係一個好出色既理髮師，因為被亞倫力文演既法官陷害坐冤獄十幾年，又俾佢搶走心愛既女人，又得知佢女兒被佢領養，仇恨咁深不得不返黎報仇，於是夥拍傾慕佢既整餅老闆娘一齊設局要殺死法官為止。電影以歌舞片做包裝，係舞台音樂劇改篇，歌舞部份加強戲劇性發展，表達尊尼演的理髮師心中的痛及渴望，係一個不錯既嘗試及選擇，但係呢類片好唔好睇真係見仁見智，拍得好其實係好難，歌要好聽又要跟套戲連貫，又要有高潮迭起唔係一味齋唱，演員又要有演技演住唱，呢次歌舞加血腥暴力我就覺得放果尚算可以，但又唔算好睇，有D位更見悶場，或者係靠尊尼撐場未致難睇。

尊尼特普演的理髮師造型上突顯了佢心中的邪惡，個種黑暗的心能從面孔上睇得到，亦都見到有型，真的度身定做。

眾人要又演又唱，當中尊尼唱得最多，不停要對住死物及空氣唱歌做戲，難度好高但都演得好，可惜與影帝無緣。

最後一幕刺死法官極為震撼，血花四濺又不失痛快，個種怨鬱及大快人心盡現眼前，音樂襯埋底係幾爽既。

繼續添布頓電影風格，黑暗Tune，童話故事式的建築及背景，所以睇添布頓電影真係好多野睇，美術上真係做得好好，好精細。

尊尼特普係演得好，佢演的好想快D刺死法官個種心中的痛及渴望演得內歛，又會心狠手辣，其造型上幫助不少，只係單靠佢撐場係好難令套戲更好睇，其實好多時某幾個場口比較悶，唔係隻歌唔好聽，而係個場戲好長，觀眾睇歌舞係一定要睇住歌詞去睇先明白演者心中感受及劇情發展，不過呢套戲呢部份相當吃力，太多之餘又冇乜高潮位，加上場場戲都黑底，觀眾要好留心去睇唔訓著都好難的。

呢套戲係一個好好的嘗試，呢個戲種係好少的，而且都睇到眾演員的可塑性，係值得一睇的一部戲，只係係鋪排上真係要兼顧好多野，一定要有高潮位，如果唔係觀眾好難頂到完場，唔係一味唱，當然識睇戲既一定會睇埋演員演技及製作層面上既野，分散一下心中的睡魔注意力都得既。

魔街理髮師 Sweeney Todd : The Demon Barber of Fleet Street
導演：添布頓 Tim Burton
演員：尊尼特普、海倫娜寶咸卡特、亞倫力文、沙格畢朗高漢
片長：116分鐘
級別：III
評分：7/10

＜＜葉問3＞＞：葉問仍是無人所不能 故事性難再有突破

拍到第三集了，根據以往系列電影慣例，呢集一定唔多好睇，然而睇完呢集之後，小弟都覺得冇之前個兩集精彩，冇錯，卡士係強左，有泰臣及越打越強既張晉，不過劇本上開始有點鬆散了，但要加強動作場面，兩者好難同時兼顧之下，變成連貫性不足既情況，好多場口都好突兀，好冇鋪排之下去打，好理所當然咁著重打鬥場面多過劇情發展，當然，甄子丹的葉問繼續成為超人，無人所不能之下擊敗對手的情況下，觀眾只能見到葉問如何打贏對手，而唔係葉問點樣應付強敵，因為我地深知葉問一定贏，而冇左個個真實性：葉問都係人，都會面對難處吧。

宣傳重點放在泰臣加盟電影內，只係經過打鬥的三分鐘，雖然重量級打鬥係有，只係觀眾一定唔多夠喉，同埋打完唔知點咁，冇交代，泰臣既出現只係點綴打鬥場面，確實跟劇情關連甚少。

最後重頭打鬥戲係張晉大戰甄子丹，突然間正宗鬥正宗，就係為左壓軸打鬥戲，係打得刺激既，但張晉既演繹有點平靜內歛，若果俾我揀會用好用力既演繹去表現爭贏決心，同葉問既平靜對比強烈一點，戲劇性會好好多。

打鬥場面係多左，為打而打，又係葉問以一敵百，用盡舊香港為背景的建築物之間打，美術上係比前幾集更具睇頭，精細度更加強，係今集其中一個亮點。

故事都有幾條線講，有葉問為左保護香港的治安問題而親力親為去抗戰；解決左之後有譚耀文演的奸角多返挑釁葉問，而間接合成泰臣挑戰葉問場面；同時葉問妻子患病，與葉問共渡餘生；最後張晉開頭想跟葉問切磋武功，點知最後撩交打，要正宗鬥正宗，不論發展咩劇情，最後葉問都會打贏所有人，做返一個普通人坐底飲杯茶，抽根煙。

李小龍出場以秒數計，相信係為第四集留下伏線，當然陳國坤扮的李小龍駕輕就熟，舉手投足都有幾分相似，繼續扮都無可厚非既。

今集加強了葉問與妻子張永成既感情線，主要講張永成患病臨終前跟葉問的生活點滴，亦留下前兩集的回憶，葉問多番為妻而戰，雖不感動但都見到甄子丹及熊黛林都懂得演戲，確係有點進步。

今集唔同既係我覺得美術部份加強左，細緻度係比之前兩集明顯高左D，舊香港的各種美景各種舊建築盡現眼前，當然我知仍然係大陸某影城取景，呢類場景真的幫到電影的可觀度，打鬥場面係呢D建築物之間穿插，睇頭亦都大左，係值得一讚既野。打鬥場面照舊打得刺激，密度都好高，一定不會失望，然而演員上亦都見進步，甄子丹及熊黛林基於劇情發展下有戲可演，原來佢地都會演戲，不只是呆木表情，甄子丹會笑會喊會挑皮，熊黛林也會演到心中的痛出來，二人看來下了不少苦工吧。其他演員如張晉繼續型住打，不算奸角但都好搶鏡，演繹內歛不失霸氣，反而譚耀文演得有點過火，表情上浮誇了點，冇左襟釘華個種夠薑夠狠既性格，只係演到一個要威撩交打既小混混，當然還有鄭則士及梁家仁呢D演技派，演員上都係其中一個值得看的地方。

整體而言，我覺得一定會有第四集的，因為有李小龍及譚耀文的逃走留下伏線，當然呢個系列可長拍長有，一定係票房保證，一定有人睇，至於電影上再有咩突破，我都期待仲有咩火花及橋擺落去呢。

葉問3 (Ip Man 3)
監製：黃百鳴
導演：葉偉信
演員：甄子丹、熊黛林、張晉、譚耀文、吳千語、鄭則士、梁家仁、張繼聰、蔡瀚億、陳國坤、泰臣
片長：110分鐘
級別：IIB
評分：7.5/10

＜＜鴨王＞＞：唔夠淫賤唔夠故事性 不倫不類的結局

呢套戲擺到明賣弄色情鬥下流，不論係宣傳技倆、劇情以及演員都係Sell Cheap，真係唔明當初開呢部戲既投資者點諗，擺到明唔會好睇唔會有內涵唔會有好票房，但偏偏部份演員靠呢部戲殺出一條血路，令到鴨王何浩文及袁嘉敏因此而成名。

何浩文演的鴨王尚算落力，基於佢本身演技有限，並未有突出既表現，嚴格黎講冇演到鴨本身可發揮既特徵及辛酸，只見到一個MK仔賣肉賺錢而已。

鴨王係一份要放低尊嚴任人魚肉既職業，受盡屈辱，睇見到辛苦，辛苦在我係何浩文身上睇唔到有幾慘，只見佢冇靈魂咁同班女Yo來Yo去。

袁嘉敏無疑係呢套戲搶鏡既一個，夠博肯露嘛，演技當然冇乜，尾段更忽然歇斯底里，反差咁大，睇到O晒咀。

呢套戲可以分為三部份，頭半部係鋪排何浩文成為鴨王既前奏，一切都為錢囉，其他經歴有幾純真都係枉然；中段就講成為鴨王後既經歴，亦即係大量性愛場面出現，當然係好似九十年代三級片咁用音樂襯底然後一系列既肢體動作就當係咁啦，睇到呢度都係唔見得有咩故事可言，劇情又唔夠盡唔夠淫賤，似睇緊一班女好渴仔，係女人都話要，又只見到鴨王服務大眾咁，零故事；到後段真係一百八十度轉變，變左暴力血腥片，袁嘉敏大戰奸角何華超，劇情上亦都好突兀，一野就去到暴力場面，又冇伏線又冇鋪排，更顯得不倫不類，結局更加兒戲到極點，或者我會諗到一點好處係：睇得多搞野都要用其他劇情去中和下，槍戰一定有娛樂性，就暴力一下啦。

演員方面，何浩文演出尚算落力，始終佢演技有限，唔好奢望佢會演活角色，不過此角令佢更多賺錢機會，淨係呢一樣野都抵返晒；袁嘉敏係另一個落力既演員，除左除衫就係除衫，相信佢只有呢個作用，反而何華超演的奸角夠賤格，外型及對白配合其角色，入型入格，相信都係佢拍慣呢類戲吧。

整體而言，都會覺得浪費時間睇左呢套戲，既冇中心思想又冇靈魂既演出，仲有埋第二集，真係要套用任達華名句：香港電影業俾你搞彎晒喇！

鴨王 The Gigolo
監製：王晶、張敏
導演：區焯文
演員：何浩文、袁嘉敏、何佩瑜、何華超、唐紫睿
片長：97分鐘
級別：III
評分：4/10

＜＜獨家試愛＞＞：年輕情侶實有共鳴 結局神來之筆

因為<<紀念日>>既上映，我又未睇過葉念琛導演成名作三部曲，於是睇下究竟有幾好睇有幾把炮可以隔咁耐都仲拍到延續篇，話佢係MK版活地阿倫導演，其實只係抬高左佢，話佢係MK導演都仲貼切D，係，呢套戲其實都算幾好睇，係一套我覺得係人都拍到既愛情片，唯一一讚係結局的確係神來之筆，估佢唔到，呢一下係抵俾佢成名，而事實呢套戲講真只算中規中矩，令人有共鳴的約港產愛情片。

試問一個男人面對失戀問題仲要有個索女而又暗戀你既女神做主動，個男人點會唔心動，但呢個Case太極端太做戲，現實生活中好難遇到呢個情況，不過呢個情況放入戲入面又唔算太突兀，係有戲劇性的一環。

相愛代表了兩個人由始至終經歷過的一段時間及感情，由陌生人到了解到對方所有真實的一面，就如親人般，如果唔放晒感情落去就唔會咁難捨難離啦，要鍾意第二個其實好易，但要放棄你心中個個真係好難，邊有咁易放到手呀！

人生身邊總有幾個知己或損友，是好是壞因人而異，但肯定的是呢班人永遠都係支持你個班，人生得呢班知己，又點會覺得寂寞呢？問題解決好多時都係靠佢地呢！

所謂的有共鳴，其實係時下年輕情侶都會遇到的問題及狀況，葉念琛只係將呢D生活上既細節好自然咁套入去電影入面，從而得到我地年輕人既認同及反思，呢部根本針對年輕人市場既電影目標已經達到，所以根本唔會搵到一D好有深度既情節係入面，簡單夠直接就係呢套戲贏既地方。演員做得自然及真情流露當然係加分位，方力申及鄧麗欣本身係當年已經公認為一對情侶，所以演出上的默契及配合都好對位，甚至外型上都好合襯，於是就搵一個外型唔多襯而索爆既吳佩慈做第三者去襯托佢地，更突顯第三者既威力，的確令我都睇到眼甘甘呢，吳佩慈當然係又索又靚啦，呢個選角直接中了時下男孩子所夢寐以求既女神形象，葉導演係選角上及劇情上下了不少苦功，成名作果然係堅！

結局既神來之筆之中的你瞞我瞞確係講中或估中我地年輕一代既心聲及渴望，人總係貪心及安於現狀，每個人都會心思思，都想搵個最好，但更肯定既係，每個人其實係更加享受曖昧既過程，每人心中都會有一個敢於犯險的魔鬼呢！

獨家試愛 Marriage With A Fool
監製：黃柏高
導演：葉念琛
演員：方力申、鄧麗欣、吳佩慈、伍允龍、唐寧、王祖藍、傅穎
片長：98分鐘
級別：IIA
評分：7.5/10

＜＜葉問．終極一戰＞＞：文戲為主 整體更貼近現實

我會覺得好好奇到底拍慣社會性題材既邱禮濤導演點拍呢部珠玉在前既葉問電影，點拍到佢跟甄子丹的葉問有咩唔同，我會諗黃秋生點打都冇可能好似甄子丹咁打到咁勁，由頭打到尾，睇完呢套戲後我會覺得邱禮濤導演拍得好好，可以用另一種手法去拍葉問，亦都不失其個人風格，繼續牽涉社會話題，雖則文戲為主，打戲極少，然而以劇情片來看，整體卻更加貼近現實，不會太天馬行空，太過設計的場景，今回的葉問呈現了最自然最人性的一面。

黃秋生演的係葉問老年的時期，演得很好，好實在，係內歛而淡淡然既演繹。

亦都提到葉問晚年既一段情，雖則只屬輕描淡寫，但都拍得有味道，真係估佢唔到。

動作戲真係唔多，亦都冇諗過最刺激一場係由黃秋生對戰曾志偉，平時睇唔慣佢地既打戲，睇左之後總覺得格格不入，但都拍得好有力度。

舊香港充斥全片，不論係道具及服裝造型上都落足心機，雖話合拍片，但香港味道都算濃，難得的誠意之作。

珠玉在前，好多人難免會認為甄子丹等如葉問，黃秋生要超越佢係好難，好在呢套戲係劇情片，主要係要講葉問老年時所面對既種種社會上及人生問題，仍要面對社會動盪，及武術界既人黎挑戰，又要面對徒弟們既問題，其實做師父係好辛苦，自己既家庭問題又要解決，所以葉問咪又係人一個，而唔係甄子丹般似一個超人。

邱禮濤導演拍慣社會大場面，如今呢套戲屬合拍片，有更加多既資源去拍，自然拍出黎既野更可以具質素，更具規模去拍，亦雖然文戲為主，反而拍得更貼近現實，更能令觀眾更有共鳴感，令呢個題材其實可以拍到另一個片種，導演應記一功，當然黃秋生既演出係神來之筆，俾我揀我會揀黃秋生版本，夠實在嘛。

葉問．終極一戰 Ip Man : The Final Fight
監製：冼國林
導演：邱禮濤
演員：黃秋生、袁詠儀、陳小春、鍾欣桐、曾志偉
片長：100分鐘
級別：IIB
評分：7.5/10