＜＜最爆伴娘團＞＞：千變萬變友共情不變

有D戲睇第一次唔覺得好睇，但睇第二次又會有唔同既體會，就因為最近有一套<<單身又如何>>，我覺得呢套戲同佢好相似，都係講有班姊妹可以為自己赴湯蹈火，訓身無條件咁為自己最好的朋友做事及玩樂，為朋友的另一半而煩惱及搞盡腦汁，呢套<<最爆伴娘團>>睇第二次後便有深深的領悟，就係女人之間既友情真係比我想像中強，更深入，更癲更喪，相反男士之間的友情相對比較拘謹，更唔會好似班女咁有個句講個句，好多都經過計算，因此我都幾欣賞女人既友情，因為呢種友情既可貴係男士冇的。

呢套戲多以群戲為主，眾女角柴娃娃去婚前做準備及玩樂，其毫不錫身瘋狂的表現令我眼睛不合，真係驚嘆女人原來之間係可以去到好盡，佢地之間既友情之深係我地男士冇可能預測得到，分分鐘仲深過對自己既另一半，呢一套戲相信可以得到女觀眾既共鳴。

女士之間難免有比較及針鋒相對，但過程中係有趣，過後更見感情更加深厚，而且每人都有厚道，做朋友有幾難呢？

故事係講女主角Annie事業及愛情不如意，只有性的伴侶在身邊，有一天得知好姊妹要結婚，開心不已，於是答應佢做伴娘，及後認識到其他伴娘，然而一拍即合，做左好姊妹，但其中一個係較高傲，較有錢，所以Annie已經睇佢唔順眼。而係準備婚禮過程中爆出唔少笑料，及後Annie更發脾氣，嫌好姊妹有違自己既理念，加上發現了另一半既存在但又唔好好珍惜，眼見自己處事不斷地糟糕又冇朋友係身邊之際，得到其中一個好姊妹開解，幸好最終順利舉行婚禮及得回好男人。

擺到明主打女人市場既戲一向都有市場，而且呢套主打80%友情、20%愛情，女人自然Buy，作為男觀眾既我都好想睇下女人既世界有幾強大，有幾令我估唔到，當然戲中劇情手法誇張，但情節背後既情感我覺得係真，千變萬變友共情不變，女人對於感情上確係比起男人會放更加多感情落去，不論係朋友或者係伴侶上，係我地男士好難預料到的，就如片中所見一個女人可以為了自己的好朋友赴湯蹈火、安排周詳、更加插自己好朋友所嚮往及最愛的元素落去，呢種心真係用錢都買唔到既，亦都好發自內心既舉動都令我有好深既體會，我都發現男士之間好少有呢D野，男人係講義氣，行動比起一切更快更能解問題，講心？不如講金。所以好少見男人之間會講友情。

試婚紗呢幕係最好笑既位，雖離不開屎尿屁，但論瘋癲程度都足以令我大笑，可以痾落去洗手盤上；可以嘔落去朋友個頭上；更加可以著住婚紗係大馬路上盡情地痾屎，將每個程度既最盡地方玩盡佢，簡單直接地笑就夠啦。

片中以女性角度去出發，女演員眾多之下難得有男演員點綴，就係和女主角談情，細緻度唔高，但戲劇性都好高，一開始由女做主導到之後變男做主導，到最後連女主角都放下身段做小丑求復合，以致最後大團圓結局，一來一往既對戰既無聊又好貼近現實，已令電影冇咁寡。

好姊妹係點樣形成？相信都係靠吹水而做成，正所謂三個女人一個墟，女人愛吹水，吹吹下就會有共同話題，有共同話題就有共同嗜好，唔使幾分鐘就可以一拍即合，女人強勁之處就係呢度，冇男人計算咁多，由此可見女人建立的情簡單直接得多，亦都會更加深厚好多，係好處來的。片中對白精警，就如現實中的女人們吹水時多毫不留情，鹹鹹濕濕咁，嘻嘻哈哈咁，片中一眾女角都能將現實中的女人一一呈現出來，做朋友，其實真係唔難。

至於做情侶，話難唔難，話易又唔易，想討好一個人其實好難，就算花盡腦汁或是做小丑示人都在所不惜，無論男或女都大致相同，不過愛情比友情複雜，心計都計得多，當然如果相愛又點會計較咁多，離開，是為了回來，一下子又會一齊返啦。

演員方面，主線在女主角姬絲汀・慧演的Annie身上，佢都幾有喜劇細胞，多場戲都豁出去演，包括床戲、飲醉酒大鬧機艙、發脾氣搞亂Party及用盡方法甚至半裸取悅男方等等，癲而狂的表現的確惹笑，其對姊妹的情及對顧客的不滿通通都表現得好自然，演得很好。女配角方面，瑪莉莎憑呢套戲提名奧斯卡最佳女配角，但我又唔覺得佢特別突出，只係做得比較放既一位，可能角色上的設定加上佢忘我既演繹，獲得好評都正常。其他女配角都好夾，默契十足。

整體而言，呢D小品一直都有市場，而捧場客亦不少，我都好主張應該拍多D呢類戲，輕輕鬆鬆笑下都幾好，尤其現今社會講情既地方幾乎冇，朋友之間的情更隨時成為工具，一切變得陌生既野就要透過電影去灌輸多一點正面訊息俾我地，就如呢一套小品，友情的可貴。你有沒有可貴的友情呢？

最爆伴娘團 Bridesmaids
導演：Paul Feig
演員：姬絲汀・慧、露絲拜恩、瑪娜露多芙、瑪莉莎麥卡錫、Chris O'Dowd
片長：125分鐘
級別：IIB
評分：7/10

＜＜卧虎藏龍＞＞：武俠世界內藏愛情主義 章子怡光芒四射

其實，呢套2000年李安經典作我係未睇過，所以當年有咁多奧斯卡提名，又拎埋奧斯卡技術獎後我都唔知點解可以拎到，鑑於近日香港上映了聽聞跟首集唔太關事既<<卧虎藏龍：青冥寶劍>>，於是就睇返第一集係咩料，睇完後都明白當年點樣拎到奧斯卡，確實係嘆為觀止，李安拍出一部不一樣的武俠片，動靜皆好，尤其於武俠世界裡重新打造非一般既武打場面，更描寫了於武俠世界裡難得一見真摯動人的愛情觀，其有深度既命題裡拍得那麼唯美，李安呢套作品能到得到眾人青睞，實至名歸。

李慕白明明深愛俞秀蓮，但偏偏一直唔向對方表達愛意，直至臨死前才講出心底話，那時俞秀蓮只好眼白白睇住帶有遺憾的李慕白離開，自己卻幫不到忙，心痛不已，人世間最痛莫過於見著心愛的人離開。

章子怡那時仲係影壇新貴一名，卻演出非常到位，其清純及外剛內柔既多種內心戲演繹更比其他演員的出色及搶鏡，我真係對佢刮目相看，電影主線其實由佢出發，多線發展都靠佢去連貫，難怪之後一炮而紅，聲名狼藉。

發哥演的李慕白真的別無他選，只有發哥才演到李慕白既氣質及量度，而且相當具型格，可惜戲份不算太多，似配角多於主角。

故事始於周潤發演的李慕白江湖引退，欲將佢既青冥寶劍交由貝勒爺保管，因而接觸了俞秀蓮，期間俞秀蓮遇上千金玉嬌龍，一拍即合，情同姊妹，恰巧玉嬌龍見到寶劍後意圖想擁有佢，於深夜時份潛入王爺府偷取寶劍，雖然大鬧王府，幸而得到好武功成功逃脫，但俞秀蓮於交手中估到係其好姊妹玉嬌龍，同時李慕白重返北京後得知此事，於是佢地一齊去取回寶劍，同時李慕白仇人碧眼狐狸其實已混入府中，李慕白決心取回寶劍欲殺仇人。李慕白見到玉嬌龍係可造之材，不想佢踏上不歸路，雖然已從佢手上得到寶劍，不過玉嬌龍已離開王府之際，李及俞想搵返龍，同時龍重遇其愛人小虎，係一次既重要決鬥中，眾人相遇，李慕白雖殺掉碧眼狐狸但卻被施毒針，而玉嬌龍卻趕不及救回李慕白，內疚自殺，最終俞秀蓮及小虎留憾終生。

電影雖屬武俠片做主題，但其實內裡卻主打講愛情，大講李慕白及俞秀蓮與玉嬌龍及羅小虎之間的愛情主義，係李安打造的電影下點會就咁講打講殺，一定會有別於一般武俠片格局，一定包括講情，李安電影一向都係注重講情，尤其係愛情，拍得好細膩動人係其賣點，但如何從一個唔正路既愛情片講愛情就係其高手之處。李慕白及俞秀蓮其實互相深愛對方，卻遲遲未肯講俾大家聽，因為不想受世俗眼光所累，可惜就係呢個封建思想卻令佢地留憾終生，道出中國思想之落後，人與人之間要相處為要計算咁多呢？鍾意就鍾意，需知道要搵一個相愛既對象真係好難，在當時時期處於武俠世界裡更加不知下一秒會發生咩事，隨時橫屍街頭，點解唔好好地去表達內心感受呢？互相傾慕但又唔講出口其實都幾辛苦既，就係呢D落伍思想令中國傳統落黎各方面都比較其他國家遜色，因為永遠都唔會走著最前。

至於玉嬌龍及羅小虎的一段情卻來得可歌可泣，先係一見鍾情再到冤家，於電光火石之下一拍即合，愛得轟烈，縱使分隔兩地，羅小虎都永不忘玉嬌龍，因為真心愛一個人相信真係會等佢，追到天腳底都會要返佢，呢個就係愛情既真諦，可惜最後玉嬌龍視恩如命，被李慕白救回一命後卻救唔返李慕白，內疚而回，比起與羅小虎相愛，都敵不過內心既愧疚，可能係一種解脫，所以先由橋上一躍而下，係一種釋放還是冇面目再見羅小虎？我相信呢個係令到玉嬌龍之前所做的事而去補償既一種說法。

武打方面不算太多，但好具氣勢，狂用吊威吔但有自家風格，輕功如鳥兒般飛，於屋簷頂上又飛又跳盡見中國建築可以好華麗，於樹上飛融入大自然更見靜中帶殺氣，其高尚情操高見一斑，唯美畫面盡現眼前，多用Wide angle呈現中國地方如此宏大，攝影技巧幫助不少，拎奧斯卡實至名歸。

美術方面我都好留意，中國地方其實處處分別不大，都係破舊不堪，但要具電影特色的情況有煥然一新既感覺，好多地方都做得好細緻，用上闊鏡頭盡見其美觀，融入好多具中國特色既擺設及景置，小至字畫或兵器，大至傢俬或樹枝，都顯得與別不同，別樹武俠片一格，值得欣賞。

武打方面其實不算重點，但好有特色既係佢既武俠世界裡能將打鬥提高一個新既層次，當然係狂用吊威吔，大多都係表現輕功，再配合埋中國地理上既宏大建築，相當具氣勢，有屋簷頂上飛來飛去，於府內大打出手，極其運用高牆去作戰地之用，其拍攝技巧跟住演員去打拍得好連貫及氣派，黃岳泰的攝影加袁和平既動作指導創出武打層次，高手臨立難怪可以拍出一場咁好睇既場面；另外尾段的樹上飄住打，靜態之下拍出唯美畫面，用盡地方每一個地方加埋闊鏡頭，亦係睇到我讚歎不已。

美術方面又係令我見識得更多，雖然係中國地方，預左係有個D擺設及格調，但如何令其更上一層樓，提高另一個層次，今次我睇到了，小至字畫及兵器，大至傢俬或場景都做到好細緻，富中國特色就一定，但中國得黎靚係好難，每個場景又唔太覺好重複，場景鮮明會令觀眾睇得更多，更清楚劇情發展，眾多因素都咁強勁，成為經典實屬正路。

演員方面，主線其實係章子怡演的玉嬌龍，那時佢仲係影壇新貴，不過李安真的獨具慧眼，章子怡完全可以架揄角色，雖知道玉嬌龍呢個角色其實有難度，內心戲頗多，又要有一身好武功，但章子怡的表現既清純又做外剛內柔既感覺，其氣質又真係無人能及，佢既演繹又精準到位，一炮而紅都冇得好講，我對佢都刮目相看，本身我對佢冇乜好感，但自從睇完佢既演出真係改觀，佢係寸得有道理，佢係真係做到角色，而且又打得睇得，相信佢下了不少功夫落去，呢一樣都值得我去欣賞既。至於其他演員尤如變成配角，周潤發戲份其實不算好多，但論氣質及量度，又係別無他選，演得好出色，打得又有型；楊紫瓊反而我本身覺得佢做戲一般，表情欠奉，而且講對白好平，冇乜感情，呢次呢個角色都係冇乜特別而又好打得，所以佢今次算係演得自然；張震演的痴情漢都好到位，冇好誇張既表現，但又做到大情大聖的模樣，其痴心一片既態度已深入我腦海中，最後佢對住玉嬌龍跳橋後喊又真係幾可憐既佢。

整體而言，呢齣電影係偉大傑作，於李安拍下的武俠片提高另一種層次，武俠世界中講的愛情主義都可以咁感人，其細膩手法都拍得好感人，地方取景好，攝影動作場面加美術方面夾得好好，使畫面更豐富令我地睇得更多，我將佢成為經典都不為過吧。

卧虎藏龍 Crouching Tiger Hidden Dragon
監製：江志強、徐立功、李安
導演：李安
演員：周潤發、楊紫瓊、章子怡、張震、鄭佩佩、郎雄
片長：120分鐘
級別：IIB
評分：8/10

＜＜勁揪俠2＞＞：英雄片宣揚父愛大道理 質素比首集差好遠

就因為死侍我就突然間好想睇呢套<<勁揪俠2>>，我只睇過第一集但覺得第一集都幾好睇，好熱血，又唔似一般超級英雄電影咁，第一集較人性化，或者係關劇情事，主角只係一個普通人去扮超級英雄，而且不乏笑料及打鬥場面夠爽夠狠，紅埋紫天椒，對於第二集有所期望都係好正常，只係睇完之後真係大失所望，同第一集完全兩回事，成套戲沒有故事大綱，更加沒有笑料，劇情鬆散且不刺激，質素明顯比第一集差好遠，果然續集永遠不及首集這個定律。

今集加入好多新角色，包括占基利演的正義聯盟上校，可惜眾人戲份有限，發揮機會不多且跟劇本發展冇好大幫助，白白浪費一班新角色既可塑性。

只得尾段部份有一場打鬥戲，而且大堆頭，係綾亂既剪接下令到成件事好唔緊張，打得冇上一集咁爽咁狠，招數之少都只係拳頭交，仲以為有好多機關或者武器，可惜一眾所謂英雄只有包裝沒有內涵。

今集重點都有放係紫天椒身上，講父愛既威力及影響力，要正常生活定自己興趣之中作出選擇，呢條橋係英雄片必有既元素，但係呢套講得好表面，全部都係口水多實際行動表達少，以致好多位都似係拖時間，戲劇性遞減。

故事係講勁揪俠及紫天椒於上集大破犯罪集團後重回校園繼續學業，但紫天椒被迫要重新過著新生活，要脫離危險既世界裡，皆因上集她爸爸的死對佢影響好深，唯有死死地氣去做返學生返學，勁揪俠於是加入正義聯盟做大事，與此同時上集奸角肥仔今集為父報仇，化身MotherFucker再披戰衣意圖殺死勁揪俠，其心狠手辣既招數令勁揪俠憤怒不已，包括殺死自己爸爸及上校，最後成功說服紫天椒一齊著住戰服決一死戰。

故事拍得相當鬆散，支線已經唔算多，主要都係講勁揪俠、紫天椒及MotherFucker三條線，不過拍得唔好睇，真正埋牙既地方只係結尾部份，前大半都係講多過做，甚至略嫌口水太多，正義聯盟點樣正義法都只係蜻蜓點水式咁表達，亦都好冇鋪排咁講，情節上又冇鋪排點解MotherFucker會咁快咁易搵到占爺然後話咁易班齊人馬組隊報仇，好多都好突然，但又花好多時間講父愛，甚至連奸角既父親都要講愛，講父親既抉擇有幾重要，有幾為自己子女去犠牲小我，有主旨係好，但表達方式卻係不理想，要表達係要做俾觀眾睇，而唔係坐係度齋講就當係。

我真係有點奇怪點解好一套英雄片要宣揚父愛，咁樣做至少肯定唔會超越到第一集先，花口水去講大道理包裝英雄片，呢條路係好難行，亦都好難拍得好睇，因為題材既局限，觀眾期望係會想睇比第一集更過癮更爽既故事，可惜係講親情為先，成件事已經係預期之外，唔係唔可以講，但篇幅上既比例要Balance返，始終睇英雄片係想睇動作戲，呢一點係好難做，又想變但又唔可以忽略本身必須既元素，今次試驗又失敗了。

勁揪俠2 (Kick-Ass 2)

導演：Jeff Wadlow

演員：艾倫莊遜、嘉兒莫蕊茲、基斯杜化曼茲比薩、占基利、莫利斯卓能

片長：103分鐘

級別：III

評分：5/10

＜＜死侍：不死現身＞＞：寸得爽 打得爽 只有男士睇得爽

近年超級英雄大行其道，票房好助演員人氣上升令到超級英雄電影長拍長有，因而近期出現濫拍之際質素亦見每況愈下，好多英雄電影續集諗住食過番尋味但不論係故事上或者係情節上都係食老本，令人失望，只著重特技的一大堆製作，雖然票房好但口碑差，於是近來開始有好多戲都開始揶揄呢堆超級英雄電影，有<<勁揪俠>>、<<Super>>等等，都係用人性化既角度去展現超級英雄都係人既一面，冇大製作咁大堆頭但仍然得到不俗既口碑，所以Marvel便開拍呢部都係反英雄電影既超級英雄電影，更用最賤、最搞笑、最離譜既元素去拍，一洗之前所拍既電影風格，卻得到好好既反應及效果，今年更被安排於賀歲檔期開畫，百無禁忌又得到好高票房，呢個轉變絕對成功。

死侍得到無窮異能而且好打得，專殺壞人係佢宗旨，殺人之狠能令我大叫爽快。

死侍擺到明賣寸咀、口水多、Kai子，呢D都係男人本有既特質，更得到異能及女人，所以特別係男士都會睇到好有共鳴。

故事開首係用倒敍再加插敍既形式去介紹死侍，先有一場拍得好好，好震撼既天橋打鬥戲，流暢度十足，再加上電腦特技既幫忙，令好多冇可能變成可能，誇張得黎又不失爽快，更有血肉橫飛場面，表達出死侍雖然心狠手辣，但佢殺既通通都係壞人，而且顯得佢冷靜而身手不凡，係騷佢哥理既一種幾特別既手法，唔突兀而且又可以清楚知道佢既由來。

本身係僱傭兵既Wade Wilson專殺壞人為生，點知有一日佢得知佢自己患癌，知道自己時日無多，某一晚有個特工突如其來邀請佢做實驗，可以得到異能及做超級英雄，心諗還死掂死又有好奇心就走去試下，點知原來個度並非之前所講咁好，只係將人類去實驗基因既一個實驗室，Wade因得罪左實驗室最高話事人Francis而要加劇佢實驗進度，Wade因而得到基因異變致皮膚潰爛，眼見實驗失敗就要走佬，點知發現自己原來有不死之身及異能，從而變成死侍去追殺Francis及找回心愛的女人，更有幸得到某組織既異能人士幫手。

今集奸角係創造死侍既法蘭斯，佢地之間既角力既搞笑又肉緊，之間既打鬥戲更拍得有張力及力度，只係奸角唔夠霸氣吧。

男人的英雄電影難免沒有心愛的女人，故事都係主要圍繞男女主角既愛情線，要死侍死就必定要脅佢既女人，係必然定律，不過由一開始既搞鬼性生活到最後的真摯愛情，故事上確係豐富了不少。

死侍得到基因異變而令皮膚腐爛，係一部好難得唔使靠樣而做男主角又做英雄既電影，而且化妝技術很好，將賴恩整個頭都做得零瑕疪，細緻度好高，值得一讚。

故事其實好簡單，要殺既殺，要搞笑就去搞笑，要打鬥有打鬥，娛樂性相當豐富，但我覺得整套戲只有男士才睇得雀躍起來，因為角色設定上亦係一般男士會有既特質，寸咀、鹹濕、口水多、英雄主義、男人主義等等，男士睇一定會好有共鳴及存在好多幻想係度，睇得份外投入都係理所當然，或者係因為呢套戲根本係主打男觀眾吧。

電影裡其實唔算太多特技，主要都係開首既車戰及尾段既重頭戲，但仍然好睇，都係個句，人性化左好多，死侍都係人，都有感情，所以一切都從感情出發，一切都係為左心愛既女人而戰，主題明確，而且佢有天生既特質，就係口賤，所以講左好多生活上會遇到既笑料，賤得黎又真係好抵死，令電影偏向喜劇片多於動作片，係一個成功既要素吧。

當然男主角賴恩雷諾斯演得生鬼，將個賤男演得入型入格但又不失真情，身型又操到好Fit，睇得出佢演出呢個角色好落力，以洗佢演綠燈俠既劣評，我相信佢既演出於未來電影會成日見到佢，呢條水有排食。其他配角戲份其實不多，被死侍搶晒鏡，所以以致佢既拍檔都好少戲份，有點可惜，不過我又唔擔心，我相信一定有下集，到時應該會睇到個銀色人同埋成身火既靚妹有好多技能Show出黎吧。

呢套戲係三級片，係因為片中血肉橫飛，斷頭斷手色情乜都有，但仍然有好高既票房，更有好多人百無禁忌入場睇血，確係一個奇蹟。亦剃了大製作既超級英雄電影眼眉，證明電影質素之重要，劇本及話題性係好重要，睇呢套戲之前得知呢套戲既製作費最後被人減價，更被人睇死，如今得到呢個成績係可以話俾人知，超級特技大製作已於呢個時期已唔係王道，劇本本身及拍攝手法先係王道，用多D錢做拍好部戲好過用多D錢請多D人拍部爛戲呀，呢一點到而家好多電影人都唔知囉！

P.S.：結局播的Wham<<Careless Whisper>>令我勾起回憶，係梅艷芳的<<夢幻的擁抱>>或蔡國權的<<無心快語>>，經典！再一套向老歌致敬既一套好戲！

死侍：不死現身 Deadpool
導演：添米勒 Tim Miller
演員：賴恩雷諾斯
片長：107分鐘
級別：III
評分：7.5/10

＜＜恐龍世紀＞＞：恐龍像真度極高 故事意料之內

最近上映了<<恐龍大時代>>，係賀歲片黎，係因為恐龍呢個題材真係可以長拍長有，又適合一家大細入戲院睇，可以好歡樂咁睇至完場，又有教育意義，一定有捧場客，所以呢套動畫票房都不俗。就因為咁我就諗起好多年前的恐龍動畫<<恐龍世紀>>，我覺得呢套勁D，因為以今時今日既電腦特技，想拍一部好睇而恐龍又唔假既動畫其實唔難，但呢套<<恐龍世紀>>係出自2000年美國用實景再加入CG去拍的一套動畫，以個時既科技黎講係相當困難去做，難得拍出黎既效果好好，實景與虛構既恐龍更加好似合而為一，像真度極高，真係一部不可不看既一套具參考價值既動畫。

動畫除左有恐龍，仲加入左狐猴，畫面上冇咁寡，令大自然生態中多一點生氣，亦都跟恐龍的體型有強烈既對比，突顯恐龍於自然世界裡係巨大無比，無人匹敵。

恐龍不論係外型形態、皮膚及樣貌都仿真度好高，可以用嘆為觀止黎形容，似睇緊恐龍百科全書。

故事係講有隻恐龍主角係禽龍，係草食恐龍，自細未出世之前就被流離失所，恐龍蛋周處走，最後被班狐猴收留，本以為會過著平淡既生活，誰不知所住既陸地被突如其來既流星雨所摧毁，迫不得已之下走去其他地方生活，撞到班亦都想搵繁殖地既恐龍們，於是一齊上路，路途上要面對缺水，缺糧，同伴對敵及食肉龍既追捕，處處受難。

首先，恐龍能夠跟猴子做到朋友，更加可以一齊生活呢件事上已經係有點誇張，當然卡通片係可以天馬行空既，咁先突顯到恐龍係大自然界無論係體型上或者生態上都係最大最霸王既。然而故事係意料之內，由一隻生性純良既恐龍去救全家，對抗大佬食肉龍，當然中間一定有恐龍搞事，要搞對抗唔聽話到最後自食其果，極具教育意義，始終係迪士尼動畫，故事係咁都無可厚非既。

結局部份都有高潮位，係隻食肉龍一隻打幾十隻，懸崖邊單對單極有氣勢，一連串既對打動作一氣呵成，雖然時間雖短，好想打得再激烈D既時候點知係隻食肉龍自己跌落崖，結尾有點過於簡單。

特技方面真係好勁，電腦特技去做恐龍，再放入去實景入面，其實係好難夾得好靚，角度要岩，比例當然要對，而且光暗要效得好準，呢幾方面真係做得好好，所以當年評價相當高，縱使劇情上冇太大高低起伏，睇製作特技都值得一看吧。

配音方面，難得邀請了張學友去配主角，係第一次兼唱埋主題曲，學友配得好生鬼，情感上都處理得好好，亦都係有自家一套既語氣及聲調，一聽就知係學友，確實係令動畫加分不少。當然其他配音員都好落力，各有特色。

整體而言，呢套動畫係當年既技術黎講算係高上作品，極具參考價值，不論特技上、造型上或流暢度都有好高水準，尤其係恐龍叫聲，真係好似，有D聽完更見心寒，一眾幕後人員應記一功。

恐龍世紀 Dinosaur
導演：Ralph Zondag、Eric Leighton
配音：張學友
片長：83分鐘
級別：I
評分：7.5/10

＜＜美人魚＞＞：環保意識強烈 滿佈香港情懷的周星馳風格笑片

經過上一回的＜＜西遊．降魔篇＞＞，感覺好不爽，問心真係唔太好睇，所以今次眼見周星馳再次執導只不演，心裡都大打折扣，對此片真的沒有期望，成日覺得呢套戲伏味濃，加上大陸演員為主，卡士又唔強，睇完Trailer更加冇咩覺得值得去睇，但由於我係忠實星迷，冇可能唔睇佢導演既戲，於是又發揮了沒有期望之下得到驚喜既情況，呢鋪，真係幾好睇，幾好笑喎。

周星馳電影例牌有好多奇裝異服好有風格既人物及醜角，突出之餘每個人都好有特色又搞笑，係周星馳電影獨有自家既精髓。

今次搞笑位有部份來自羅志祥演的八爪魚身上，亦都充滿無厘頭風格，真係幾好笑，尤其係用風扇轉八爪魚同埋鐵板燒八爪魚，係真係得星爺先諗到簡單又直接既笑位。

今次另一大亮點係演奸角既張雨綺，每一場戲都穿低胸衫，盡顯美好身材，大飽眼福。

故事係講鄧超演的富豪劉軒和張雨綺演的女富豪若蘭一同計劃發展青羅灣興建商場，於是觸動到住係青羅灣的一班海洋生物，興建中發放的聲納使班海洋生物生活艱苦，以羅志祥演的八爪魚為首，林允演的美人魚合謀殺害軒，以洩心頭之恨，然而林允係過程中動了真情，愛上了鄧超，及後鄧超得到啓發，認為大自然的空氣及環境比金錢重要，意圖推翻自己計劃，同時間張雨綺已合夥科學家研究及發掘美人魚，意圖牟利，雙方展開對戰。

故事其實好有意義，大講環保理念，戲中一句對白亦將會成為經典：地球如果連一滴乾淨既水，一口乾淨空氣既空氣都冇，賺咁多錢仲有乜用呢？語重深長也。反映現今社會最重要既一個社題，人類民不聊生都係呢個其中一個原因，難得星爺好偉大咁用電影語言去發揮大道理，用意值得令我們尊敬。

周星馳電影從不缺電腦特技，呢次特技已減少左，但質素亦都不俗，係冇幾場戲頗為假，但水部份都做得好有氣勢。

電影風格貫徹星爺式風格，不論係人物造型或是對白，就算沒有星爺演出都覺得有佢既影子，或者皆因有如製作特輯睇到每一場戲佢都親身教導演員點用動作、語氣及表情去表達佢自己風格，敬業之美令我好欣賞，所以好幾場戲都好好笑，條橋簡單易明，一語中的，只有星爺先諗到吧。加上電影好有舊香港武俠片或電視劇既情懷，例如一開首大播羅文及甄妮唱的《世間始終你好》，中段的海鮮酒家繁體字霓虹光管招牌及鄭少秋黑膠唱片等等，令我不禁覺得雖然星爺而家主力賺人仔(或者根本唔需要好落力去賺錢)，但都對於香港各種特色既元素都沒有忘卻，仲放係佢自家電影入面，睇到都份外親切，星爺確係勁！至少好過王晶電影一味翻炒以前經典，更玩到爛睇不堪，兩者級數可見一斑。

電影亦都有不少特技，雖則某幾個場口確係幾假，整體黎講都水準好高，而且氣勢磅薄，使電影生色不少。電影搞笑位都好多，比較深刻既係羅志祥繞住風扇轉個不停，之後被迫鐵板燒，多條鬚要包繃帶；林允暗殺鄧超不遂，反被海膽傷害，充滿《功夫》影子；鄧超驚見八爪魚後到差館報案，描述美人魚但被差佬作弄，畫出多個畫得對但意會錯既美人魚圖畫，之後更於鄧超背後大笑，到鄧超發現變返正經，呢個位真係好得，仲有好多不能盡錄，由此可見星爺對於今齣電影落足料，一洗前幾套作品既頹風。

演員方面，鄧超演出落力，表情說話既用力度好強，演得稱職，羅志祥都不錯，表情分加分，皆因佢下半身係Key，全部都只能用上半身以至表情去做戲，難度幾高，幸好搞笑位處理好好，真係笑得出，當然配音員都幫助不少，張雨綺演的奸角女富豪有霸氣兼有魅力，每一場戲都會以低胸裝示人，令觀眾大飽眼福，佢既魔鬼身材真係一流，反而女主角林允並冇特色，佢係經過挑選出黎做美人魚，演戲經驗淺，睇得出佢既演技好幼嫩，不過不失，其他配角一如以往，搶戲的搶戲，醜角的真的很醜，各有特色。

整體而言，今次星爺執導的作品雖冇佢以往演出既作品咁好笑咁經典，但水準都好高，只係部戲幾血腥及好多粗口都只係IIA級，無非電檢寛限咁大？無論如何，呢套戲絕對係今年華語賀歲片最好睇最值得入場睇既作品。

當然，期待下一個作品會睇到星爺主演吧。

P.S.：其實我覺得加左《世間始終你好》隻歌入部戲度真係加左分，成個氣團變左武俠風格，但又幾夾，仲要搵埋秋官加火雞姐唱，新舊Crossover又創造出另一種味道出來，星爺確係勁！

美人魚 Mermaid
監製：周星馳
導演：周星馳
演員：鄧超、林允、羅志祥、張雨綺
片長：93分鐘
級別：IIA
評分：7.5/10

＜＜人魚傳說＞＞：脫掉魚尾還是一部小學雞的愛情片吧

周星馳執導的＜＜美人魚＞＞現正上映中，小弟乃係星爺粉絲當然會去捧場，係捧場之前就回顧一下過去港產片有冇電影係關於美人魚既呢，係我腦海入面一諗就諗到呢一套1994年由鍾麗緹演繹的港版美人魚，由於呢套係九十年代頭既電影，電腦特技仍未盛行，所以唔怪佢係低成本製作，所以唔會有驚天地泣鬼神既視覺效果睇，轉移為一個簡單到爆既人和美人魚既愛情故事，同時此片亦有當年港產片既通病：沒有內容兼夾順住情節發展以致出現小兒科甚至兒戲場面，然而，此片算係合格，未致於難睇個種。

電影由當年未大紅既偶像派鄭伊健及冒起既鍾麗緹做主角，吸引度不強下也不求任何演技可以睇到，加上故事平鋪直敍，整套電影都顯得平淡得很。

鄭伊健加金城武明顯放眼年輕人市場，可惜他們演技欠奉，金城武更係配角，效果不算太好，不過現時睇返也許會有一絲回憶感覺，睇返佢地後生既時候有時都唔錯。

故事雖用美人魚做主題，但實際見到美人魚既鏡頭並不著重，由於故事內容所限，只見到鍾麗緹在陸地上有如著住件美人魚Cosplay衫，雖有點假，但可以咁諗以當年既製作黎睇都算係咁，最起碼落到水入面又真係睇到條尾好自然咁飄揚，製作上算係有誠意的。

故事係講鄭伊健仲係小朋友既時候一家人遊船河，不小心跌落水，幸好由鍾麗緹演的美人魚救返上岸，到大個左之後又發生同樣事故，及後鍾麗緹諗住用粒珍珠救返佢，點知俾佢吞左，為左要返大海裡就必須要返粒珠，之後就混入學校做學生，然後與伊健搭上，動真情，譜出人與美人魚既戀曲。

故事上真係搵戲黎做，又會無拿拿拎粒珠出黎，然後又要夾硬話要粒珠先返到大海度，其實之後有好多位可以拎返粒珠，但就又要製造多D位去拖拉劇情，再發展四角戀，尾段的擄劫美人魚更係兒戲到爆，由四個冇乜腦天真到爆既所謂奸角意圖捉條美人魚去賺錢，點知做既野只為搶而做，根本冇諗後果，最後更不了了之添。其實呢個係一個好好既題材，只係我覺得由於於當年製作費所限，故事不能夠好天花龍鳳，呢點我明，但講真，脫掉條魚尾還是一部小學雞的愛情片，係有點兒浪費題材，夾硬將條美人魚擬人化走走談情，係天馬行空還是生安白做？呢個就係當年港產片的其中一個弊病：失實加無稽。

演員方面，我亦都唔期望有演技可以睇到，有鄭伊健搭鍾麗緹，鄭伊健本身走偶像派路線，從不見到有演技可言，自然對佢冇期望之下，水準只係偶像派級數，演繹正常但唔會留下好深印象，至於鍾麗緹，我就覺得選角合適，皆因佢係水裡面游的確憑住佢美好既身材展現到優美既一面，而且佢既獨有韻味亦都配合到美人魚本身要有既特質，演技上當然唔會旨意佢有好好既表現。礙於故事上重點在兩主角之上，以致配角上發揮有限，想不到金城武只係配角，而且表現一般，一貫風格靠樣，另一個係麥家琪，做一個妒忌心重既公主，恰如其份。其他配角就只有一貫於其他電影中的演出，表現意料之內。

整體而言，呢套戲唔算難睇，最起碼都睇到雖然低成本製作，但整體性都合格有餘，睇返欠缺任何特技之下純拍攝純正的港產片別有一番味道，我們做觀眾的也可以睇返昔日香港既環境及情懷，卻係一件嘗心樂事，亦更見珍惜以前的香港電影。

P.S.:片中用上王菲兩首歌包括＜＜天使＞＞及＜＜天空＞＞，實在好聽，好有意景，確實加了分數。

人魚傳說 Mermaid Got Married
監製：霍耀良
導演：羅文
演員：鄭伊健、鍾麗緹、金城武、麥家琪、鄭則士、陳國新、苑瓊丹、安德尊
片長：92分鐘
級別：I
評分：5.5/10

＜＜賭城風雲III＞＞：情節翻炒N次 零創作零故事零誠意 冇眼睇

小弟都有睇前兩集，難睇指數當然爆燈，上集都尚算過得去，黎到今集，當然唔會抱好大期望，係預左爛到爆既年度大爛片，只係同屋企人去睇下戲，入場輕鬆下就算，當大家一心以為大卡士，有發哥、華仔、學友、化骨龍同嘉玲姐，點爛都未至於爛到地底泥，點知睇完之後真係覺得唔怪得美國權威電影網站IMDB會俾全球史上電影最低分1.1分佢，真係爛到唔可以再爛喇，對各位好演員致歉先，你地真係有冇搞錯，令到我地觀眾大跌眼鏡，點會為錢去拍呢套咁既爛片架，整臭自己個朵之餘，更令自己作品史中留下一個污點囉。

卡士之強勁真係好耐冇見，盡出賭神、賭俠、化骨龍、龍五夥拍張學友及劉嘉玲，但咁又如何，一套電影要一劇之本，電影劇本唔掂用咩人去演都冇用，大大浪費好演員既演出及金錢囉。

眼見發哥及華仔不停係銀幕面前大做馬騮戲真係搖頭嘆息，究竟佢地係咪真係為錢而拍，為錢而埋沒自己既良心甘心做場馬騮戲去取悅大陸觀眾歡心就算？我真係唔想佢地變成咁，呢類硬滑稽我真係笑唔出。

全片關於賭既情節只有數十分鐘，就中段既打雀英雄傳、搖骰仔同埋跟PSY鬥地主，沒半點緊張刺激之餘更係沒半點想笑既感覺，只係將以往情節翻炒，沒有誠意更加對唔住一班一心諗住睇賭片既觀眾。

故事係零，只知道張學友演的易天行迷戀劉嘉玲，可惜於上集劉嘉玲被周潤發收服，更自己跳下飛機自盡，而張學友就要報仇，中間有咩劇情我就講唔出，因為只見到一班演員做馬騮戲及翻炒以往經典電影情節罷了。

想睇賭片既觀眾一定失望，因為全片關於賭既情節只有數十分鐘，更沒半點緊張刺激情節，只有翻炒N次的打雀英雄傳、翻炒賭神第一集既玩骰仔及翻炒炒到無可再炒既催眠術鬧大細，真係無奈到唔知講乜好；仲有坐坐下監又無端端大唱＜＜友誼萬歲＞＞，仲有獄警肥媽伴唱，一班囚犯都照樣又跳又唱，呢個場面真係O晒咀，又想懷舊但又唔知幾咁難睇，毫無邏輯性，點會有獄警同班囚犯一齊大唱大跳，仲唔走犯咩！尾段仲黎個十幾個劉德華一齊跳＜＜獨自去偷歡＞＞，大佬呀！零劇情轉接仲要劉德華咁樣，無言！加一大堆山寨疑似變形金剛既特技機械人，假到爆又樣衰，呢套野真係大彈特彈囉！

基於劇情超爛，演員演出都好爛，發哥演出落力，盡力搞笑，但其爛演繹及硬滑稽，真係搖住頭咁諗，發哥，唔好再拍喇！再咁樣只會令自己留下污點。劉德華夥拍張家輝，不停做D小學雞動作去搞笑，低能弱智到極點，張家輝係搞笑主要來源，可惜演出無厘心機，夾硬做出低能動作及笑話，可惜又係笑唔出，還有羅家英翻炒N次的攞你命3000，正常的或者只有張學友，角色問題只有正經的奸角演出，戲份不多表現不過不失。

我咁諗都係個句，呢套戲係拍俾大陸人睇，王晶先生話過香港票房只係中國電影票房的二十五分之一，所以佢先拍到咁既質素，佢唔會理我地既感受，更加唔駛理我地香港觀眾其實睇佢既戲長大，佢所用既情節我地通通都睇過晒，亦都見證王晶電影點樣衰落，只係於大陸市場之大令佢中共，口氣如此大係因為大陸觀眾睇戲唔會用到腦，只求無聊硬滑稽去嘻嘻哈哈，坐定定去收錢就足夠。

呢排聽得最多係香港人要有骨氣，罷睇王晶戲，唔可以再俾佢咁大口氣去侮辱香港觀眾，我就覺得我地係好難去改變命運，始終大陸市場真係好大，要佢改變難過登天，我會諗口碑勝於票房，當連美國權威電影網站都俾負評，一傳十十傳八，終衰一日大陸觀眾都會覺得睇王晶電影都會厭，都會覺得冇新意唔好笑，人始終係理性動物，你有咁耐風流就有咁耐折墮的！

賭城風雲III (From Vegas To Macau III)
監製：劉偉強、王晶、王雅林
導演：劉偉強、王晶
演員：周潤發、劉德華、張家輝、李宇春、張學友、劉嘉玲、向佐、向華強
片長：113分鐘
級別：IIB
評分：2/10

＜＜見習冇限耆＞＞：老前輩是寶 生活冇煩惱 經驗總比實力重要

此片上映時口碑不俗，據說係一部輕鬆小品，簡單易明又不失共鳴，更讚男主角羅拔迪尼路可愛，有見及此，所以先有及後出位作＜＜PARTY冇限耆＞＞。當然呢類作品已經於近年買少見少，有時睇得多大製作既片都想搵D呢類戲黎中和調劑一下，我都對呢類作品有種想睇既心，呢D戲就係最能觸動人心，最貼近現實既戲種，因此才得到觀眾歡心，於上映時口碑載道，票房亦出奇地好添。

一老一嫩其實可以得到意想不到既化學作用，一個有經驗一個有新思維，每一個行業都可以憑著呢種火花去創出一片新天地，呢個亦都係其主旨得意之處，發人深省。

羅拔迪尼路雖已年屆七十，但戲路之闊令佢繼續可以演戲，根本冇角色可以難到佢，今次演的年老實習生既可愛又沉實，得到人一份尊重亦都得到我們觀眾對佢對對演藝界的一份尊敬。

故事其實好簡單，講有間設計公司有計劃聘請年老實習生來工作以求一點新火花，女主角安妮夏菲維係呢間公司既CEO，起初佢對年老人有點歧視，覺得佢地思想落伍又對新事物一無所知而處處維刁難，及後年老實習生羅拔迪尼路得到一個機會幫安妮辦事而得到一連串既改觀，覺得其實佢地都好有用，都可以幫到手更得到周邊既人歡心，有驚喜，而佢更要面對家庭及事業上既一大難關，有幸得到羅拔既幫忙及提點，最後得到解決，至此佢地之間既感情更係難以形容。

呢類戲主角身邊總有幾位好岩傾同埋好曳曳既同事朋友作為戰友，係搞笑既源頭添，班後生又好易同個老人家合拍得黎，真係做戲咁做，邊有咁易呀。

套戲其實都拍得唔錯，亦都好輕鬆，部份場面亦算係少少鹹少少趣，點到即止，只係略嫌劇情發展得太過順利：班後生同事好容易跟年老實習生一拍即合，又互相彼此信任，試問現實生活中呢樣野點會咁易進行呢？唔嫌棄佢慢佢古老都算偷笑啦；另外女主角雖則係公司董事，卻竟然咁信一個初黎步到既人去辦事，去接觸家中的一二事，甚至公司高層處理事項。不過，做戲罷了，做得好睇就算然接受吧，確實呢套野係拍得唔錯，平凡中帶有亮點，皆因劇情本身好貼近現實，每種情況都跟觀眾自己息息相關，容易有代入感，有更深的體會。

演員方面，羅拔迪尼路戲路縱橫咁多年，每個角色都能得心應手，呢個年老實習生真的演得好好，既可愛又沉實，演技不造作而且令人物真實化，演技真的出神入化，呢個角色根本不能用到另一個演員比佢演得更好；女主角安妮夏菲維演得平實，有女權之勢但又不失懦弱一面，兩種極端對比之下都演得有層次，而且樣貌身材仲Keep得好好，女神之位暫時難以取代。

整體而言，我相信呢條水應該會繼續食落去，用一個有演戲經驗的演員帶住班算係新的一班演員去拍套戲，可能戲種用喜劇居多，容易入屋，再搶票房，講真：呢D刀仔鋸大樹既戲好過一大堆大製作但未必回本既戲吧，也許回歸真實性強既戲觀眾比較易接受，又可以見到演員們自然既演出，簡單直接，好過睇一大堆爛特技零劇情既大片囉。

見習冇限耆 The Intern
導演：蘭茜美雅絲 Nancy Meyers
演員：羅拔迪尼路、安妮夏菲維
片長：121分鐘
級別：IIA
評分：7.5/10

＜＜西遊記之大鬧天宮＞＞：特技與劇本均失控 太奇幻囉

今年賀歲片檔有鄭保瑞既＜＜西遊記之孫悟空三打白骨精＞＞上映，聽聞口碑不俗，由於上年我冇睇上集，縱使上集劣評如潮，我就膽粗粗挑戰一下有幾劣，睇完後感覺有如孫悟空置身既空間咁，虛無飄渺得唔知做緊乜，不過實質原因無他既，因為呢套戲都唔係為左我地香港人而拍，不嬲都係拍俾大陸人睇之嘛，所以咪只重所謂特技，其他可以不理。

甄子丹好落力模仿馬騮精既神情動態，不過對我黎講佢係似馬騮既，但冇左孫悟空應有既霸氣，亦冇孫悟空自有既頑皮感覺，整體遠遠不及張衛健及周星馳版本的孫悟空。

全片背景九成都係特技砌出黎，假度無倫，於是演員要係藍幕下做戲，自然係演技大挑戰，要演員做得好係好難，相信連演員都未必知道自己做成點，連自己都唔知自己係邊度，導演呢次真係難到自己，以致出黎效果大多失控，兩者完全唔夾，係導演失職。

全片化妝差勁，妖精唔夠妖，奸角唔夠奸，仙人冇仙氣，總之全片唔似西遊記所指的妖精，只係一班人模仿妖精既Cosplayer囉。

故事真係可以不理，只係講甄子丹演的孫悟空做齊天大聖的開始，到最後十幾分鐘先大鬧天宮，之後又睇到郭富城演的牛魔王奸角眼見孫悟空法力高強，於是與他結盟一齊對抗周潤發演的玉皇大帝的天宮，然後又睇到孫悟空與九尾狐談情，最後見到一隻極大牛魔王與孫悟空變身King Kong對戰，由於全片假到爆，特技太流難以投入，睇完都唔知做緊乜。其實故事係大部份都忠於原著，係想拍部最正宗既西遊記出黎，只係方向錯左，點拍都唔會好睇，今次重特技輕劇本細節就已經錯啦。

我知道鄭保瑞呢次想有個新嘗試，以往佢既作品都甚少有好多特技動作片，難得今次有咁多錢去拍，據知今次大多錢都放係特技之上，點知出黎效果真係連學生作品都不如，名譽真係一鋪清袋。演員方面，卡士係勁，有甄子丹演孫悟空，周潤發客串玉皇大帝，郭富城演奸角牛魔王，理應會係套好睇既戲，但事實證明演員卡士都不及劇本重要，呢套爛片無論特技及劇本均失控，或者要嚮應佢既主旨：奇幻吧。

奇幻在化妝之九流，妖精理應係好妖，而唔係痴對角係頭度，痴鬍鬚就係老妖，服裝都不見得有幾配合角色，全部演員都唔夠精，仲好人樣添，皆因今次有咁多錢去拍，做好製作上既野係理所當然，而家連化妝都做得唔夠神似唔夠花心思落去，點叫觀眾去投入睇一部中國奇幻著作以妖精為主既西遊記呢，我地而家只係睇緊一班人去模仿妖精既Cosplayer罷了。唉......歸根究底，呢套西遊記係拍俾大陸觀眾睇架嘛。

西遊記之大鬧天宮 The Monkey King
監製：阿甘
導演：鄭保瑞
演員：甄子丹、周潤發、郭富城、何潤東、陳喬恩、海一天、張梓琳、夏梓桐、陳慧琳、梁詠琪
片長：120分鐘
級別：IIA
評分：4/10