＜＜凸務MADAM＞＞：度身定做 典型自嘲式笑料的卧底特務片

瑪莉莎麥卡菲係近黎上位既搞笑演員，皆因佢係一個肥婆又得意，做戲又搞笑又到位，於是今次再擔正做主角，更有祖迪羅及積遜斯特咸齊齊陪佢搞笑，成個陣容即刻升Grade，當然我都覺得呢套戲Budget有好多，因為好多地方取景：羅馬、匈牙利等等，非常揼本。故事上亦都好典型，不停發放笑彈，意料中事，不過，又真係幾好笑的。

瑪莉莎戲中造型百變，每個造型都有搞笑效果，係呢套戲好睇既其中一個元素。

瑪莉莎演出落力，不少動作場面親自上陣，當然有好多搞笑場面源自佢，表情又夠抵死，抵佢近年上位。

瑪莉莎係CIB幕後助手，主要協助祖迪羅特務工作，點知祖迪羅一次懷疑任務失敗致被殺，於是親身上陣做卧底調查炸彈集團，更有積遜呢個性格飄忽的特務一齊調查，點知後尾身份曝露左同埋祖迪羅的計劃，好彩最後都任務成功，瓦解左個炸彈集團，成為一個真正的特務。

故事好簡單，其實睇呢D戲根本唔使理個劇情，都預左佢符符碌碌去執行任務，經過好巧合既情節，笑料百出，最後任務成功。瑪莉莎演出落力，搞笑位大部份源自佢，因為佢真係好得意，真係幾搞笑，好多自嘲式的笑話係好到位，例如踩電單車冇力反而翻側；肥婆係公眾場合大聲笑；肥婆冇靚女咁多好侍遇等等，觀眾都會睇得好過癮。

祖迪羅難得搞笑，效果都唔錯喎，係驚喜之一。

積遜斯特咸做一個長氣又沉氣既自大特務，粗口橫飛又懶叻，與瑪莉莎互寸搞笑十足。

演員方面，祖迪羅搞笑真係第一次睇，仍然好有型，但戲份並不算多。積遜斯特咸都有搞笑成份，佢做一個自大的特務，狂吹自己之前有幾勁又幾威，只係點都唔夠瑪莉莎咁叻，得個吹字既佢真係戇居到爆，同瑪莉莎互寸係好搞笑。其他配角亦都好出色好搶鏡，瑪莉莎的好姊妹癲喪行為及浮誇表情以及咸濕助手演出一絕，喜劇感十足。

整體而言，片長雖然足兩小時，但係唔經唔覺咁過，因為冇乜冷場，全因有班出色演員演出具水準，搞笑十足，不理奸角有幾廢，只要劇情都很豐富，場景又靚，呢套戲係一個不錯的選擇。

凸務MADAM (SPY)

導演：保羅菲 Paul Feig

演員：瑪莉莎麥卡菲、祖迪羅、積遜斯特咸、露絲拜恩
片長：120分鐘
級別：IIB

評分：7.5/10

＜＜龍珠Z劇場版：神與神＞＞：打鬥場面極少 故事有點離譜

我係龍珠忠實粉絲，對於再次推出劇場版，當然我係開心，我一定會睇，但心諗：動畫劇場版近黎真係唔好睇既居多。眼見海報上的敵人極之醜樣又冇霸氣，睇黎今次未必會好睇，睇完後果然我既諗法冇錯。

首先係敵人係破壞王，今次想破壞地球，悟空要保護地球，於是同破壞王比試甚至交手，但破壞王被設定強過菲利、斯路及布歐，最後悟空都贏唔到他，有如此強的破壞王又駛乜講咁多口水，不如一黎就破壞啦，駛乜俾面，點知佢並非設定為奸角，只係冇事做搵事黎做既破壞王，去搵神去交流一下，最後更同悟空佢地交流一番，其實係有點離譜。今次主打悟空．其他角色有如過鏡，有D更加好似小學雞咁，弱過藥水，所以我覺得今次唔太好睇。

今集悟空經過其餘5個撒亞人：悟飯，悟飯個仔，比達，悟天，杜拉格斯，集氣後變成紅髮極強悟空，不過最後不見得強，敗陣而回。

破瓌王被設定為最強手，強過菲利、斯路及布歐，可以一隻手指玩盡悟空，強到冇朋友，邊好睇架。

龍珠Z劇場版：神與神 Battle of Gods

監督：鳥山明
片長：88分鐘
級別：IIA

評分：5/10

＜＜心動＞＞：就算未能長廂廝守都冀望再續前緣

老實講，我好少睇愛情片，因為通常俾我既感覺係好悶，或者係因為我欠缺呢種戀愛既階段，冇特別的共鳴，不過睇報導指出呢套戲曾經被時代雜誌選為當年十大最佳電影之一，於是我花少少時間，去睇下呢部電影有幾好睇，結果睇完後，我覺得係有種少女情懷係度，我會覺得唔錯，但都唔係我個杯茶。

故事由張艾嘉飾演的作家出發，想搵個故事去寫，點知將自己既往事變成故事，即是張艾嘉就是梁詠琪。由梁詠琪及莫文蔚呢對學生妹少女懷春開始，遇見金城武呢個筍盤，一見鍾情，最後金城武揀左梁詠琪，及後被梁詠琪媽媽反對一齊，棒打鴛鴦，分手收場。之後金城武搵莫文蔚做代替品一齊左，之後幾次撞返梁詠琪，好自然秘密發展關係，可惜結局還是冇係埋一齊。

金城武及梁詠琪其實頗合襯，戲中佢地之間的難捨難離的感情，都會睇到扣人心弦，估佢唔到係都有幾場床上戲呢。

莫文蔚其實係雙性戀，暗戀梁詠琪但最後同金城武一齊，友情和愛情有時係會令人分唔清。

愛一個人其實都係想佢幸福快樂，即使最終唔能夠係埋一齊，就算未能長廂廝守都冀望再續前緣，好似金城武和梁詠琪咁，實在太愛對方，即使分開一排，分隔兩地，撞返之後就因為曾經深愛過，都會再次發生關係，再發展感情，不過有時太多外來因素，最後不能一齊都冇法，其實人係會愛很多人，係正常的，只不過個種愛係想佢幸福開心，而唔係一般的愛情，點為之愛一個人？就係你對佢心動的時候吧，就係咁簡單。現在香港人很少愛了，愛人已經很難了，現在只會存在辱駡、妒忌、憎恨、出賣等等不好元素，人與人之間缺少了愛其實情況不好，愛其實可以令人開心，有美好回憶，有很多愉快的經歷，使人的生活更加多姿多采，我很想現在的人再次去愛人，不論係愛情、親情或友情，愛係好重要的，咁先會生活更加美好，少了爭拗多點愛吧。

其實金城武戲路很廣，但我睇親都係見佢做浪子、花弗男，當時有少少定型，但其實佢可塑性可以好高，不過我地仲未睇到佢真正的演技。

演員方面，金城武貫徹做浪子，做一個受萬人愛戴的男人，不過佢做了呢類角色很多次，所以驚喜不大；梁詠琪當年憑呢套戲提名金像獎及金馬獎最佳女主角，無可厚非角色係度身訂做，少女情懷演出自然，當年佢又初出道，少女味道出晒黎，佢本身都演得不俗，由少女都事業型女性演出有層次，好自然，證明選角真係好重要。

雖然外界評價很好，但對我黎講始終唔係我杯茶，呢套戲俾我感覺係好淡，好自然，係女仔會鍾意睇既題材，小品型電影，加上多日本取景，自然好評好多，我會多D睇愛情小品電影，因為我想吸收多一點感覺，多一點情懷，可能現在少了呢類電影嘛。

心動 Tempting Heart

監製：莊澄、蘇志鴻

導演：張艾嘉

演員：金城武、梁詠琪、莫文蔚、金燕玲、張艾嘉、蘇永康

片長：115分鐘

級別：IIB

評分：7/10

＜＜全力扣殺＞＞：主打林敏聰，沒有前作精髓皆因劇本空洞

郭子健導演算是我近年比較欣賞的其中一個導演，其一是他的作品很有個人風格，玩懷舊玩色調，往往有意想不到的演員參與，很有香港情懷的格調，算是難得一見有心做好電影的本土導演，所以他每有新作我都幾期待，今次呢套<<全力扣殺>>題材再玩偏鋒，係冇人玩過的羽毛球題材，實在係好大膽的嘗試，睇完後俾我的感覺係有心但整體未及前作，只算合格。

郭子健作品常見的色調很重，所以感覺氣氛風格很強，令套戲懷舊風出晒黎。

故事上其實係勵志再加有本土特色的東西：圍頭話。令成件事好香港，出發點係好，Mix埋去羽毛球題材都好新鮮，但我覺得劇本上有點空洞，睇的時候未夠投入，未有振奮人心的情節，係有少少失望的地方。故事發展主線在何超儀身上，佢發現左好似羽毛球的隕石襲擊地球，從而燃起再打羽毛球的鬥志，卻遇上一班大賊，有聾的鄭伊健，跛的梁漢文，弱視的劉浩龍，村嬸邵音音，點知班大賊想打羽毛球，於是搵何超儀再加過氣國家隊醉酒佬林敏聰做教練，再參加比賽，再遇上奸角鄭中基，於決賽上決一高下。我滿以為呢套將會好勵志，比賽連場，打得轟烈，點知唔係，冇錯，係仍然有日本懷舊風電影風格，使電影充滿勵志氣氛，但角色上俾唔到我感覺佢地好熱愛羽毛球，鬥志好激昂，好似係一班業餘好手打波浪費時間，每個角色其實可以提供每種唔同功能，但冇好深入發揮及敍述，係浪費左。我明白點解咁耐以黎點解冇人拍羽毛球，其實確實係幾難拍得好睇既題材，我就咁睇羽毛球比賽，好難拍到佢有好大既變化，打來打去都係靠不同走位，戰術，於是再加少少效果係羽毛球度，令畫面更豐富，但可惜睇一次可能覺得好睇，但重複幾次後就覺得唔夠豐富，推動唔到劇情的高潮發展，實在可惜，其實郭子健已經拍得唔錯，音響再加特技令到羽毛球比賽已不似我地平時睇開個D，但如果俾我揀我會揀拍快，不斷剪接，令比賽更緊湊，唔會好似佢咁無論係動作，打個下，甚至羽毛球，不停用慢鏡，我反而覺得冇咁緊湊成件事。

角色用上不同種類的人湊成一隊球隊，令每個人發揮不同作用，各有千秋，可惜冇好詳細去講，浪費左呢部份。

今次最搶鏡演員其中一個要數鄭中基，佢造型已經夠七十年代夠爆，再講圍頭話，又講粗口，雖然表現似暴龍哥同未及前作，不過已經係做得最好個個。

今次我睇的其中一個原因都是因為林敏聰，好耐冇睇佢，前段癲喪後段正經，真係有驚喜，未見過佢可以演到戲，做得唔錯。

演員方面，主線在何超儀，但佢一路俾我的感覺係會演戲但念對白好死板，感情欠奉，同埋個表情得幾個，好硬，今次都係，水準之內但未見突出。反而戲份奇多係林敏聰及鄭中基，兩者演得好好，笑點多落在鄭中基上，滿口圍頭話已經爆笑，舉手頭足學足晒，奸角並不奸而有良心，更見可愛；林敏聰前段癲喪，雖然以為佢會係最搞笑個個，最爆笑算是狂嘔鄭中基，原來笑點冇乜，後段更變正經，落場打波型爆，劇情推動都全靠佢，眾人都係靠佢既激勵而發揮作用，係全片最重要角色。其他演員如鄭伊健、梁漢文及劉浩龍水準之內，反而謝君豪演得不俗，佢演何超儀哥哥但又係滿口圍頭話，學足晒又神似，對妹妹個種關心及激動演得內歛，亦係驚喜之一。

整體而言，演員係演得不俗，但我覺得劇本上其實可以發展得緊湊一點會好些少，睇完都唔覺好激昂，期望下次會再有<<打擂台>>的精髓，個種熱血及奮鬥心，希望可以在將來日子延續落去。

全力扣殺 Full Strike

監製：袁偉鋒、馮瑋璋

導演：郭子健、黃智亨

演員：何超儀、鄭伊健、鄭中基、林敏聰、梁漢文、劉浩龍、謝君豪、邵音音

片長：108分鐘

級別：IIB

評分：6.5/10

＜＜狂野時速＞＞：鬥車行先 劇情次要

這系列電影我是從第6集開始看，然後再看第5集，再看第7集，雖然跳住睇，但我相信對劇情影響不大。我記得當年第一集上映時迴響不大，只知道係一套電影講跑車，鬥車，不斷有好多男人撩車鬥，然後有大量動作場面，點知原來呢套係用一個警匪片去包裝，即係主角保羅獲加係一個卧底渾入雲狄素班飛車黨去查案，點知最後友誼第一，放生雲狄素，查案失敗。故事極簡單，因為根本一開始大家都冇諗過睇呢套戲係睇劇情，我地睇既係飛車，到底點解要飛車？我地唔駛理咁多啦。

結局部份係雲狄素同保羅獲加鬥車，鬥到最後一刻係火車面前生死一秒，真係睇到手心冒汗，拍得好緊湊。

警匪片加飛車當然有呢D場面，緊張刺激，電影有多場戲係可以封晒成條路俾你去飛車飛來飛去，係拍得好睇的其中一環。

由呢一套開始，我地就開始見住雲狄素同保羅獲加的友誼，兩者不可以分開，亦都係觀眾對呢套戲的情意結。

話明鬥車行先，劇情次要，當然對主角的演技唔駛咁高要求，雲狄素當然唔識做戲，保羅獲加亦都做得唔錯，水準之內，其他角色反而只係大配角，過眼雲煙，奸角又極少戲，所以好難有發揮機會，無論如何，第一集算是好看，如果唔係，又點會有之後既續集呢？

狂野時速 The Fast And Furious

導演：洛高漢 Rob Cohen
演員：雲狄素、保羅獲加、佐丹娜布絲達、米雪露芝姬絲
片長：106分鐘
級別：IIA
評分：7/10

＜＜復仇者聯盟2：奧創紀元＞＞：人類是拯救及毁滅地球的創造者 真矛盾

當我看完這齣電影後，我真的覺得英雄特技片我看得很膩了，畫面雖是悅目和將無可能化成可能，但現在的我只會湊熱鬧去看特技片，不會再以有驚喜的心態去看，真的有如影評人所說：太濫了。今集仍然是好看的，因為仍然去用人性化去套入英雄處，使觀眾仍然覺得英雄也是人，有他的過去及難處，亦有感情，注重團結精神，沒太多個人主義，不過今集講的是壞人其實是主角創造出來，經過某些概念及歪理，再去反聯盟，然後英雄們就去拯救地球，整件事好像自己栽自己，自己救自己，真矛盾及諷刺。

對打部份看到我眼花撩亂，是越來越好看的，但或者快可以看漏特技的漏洞。

全片最好看一定要數中段鐵甲奇俠大戰變形俠醫，沒想過變形俠醫多麼好打，上天下海跟鐵甲奇俠勢均力敵，玩轉大街，多幕超誇張但看得很投入。

一開首的聯盟對戰都不容忽視，一氣呵成兼快慢鏡運用，有如身處其中一起戰鬥。

有數段篇幅講黑寡婦與變形俠醫的感情線，縱使外型不合襯及女神施嘉莉外型開始不復當年勇，但仍然看到他倆難離難捨的心情，美女與野獸的組合。

新加入的緋紅女巫很美艷，演出落力但對劇情作用不大，但我開始有少少喜歡她了。

新加入的快銀及緋紅女巫是令畫面更有快感及美艷，不過劇本提及他們的能力及幫助有限，浪費了她們的角色及能力。

由於人物眾多，所以要交代的劇情極之多，所以好多時我都未必明白，尤其最後那個新加入的終極強者"幻視”戲份極少，以為他很強，會跟奧創來一場世紀大戰，怎料完全跟普通人一樣，比任何一個復仇者聯盟更弱，浪費！其實觀眾看英雄片大多都不會理會劇情，只集中看打鬥場面，今集集中的角色其實幾少，鐵甲奇俠、美國隊長、雷神算是最多戲份，其次是變形俠醫及黑寡婦，其他角色如鷹眼甚至奧創只是一個大配角，角色多就是這個壞處。我總覺得奧創其實並不特別強及聰明，只是一個工具去毁滅地球而已，所以我覺得第一集比較好看，起碼劇本簡單一點，對打清脆點，沒有硬加情節去填充劇情，還有第三集，我相信未必會更好。

復仇者聯盟2：奧創紀元 Avengers : Age of Ultron

導演：喬斯溫登 Joss Whedon

演員：羅拔唐尼、基斯咸士禾夫、麥克雷法路、基斯伊雲斯、施嘉莉祖安遜、謝洛美維納、艾倫莊遜、伊莉莎白奧爾森

片長：141分鐘
級別：IIA

評分：7.5/10

＜＜翻生求職黨＞＞：追求夢想是不限年齡及資歷的，加油吧！

這是一個追求夢想的故事。兩男主角本是銷售員，在銷售期間自己公司突然倒閉，於是把心一橫兩人再闖一番事業，闖入Google公司再大展拳腳，怎料眾實習生都是年輕一背，最後並沒有氣餒，與年輕人合作期間擦出火花，於比賽勝出進入Google工作。非常勵志的劇情，電影部份加入少少鹹多多趣的情節及對白去令電影興趣一番，效果不俗，兩主角表現很好，水準之內，將盡地一煲玩大佢的心態演繹到位，兩個好朋友視對方如知己，所以對白有時會有點絕核，輕鬆又得意，與年輕人合拍下也見默契，不見造作，可能是兩位主角之前的作品下表現親民，形象討好吧。

兩位主角戲中雖和年輕人有代溝，但最後經過磨合而變成合拍伙伴。

兩位大叔做實習生顯然是格格不入，仍突顯了做人一定要有夢想，不介意被歧視，目標總會達到。

電影大多數在Google總公司實地拍攝，令觀眾大開眼界，夠誠意及說服力大增。

其實做人一定要有夢想，即使好像兩位主角般和年輕人格格不入，不過只要自己的意志夠堅定，不介意被人歧視及看低，目標總會達到的，自視過高的總會是最終失敗的，結局如此吧！所以我會提醒自己，現在雖然距離目標極遠，我相信只要我努力及堅持，老套都要說，最終一定會到自己想去的終點的。電影前段其實交代到拖長了一點，以致片長去到125分鐘，不過後段進入比賽後，情節開始有趣一點，還原基本步，驕兵必敗，努力者勝出，觀眾必Buy的結局。P.S.：中段的夜總會情節有點喜出望外，想不到這套勵志電影會有少少鹹多多趣的情節。

翻生求職黨 The Internship
導演：桑里維 Shaw Levy
演員：雲斯漢、奧雲韋遜
片長：120分鐘
級別：IIA
評分：7/10

＜＜黃金花大酒店＞＞：老了又如何，最緊要活得精彩，人生無憾

很少電影會是老牌演員擔正，所以對此我特別覺得這套電影應該會幾得意，有意思的一套電影，電影指出人老了，不需要介意老了做什麼都不能，反而可以活到老學到老，走到自己陌生的地方尋找新事物，了解多點自己所需，令自己的人生更無憾，其實人生應該這樣，接受其他東西，吸收一下反而令自己清楚自己想怎樣，會有另一種覺悟。

幾位老牌演員演出生動，活活地演繹各種老年人的喜怒哀樂，悲喜交集。

 電影在印度取景，所以觀眾可以見到演員不斷地在橫街窄巷中穿插，印度其實都有美好的一面，不只是貧窮，風景及人性其實很好，雖然印度有封建制度思想，竹門對竹門的議題，及為了錢而賣掉先夫的夢想等，當然最後受到外國旅客多番的提議及見解而得到啟蒙，將問題一一化解，皆大歡喜。我們可以見到印度其實正在努力發展中，要擺脫貧窮雖則極難，但他們也很樂意接受外來意見又不失自家特色，這一點其實好讓我們值得學習吧。

電影在印度取景，不斷見到演員在印度的橫街窄巷中穿插，拍下了印度美好的一面。

此外，老牌演員們的演技當然沒有地方可以挑剔，他們通通演繹了每個角色的各種不同性格，又不失自己挑皮的一面，使我們覺得他們很可愛，看得令人舒服，所以，這套電影是成功的。劇本的主旨固然是有意思，選角也很重要，若然換來一班不活潑而嚴肅到暈的演員，電影中的樂趣立即蕩然無存。

黃金花大酒店  The Best Exotic Marigold Hotel

導演：約翰麥登 John Madden

演員：茱迪丹慈、標歷基、迪柏特爾、湯韋堅遜、美姬史密夫。彭妮露葦頓、朗拿度比克、施妮雅艾美莉

片長：124分鐘
級別：IIA

評分：7/10