＜＜未來戰士：創世智能＞＞：致敬還是老本？永不完的故事是也

其實我都知呢套系列的故事將會不斷翻抄再翻炒，因為呢條老大水口真係可以長拍長有，長賺長有，一定有固定既支持者去睇（包括我在內），所以理佢故事有幾熟口熟面，有幾預料得到，只要有阿諾主演既未來戰士，自然會有人捧場，是向該系列致敬還是食佢老本，則見仁見智吧。我呢就係情意結，由細睇阿諾大，特別對第二集特別喜愛，故事及特技之遠見及厲害之處真令我難忘及驚嘆，所以我覺得冇一套未來戰士能夠超越到佢，包括最新呢一集。

一開始有李炳憲演的經典水銀液態機械人T-1000出場，但其實對劇情發展幫助不大，純粹致敬一下又俾佢做下又帶下角色關係發展咁，當然原版比較好，夠邪氣一點。

結尾極致敬，多場對打戲血第二集致敬，要鬧定讚我都唔知。 

一開始有第一集的阿諾機械人同今集的阿諾對打，特技真係偉大，真係做得好似，令多年粉絲的幻想呈現出黎。 

今集唔係唔好睇，只係因為多場熟口熟面既場口令我能夠預計得到劇情將會發展成點，今集最大突破係本身要消滅天網的戰士尊康納竟然變成奸角，反而被天網造成同盟，與主角們對抗，可以話係搵戲黎做，搵個賣點出黎引我地去睇，角色上的突破但演員的演繹並不突出，我感覺上佢只係變成今集的大壞蛋，並有任何更上一層樓既破壞性侵略，只係將天網發送去全世界，侵略全球人類，感覺好細件事，更加變成配角添。最後更變成屈機既磁粉人，係水銀液態機械人進化版，更屈機，可惜最後雷聲大，雨點小，都係靠爆炸去KO佢，不過如果唔係咁相信好難圓場吧。

積遜卡克演繹的尊康納係今集的一大突破，但感覺已變成配角了，最後變成屈機既磁粉機械人，吹脹。

今集阿諾久唔久就搞笑一下，有別於以往態度，其實我覺得未必使咁設定佢，好似龍五咁，不如一如以往，真係比較好D，要人性化佢，唔係要搞笑佢囉。

其實今集唔係太差，至少係好過第三集，今集其實算係情節緊湊，動作場口不斷，大鬧天橋及醫院一戰係幾好睇既，而且阿諾都幾廿歲人，但都演出落力，實在令我佩服呀！其他角色都冇乜特別，係女主角，演技幼嫩，勝在樣子真係似原版成人莎拉康納，亦肯去博肯露。今次我係去The Sky Vivo睇，即係尊尚影院，音響真係好勁，又坐得舒服，所以今次我都幾enjoy睇呢套戲，我都相信阿諾將會係咁拍呢個系列，因為片尾又真係埋左伏線呀嘛......

未來戰士：創世智能 Terminator Genisys

導演：亞倫泰萊 Alan Taylor

演員：阿諾舒華辛力加、積遜卡克、艾美莉亞卡克、積哥迪尼、J.K.西蒙斯、李炳憲
片長：125分鐘
級別：IIB

評分：7.5/10

＜＜迷你兵團＞＞：超級可愛 根本唔會理內容及情理

呢3隻黄色香蕉味Tic Tac糖真係超級可愛，我都有少少開始鍾意佢地，一來唔知佢地講乜野但又會明佢地講乜野，二來佢地既表情以及行為舉止真係好幼稚及低能，表情多多真係好鬼盞鬼，所以成場戲聽得最多係每個觀眾都會講：好得意呀！好低能呀！

呢三隻迷你兵團成為今集既主角，各有特色性格，左邊喜愛彈結他，中間做領袖，右邊低低能能拎熊仔，各有武器，鬧出唔少笑話，又唔會搞亂個樣，真係傻得好可愛。

為左生活，三隻迷你兵出國去到紐約城，過程得意但劇情有點不合情理及無內容可言，不過根本冇人會理啦。

今集新人物兼女主角好搶鏡，原因之一係粵語版搵左楊千嬅配音，極之配合千嬅既潑辣性格，入型入格，令人物性格更立體，令到情節有幫助。

其實劇情好簡單：迷你兵團想搵個壞蛋做Boss，點知搵來搵去唔係死左就係俾其他生物毁滅，於是三隻迷你兵決心走入紐約城搵Boss，搵左個壞蛋天后Scarlet，點知跟唔成反而自己做皇帝，便同Scarlet決一高下。講就好聽，其實成套戲只係見住迷你兵周圍走，做埋D戇居野逗我地笑，其實笑位好少，Scarlet為楊千嬅配音，入型入格，個種巴渣粗魯型烈女性格直頭係千嬅自己，所以幾搶鏡。另外，畫面方面都好細緻好真實，其實事至今日動畫已經可以做到零瑕疪，係科技既進步，所以好難挑剔，今次值得一讚。

呢D動畫其實睇完就算架喇，唔奢求會好好睇，亦都只求輕輕鬆鬆咁過呢90分鐘就算啦，畢竟呢D動畫真係主打小朋友嘛，呢次我睇既時候都想讚下班小朋友，算靜了，又唔會係咁郁，令我有個好享受既90分鐘，難得。

P.S. : 睇3D版既話臨尾有幾分鐘係為3D而設既，即係睇完字幕後會有場歌舞睇，好似迪士尼歌劇咁3D，我睇2D都覺得好3D啦。

迷你兵團 Minions

導演：皮爾哥菲 Pierre Coffin、凱爾巴達 Kyle Balda

配音：楊千嬅、林曉峰、鍾景輝

片長：131分鐘

級別：I

評分：7/10

＜＜STAND BY ME 多啦A夢＞＞：流淚及感動過後 永遠懷念親切的聲音

天時地利人和，但呢種天時我寧願唔要：叮噹配音員林保全先生剛巧係電影上映前因為病離世，此片就成為佢既遺作，真係好可惜。因為保全叔的聲音絕對係香港人的集體回憶，當然保全叔及叮噹係絕配，永遠唔可以分開，已經融為一體，配音去到呢個境界係香港真係唔多個，保全叔能夠做到呢點係真係大師級，了解到叮噹既個性同埋態度，先可以用把聲去演繹得出神入化，多元化既聲調更係賣點，失去保全叔絕對係香港人的損失，睇完呢套戲後，亦都更加感覺到保全叔好重要，配音界已青黄不接，我們只能夠從記憶及作品中找回我們熟悉而回味的聲音了。

講返呢套卡通片，好難得故事好成人化，冇乜小朋友既故事橋段，所以絕對岩大人睇。首先主要係講返最前線，大雄與叮噹遇見之前及點解叮噹要留係地球，係因為要幫大雄搵到幸福，幸福係咩？咪就係最後要同靜香結婚喇。大雄得到幸福後叮噹先可以返回佢既機械世界。故事多次會講大雄長大後會點，會繼續懦弱還是變強？長大後的大雄當然冇變，又唔靚仔，都係咁冇鬼用，但有兩場戲大雄真係長大了，亦都令我難得地感動，就係最後大雄單挑胖虎一戰及大雄勇救靜香一幕，有D想喊，係因為大雄真係大個喇，對號入座地如果係變成我咁，我會救我老婆嗎？我會驚嗎？我會做返齣好戲俾人睇嗎？大雄打驘胖虎後我真係好感動，係因為大雄要係叮噹臨走前做返個男人，令到叮噹能夠安心離開，佢兩個之間既情誼真係好深厚，依依不捨之餘都想為對方做一件事，證明自己，沒有帶著遺憾而離開，呢份心意觸動到我，正如我第時亦都會至少做返一件事令到我身邊既人或親人得到安慰：豪仔，你做到喇！得到人認同及令到人無憾亦係我呢世人離開之前一定要做到既事，希望我可以吧。

叮噹及大雄之間既情誼非筆墨能盡錄，呢份情誼係現今社會好難再有，既單純又真挈，何處有？

長大後的大雄勇救靜香一幕既振動人心，原來大雄都會大個仔，肯為一個人做一件事，證明每個人其實可以好強。

就係呢幕我係好想喊，大雄真係好為叮噹，為左佢被胖虎打到殘都仲要堅持，為朋友呢個心感動到我個心，唔捨得都要去實行，大雄，你好野！

叮噹首次用3D去製造，第一個感覺係唔靚，好怪，反而冇左親切感，睇慣平面突然轉做立體，成件事要重頭適應過，人樣確實一般，但我知已經做到最好，始終3D已經係大趨勢，要習慣吧。至少有兩場戲係為3D而設，就係前段進入時光機場口及大雄與叮噹係未來世界裡追逐戰，我雖然唔係睇3D，但都感受到個種快感，應該會幾刺激，不過睇叮噹電影最緊要開心吧。

呢場追逐戲擺明係為左令觀眾睇3D更加刺激而設既，的確係既驚險，好似平時去樂園玩遊戲咁款。

今次真係最成功的一次叮噹電影，講真，如果沒有保全叔的影響力，我相信都未必有咁多人肯入場睇，莫講話票房去到4千幾萬，1千萬都未必有，有時，就係時勢造形勢吧。

P.S.: 保全叔，永遠懷念你。

STAND BY ME 多啦A夢

導演：八木龍一、山崎貴

片長：95分鐘

級別：I

評分：8/10

＜＜皇家特工：間諜密令＞＞：打！打！打！ 拍到打機咁打 好爽！

呢套戲係賀歲檔期時上映，我就Miss左，結果係呢次日本旅行去個程時係飛機睇左，真係好可惜冇係戲院睇呢套戲，真係幾好睇，有別於一貫特務片格局，有打有笑位有反傳統，不停咁打，又打得鬼咁流暢，好似打機過關斬將咁，睇得好爽！呢套戲好似係漫畫改編，聽聞漫畫入面已經係幾暴力個隻，所以我都好驚訝呢D戲竟然有斬手指劈友血花四濺既場面出現，亦都係咁，不論係場面設計同埋人物造型都好漫畫化。

冇睇過哥連費夫拍打戲，仲要係偽一Take過既連打場面，以一殺百，極度有型！

新星Taron Egerton一開始極之有型一Take過由二樓跳落地下一幕驚為天人，之後變成特務又型仔，幾搶鏡。

係，我都係幾膚淺架，只要套戲冇冷場係咁打，仲要覺得一Take過又難拍又流暢又爽快就會覺得好睇，當然我都會睇埋主角及臨時演員既演技，因為呢個偽一Take過係需要全部人既配合先可以完成，荷李活就係勁在呢度，臨時演員都可以好好戲，交足功課。當然哥連費夫都好有型，一把遮已夠殺，何必動刀槍呢？當然最後估唔到咁快被槍決姐。動作場面樣樣有，爆破槍戰功夫武器，所有特務片必備既元素都有，所以點會有冷場呢！

講完動作場面，講下劇情，一開始其實既反傳統，特務竟然可以咁輕易被殺，仲要係俾鐵腳斬死，係幾新鮮既情節；之後就講返傳統野係特務A見到同伴的兒子游手好閒而又犯罪，於是就免佢一死之餘仲推薦佢做特務，於是展開特訓及考驗，雖然最後考試失敗，但最終話晒都係主角，點都有個理由令佢做到特務既，仲要報仇添，故事其實好簡單又預左，所以我都冇乜理，因為已經俾所有流暢動作場面吸引住，仲有少少咸多多趣既情節（結尾部份Taron成功救了公主，當然會有好好的報酬吧！）好似有第二集，應該值得期待既。

皇家特工：間諜密令 Kingsman : The Secret Service

導演：馬菲域肯 Matthew Vaughn

演員：哥連費夫、Taron Egerton、米高堅、森姆積遜
片長：129分鐘
級別：IIB

評分：8/10

＜＜熱爆MADAM＞＞：陳年舊橋 勝在幾好笑

呢類戲其實係荷李活真係好多，條橋真係用到爛，主要係講一個係自以為聰明，知識廣博，屢破奇案既FBI靚女特工；另一個係冇好修養但有個人Style去破案，用不正常方法去對犯既肥差婆，典型既一肥一瘦，一個正一個衰，一對所有野有強烈對比既拍檔，開始由冤家到最後變好姊妹，呢個劇情大大話話用左幾廿年都仲用緊，唉！編劇們真係江郎才盡，新鮮感只係演員配搭同演出吧。

珊迪娜片中有不少拋胸鏡頭，有部份更係笑位，同密實既肥婆瑪莉莎有強烈對比，係亮點之一。

珊迪娜真係豁出去，浮誇表情又做低能動作去搞笑，同瑪莉莎有火花作用，的確係驚喜之一。

慶幸尚算好笑，原因係又係個肥婆瑪莉莎再做同類型角色，潑辣巴渣夠辣夠粗魯，好多笑料都係佢，珊迪娜都有驚喜，未見過佢豁出去做喜劇，可以用浮誇及表情多多去由正經既FBI去到玩到癲喪既不正常差婆，轉折位好到，佢亦都做得好，兩位演出有火花，後段被脅持個段幾爆笑，好似睇緊<<功夫>>咁。片長足兩小時，前段要交代故事發展及人物背景所以比較拖長黎做，之後緊湊返，亦都笑位多左，冇悶場，不過再有呢類型既電影既話，又再係瑪莉莎既話，真係會覺得好悶架。

熱爆MADAM  (The Heat)
導演：保羅菲 Paul Feig
演員：珊迪娜布洛、瑪莉莎麥卡菲
片長：120分鐘
級別：IIB
評分：7/10

＜＜賤熊2＞＞：正經的熊是不好看的

上半段還算好笑，係因為要秉承上集賤熊既賤格抵死既一面，點知後半段變左正經既法庭戲，即刻心裡打左個突，好悶呀！我地想睇係賤熊會再幾抵死，而唔係正正經經去同隻熊講人權，呢個咁嚴肅既社會問題好唔適合呢類本身要抵死賤格既片種，唔Work的。結果我有訓到覺，因為真係悶到訓著。

係，開頭賤熊歌舞Opening做得好好，節奏感強再加賤熊抵死既舞蹈演繹，係睇到手舞足蹈，之後再有抵死偷精不成功，食陽具煙，掟銀仔入屁股罅等，最搞笑既係賤慼同麥克華堡大鬧精子房，倒瀉人地精子仲要入晒眼食晒咀，賤熊仲要影相，呢個真係玩得好絕；誰不知之後見到賤熊著住件老西講人權，呢個反差係始料不及，變成唔好笑又鬼死咁正經既人權法庭戲，我呢個膚淺既人都係睇返第一集笑笑下就算喇。

開首的歌舞Opening拍得好好，歌節奏感強，賤熊舞蹈又抵死，睇到人賞心悅目。

賤熊同麥克華堡大鬧精子房係全片最搞笑既一幕，玩得好絕好盡。

睇唔慣賤熊著住老西去講人權，同我想像我要睇既賤格抵死賤熊有好大出入，所以覺得好悶。

賤熊2  Ted 2
導演：薛夫麥克法蘭 Seth MacFarlane
演員：麥克華堡、薛夫麥克法蘭、雅曼達施菲、謝茜嘉芭芙、摩根費曼、里安尼遜
片長：116分鐘
級別：IIB
評分：6/10