＜＜玩轉腦朋友＞＞：令人值得深思的動畫作品

本身冇諗住睇呢套動畫，因為睇表面唔覺得有咩吸引到我入戲院睇，點知上映之後睇到朋友們同埋影評一致讚好，話好有意思同埋深度既一套卡通片，值得入戲院睇，口碑咁好冇理由唔入場支持下架，呢排終於有時間睇，結果我睇完同各人既感受一樣，呢套野真係好睇，好有意思呀。

由左至右各有不同特色既情緒，狂躁既阿躁、誠實既阿真、開心既阿樂、驚青既阿驚、憂愁既阿愁，不同顏色代表不同情緒，好清晰地分辨出唔同特質。

每個人心入面都有唔同既島嶼，代表了每個人有不同劃分經歷，有多有少有古靈精怪有特別，呢個Concept好好，島係人一手一腳去興建，正如人既經歷及技能都係自己一手一腳去創造，喻意深重。

故事係講人的其中5種情緒，有狂躁、誠實、開心、害怕、憂愁，不同情緒有不同既演繹方法，有不同既處事方式，以開心為領袖，去操控一個叫韋莉既女仔由出細到大個左後每日生活上所面對既事情及對朋友家人既相處，點知有一日韋莉同家人要搬離住開既地區，要去到另一個地方繼續生活及讀書，更要同唔係夾開既同學仔打冰上曲棍球，事情產生變化，加上代表憂愁既阿愁想表現自己，當佢接觸到記憶球就所有處事方式都會變得用憂愁既態度去解決，代表開心既阿樂為左令韋莉長期開心地生活，就禁止阿愁去接觸任何野，點知有一次阿愁搞左個大頭佛，同阿樂被吸入長期記憶區裡，操控不到韋莉，令到韋莉失去了呢兩種情緒，所以要設法入返總部，阻止韋莉離家出走。

故事其實唔算係一般大路動畫片格局，不過就有小朋友既情懷，喻意做人要快樂地做人，不論有其他負面情緒存在，最終開心地過生活就係做人的宗旨，大前提係你係將快樂放係第幾位，呢一套動畫將開心做領袖就係要我地睇完後得到反思，做人最緊要開心囉。但去到結尾部份，又利用了阿愁去解決最終問題，得到家人既體諒同埋理解，所以縱使阿愁係負面情緒，都總有用的一個時刻，所以每一種的情緒都好重要，別輕視所有的重要性，人有七情六慾，失去其中一環真係會即刻變成不正常人呀。

王菀之配音既阿愁襯到絕，笑位準確又不失可愛，選角好重要。

片中出現的乒乓係韋莉既虛擬人物，即係人類既夢想，中段乒乓犧牲自己亦正如我地人類在現實中都要為生活而放棄自己既理想，永遠藏係地底，一語中的。

動畫離不開親情，呢套都宣揚親情的重要，縱使女兒有幾唔聽話，生活有幾艱難，還是一齊生活落去最緊要，共同進退。

香港配音版都配得好好，尤其係王菀之配音的阿愁，真係襯到絕，無論係個角色既特質及態度，以致語氣都將阿愁聲演活出黎，笑位又準確，或者阿愁係大部份人既寫照，特別有代入感以致笑聲連場，王菀之係電影上既發展真係好比音樂上暢順得多。

至於畫功方面，仍然係無懈可擊，細緻度超級精細，眾情緒的皮膚組織的毛幼細度好高，頭髮亦都好靚，人物都好可愛，全片顏色鮮艷，人類更係幾可亂真，真係好利害。可以利用小朋友既公仔去講大人既故事，呢套動畫真係可以俾好高分，亦都令我有深思既作用，值得一睇再睇呀！

P.S.：如果俾我揀我係屬於邊種情緒多？次序我相信係：驚青->阿愁->阿真->阿樂->阿躁啦應該。

玩轉腦朋友  Inside Out

導演：彼德托達 Peter Doctor、朗尼狄卡文 Ronnie del Carmen

配音演員：林二汶、王菀之、蔣志光、蝦頭、許紹雄
片長：102分鐘
級別：I

評分：9/10

＜＜烈探狙擊＞＞：靚佬湯又能人所不能 玩晒啦

靚佬湯既電影我比較少睇，因為我總覺得佢D戲都會講到佢幾咁勁，能人所不能，好似神一樣乜都知乜都識，死極都死唔去，我睇呢套戲主要係因為係警匪片，我對於警匪片情有獨鍾，就睇下佢有幾咁勁，幾咁先知，加上呢套戲係湯告魯斯同導演基斯杜化麥哥利既合作，岩岩又睇完職業特工隊5，睇下前作比較先。

故事一開始講有個殺手遠距離殺左6個人，現場留低左唔少證據，但班差佬諗唔到所以野有咩關連，只知道疑犯俾左個名差佬：當然係靚佬湯，於是搵下靚佬湯究竟發生咩事，靚佬湯其實本身係士兵，亦都有強勁既軍事知識，咁岩女主角係個律師，靚佬湯眼見個女律師不惜一切覺得疑犯係無辜而為佢辯護，靚佬湯就越諗越多疑點，就用佢畢生既智慧同埋經驗越查越深入，最後搵到後黑手，殺光晒佢地添，自己就少少擦傷咁囉。

積哥迪尼做的殺手係有型，但唔夠格又冇料到，最後同靚佬湯雨中打鬥不堪一擊，之前又講到佢殺人有幾勁幾咁高手，配角到連重要戲份都沒有，係咪應該要講下佢既背景或者殺人既部署及過程呢？

耍帥係湯告魯斯既拿手好戲，但並不代表無時無刻都要耍，今次已經係鮮有佢拎槍場面，反而佢講多過做，可能咁先顯得佢勁同用腦。

開首的殺人場面係拍得幾好，沒有音樂，沒有對白，只有屏息既環境聲音，就能夠感受到殺手既殺人氣場同埋心跳既倒數，利用瞄準器做鏡頭，觀眾可以一齊去跟殺手一起進行殺人計劃，一齊睇下邊個會死，令到觀眾一齊去緊張，呢一場無疑係拍得好。

正當以為係一部好型同埋另類既警匪片，當靚佬湯一出現，所有野變返正常普通警匪片，佢能人所不能之下，所有疑點涉及過咩人同埋背後既關連及陰謀，佢都好似好快就掌握一切，打交又勁過李小龍咁，一打五傷都傷唔到，真係勁到冇朋友。

好，就當我當係一套漫畫片咁睇，點解班奸角講到好似好勁咁，去到結尾只係坐定定俾靚佬湯隊冧咁，真係勁冇腦，個二五仔警察更係無拿拿變二五，又唔解釋清楚就俾人一槍搞掂，勁兒戲；幕後黑手坐定定係度講原因然後被殺更係無稽，呢套戲後半段真係扣左唔少分數，之前點樣佈局點樣精密設計真係嘥氣，最嚴重既係呢套戲真係講多過做，導演想利用對白去交代案情及調查過程，結果換來大部份時間都係男女主角兩者之間既猜疑及估計去吹水居多，想睇動作場面其實真係好少，會少少失望而回。

整體而言，呢一套戲我係有少少失望，我唔介意湯告魯斯有超人般既查案能力及好打得，案情複雜而令到男女主角落力調查之下得到好多結論，係幾精密既，點知後段部份奸角們廢到不堪，任由靚佬湯處理生死，好似神一樣，我寧願再花多少少篇幅去講奸角們部署了陷阱俾靚佬湯，還掂佢地都知靚佬湯本身好難搞，點解唔整鑊杰既佢嘆呢？

女主角露莎蒙碧姬中後段開始不斷Show身材，令到我一邊看字幕一邊看佢身材，很吸睛眼但好似對劇情沒大幫助，況且佢個樣偏成熟，唔通要靠身材去令到觀眾留意女角，點解要咁做呢？

烈探狙擊 Jack Reacher
導演：基斯杜化麥哥利 Christopher McQuarrie
演員：湯告魯斯、露莎蒙碧姬、積哥迪尼、大衛奧伊羅、李察贊堅斯、羅拔杜維
片長：130分鐘
級別：IIB
評分：6.5/10

＜＜雙城故事＞＞：友情抑或是愛情行先？

呢套戲係我7月由日本搭飛機返黎個程時看的電影，我係好想睇返個時既小品愛情電影，係因為我成日覺得故事會簡單易明，大多數都同日常生活有關，一定能夠接觸到既經歷，加上個時電影夠直接，道理顯淺，又肯出埠拍片，有靚景有靚場佈置有好演員有好劇本有好多失去既地方及回憶都可以睇到，呢一套都值得一睇的。

結尾部份講曾志偉患糖尿病等死，最後煽情地完結，唔覺老套，都覺得有點感動，曾志偉亦都做得好好，抵拎影帝，呢D都係陳可辛既功力吧。

電影用上譚詠麟及曾志偉既真名去塑造角色，似度身訂造，一個做歌手，一個做癡情仔，亦都係因為佢地兩個本身係超級老友，令到戲中呢個關係更加有說服力，令觀眾投入感大增，係加分位。

電影故事好簡單，譚詠麟係間酒吧做樂手，一次機會下臨場頂替做歌手，點知發掘到佢唱歌好既一面，加上曾志偉回流香港，搵返冇聯絡好耐既譚詠麟，兩個本身已經稱兄道弟，友情要好；曾志偉識了張曼玉後墮入愛河，更帶佢去見譚詠麟，點知反而令到張曼玉愛上譚詠麟，更發展成為情侶，令到曾志偉心酸但又要面對老友，之後更得到糖尿病等死，最後三人友情依然，明白係勉強冇幸福及認命既大道理。

友情抑或愛情行先？面對好似譚詠麟呢個問題，確實係好難面對同解決，人始終係自私既，俾我都會諗左愛情先，我都相信係你既就係你既，如果大家真心相愛，根本冇可能有任何理由阻止到我地一齊，我亦都相信作為朋友既佢地都會明白呢一點，勉強真係冇幸福。若然我真係讓愛而最後你地都分手收場，反而得到反效果，人們常常講要順其自然，係冇錯架，亦都唔係呃自己，有好多野好多感覺都係一觸既發，冇得祈求亦都冇得逃避，愛情既魔力真係好鬼大，大到連友情都可以掩蓋就知啦，唔使問，愛情一定會行先，就友情有幾好都係咁話。

呢套戲係陳可辛第一次執導的電影，功力十足．果然係信心保證，佢既作品一直都係簡單直接既愛情故事，亦都好中我地既心靈，好真摯，即使今次只得三個演員，亦都好用情景同對白去塑造一段真摯而又唔老套既三角關係，係功力既表現。曾志偉做得好，當年拎左金像獎影帝係實至名歸，果然係演有病既角色一定奪獎，佢做呢個癡情仔真係好到位，面對友情既得著及愛情既失敗都演得有層次分明，我地都好同情佢愛情失敗，想去愛又得唔到愛既矛盾係睇到我心酸既，亦都好令佢鼓舞係佢得到呢份友誼，係好難得既事黎。譚詠麟角色上純粹做返自己，度身訂造，所以冇咁搶鏡，張曼玉都水準之內，幾靚。

呢套電影既成功亦都因為出埠拍，靚人靚景一直都係屈機，必會覺得好睇，感覺浪漫D，大製作D，品味亦都大大提高，成個感覺係會唔同的，加分的，佈置上亦都有心思，好精緻亦都好有地道Feel既傢俬及擺設，呢D戲我係好鍾意睇，睇得出每個位都很用心，誠意之作。

P.S.：電影主題曲＜＜一生中最愛＞＞真係好貼題，戲歌合一，聽落份外有感覺及心酸。

雙城故事 Alan & Eric : Between Hello & Goodbye

監製：曾志偉、陳可辛

導演：陳可辛

演員：譚詠麟、曾志偉、張曼玉
片長：106分鐘
級別：I

評分：8/10

＜＜蟻俠＞＞：另類英雄片風格 有趣搞笑

英雄片真係開始拍到濫晒，當然呢條線係無止境啦，因為一定有票房，所以任何有關英雄既漫畫必定去改編成電影，今回輪到蟻俠，我對佢既印象真係零，直情未聽過，但睇完Trailer之後就覺得應該幾得意，單單係個背景已經覺得有趣，原來一個人好似蟻咁細既時候，唔好睇小佢，力量可以有無限量之強大，同做人一樣，甚有意思。

蟻俠得意在可以從另一角度去睇人類既生活，極小既身體存在一個更大既世界裡面，雖然危險但更加發揮到更強既力量，穿越更多罅隙，去到更多意想不到既空間，係幾有趣既情節。

身體雖小，但更能為身邊人做到更多事，係做蟻俠既最大意義，做人亦一樣，別看小自己，力量可以發揮到極致。

男主角本身係一個賊，放監出黎之後諗住洗心革面唔再做賊，點知為左啖氣，唔可以衰俾個情敵睇，又俾班損友唆擺，於是重施故技去做賊，點知原來係俾人裝偷左件制服，被迫做蟻俠去偷另一件戰衣，結果當然係俾奸角識穿，然後奸角著上戰衣同蟻俠決戰，最終奸角當然會死，蟻俠又將會有幾套續集添。

故事其實好多英雄片都係咁，都係有個奸角唔知做咩實驗然後為左利益然後自己變身做大壞蛋，男主角必然係傻下傻下著上戰衣然後有強大力量，再去對付壞蛋，美國英雄漫畫就係咁，要有變化就係拍攝技術上有所不同。今次用上輕鬆搞笑既手法去拍，有好多Tricky位又真係幾得意幾好笑，因為蟻俠最大發揮係身體變細，所有野變大，於是可以利用呢一點而去拍好多好得意既野，例如見到人類變巨人；螞蟻變戰友；Thomas火車變危險品但去返真人角度係一架車仔，Thomas變大後又巨大無比拆屋咁濟等等，好多好玩既野都睇得出創作人今次想黎個突破玩創意及扭轉一貫英雄片既拍法，反而觀眾都睇得開懷，接受得到，唔會再睇完覺得好沉重個隻，呢個突破好成功。

末段呢場Thomas火車大戰黃蜂戰衣真係好得意，用蟻既角度同用人類既角度去睇真係有好大反差，做成好多幽默位，創作人當然別有用心地去創作呢類Tricky位，突破成功。

美國英雄漫畫例牌奸角最後都有套戰衣，呢次黃蜂戰衣係幾有型，呢次奸角算係可以打下，唔同某幾套英雄片既奸角咁流。

蟻俠都係人，父愛氾濫，做女既又心水清，又係宣揚父親可以為子女做任何事都可以好盡既大道理，幾時都係一條Storyline及重點所在。

演員部份，今次起用一班名字不太熟悉既演員去做，識既只有米高德格拉斯，就係因為咁先覺得好睇，因為佢地可以豁出去點做都得，冇包袱，我相信如果用上班知名演員去做未必做到一D喜劇效果，今次男主角保羅活特之前做過特警新人類大茄，今次被選中做蟻俠，我相信將會一套成名，豬籠入水，好彩係因為佢其實個樣沒咩特別，身型又偏矮，戲都一般，不過就係因為咁就適合左做蟻俠啦；女主角我覺得好醜樣，仲要下集佢應該係重點人物，我反而冇咁期待佢既演出啊！反而配角出色，男主角身邊的三位三傻好搞笑，各有特色，搞笑位多數源自佢地，功不可沒。

整體而言，今次的蟻俠算係成功，拍得畫面好豐富秀麗，影像色調斑斕，幽默位都好到位，動作場面流暢力量勁，好多場口都好得意，係略嫌有時對白太長變成廁所位，不過其他場面都彌補返晒，蟻俠：值得一看。

蟻俠 Ant-Man

導演：奇雲費治 Paul Rudd

演員：保羅活特、米高德格拉斯、伊雲祖蓮莉莉、哥里史托
片長：116分鐘
級別：IIA

評分：8/10

＜＜光豬舞壯士＞＞：悶．．．我是預期去看跳舞架嘛！

呢個題材開頭睇個名係有興趣去睇，仲要係三級片，心諗一定係淫淫地而又係搞笑既戲啦。上映個時已經知道好多人睇完都要界櫈，係因為說教味濃，講多過跳，甚至係冇咩好睇，一D鹹濕野都冇得睇，係唔明點解要三級，所以我個時冇去睇，直至今年上映第二集，我先去睇下點解咁多劣評都可以有第二集，結果，我相信外國人同我地去睇真係唔同，第一集，真係唔好睇。

舞壯士們的幾場跳舞係拍得好有氣氛，不過竟然唔係電影重點，跳舞戲份好少，失望。

話明舞壯士，咁重點應該放係跳舞之上，幾場跳舞戲係拍得好有氣氛，好似睇緊Step Up咁，音樂感幾強，加上有多位肌佬傾力演出，同女演員做出多場意淫既動作，可惜每場跳舞時間極短，更加同劇情關連不大，好似係突然加插既一場表演，只見一班女人對住一班肌佬大嗌，班肌佬又毫無尊嚴但又好興奮地收住錢地去除褲除衫跳脫衣舞，但電影又冇去講班佬點解要去跳，跳舞背後又唔講任何既辛酸，好似講到除衫跳舞賺錢好易又唔使尊嚴咁。好喇！跳舞戲少，教仔做舞壯士著墨又少，馬修演的班主所謂的教新仔做舞壯士易過借火，好似天生做舞壯士既材料咁。

成套戲都都見到女人大叫，不斷塞錢入男人袋裡，但男主角們唔覺冇尊嚴而好開心咁，又唔去著墨去講跳舞背後既辛酸，好似講到賺呢D錢好應該好易咁。

其他既戲就係一班佬同班女行黎行去，坐係度講生活，臨尾男主角更加要加插為左女朋友而放棄舞壯士行業，真係極度夾硬黎，為左去結尾而結尾，成套戲睇完唔覺睇完左咁，可能根本冇劇情可言，真係唔明點解會有第二集。

演員方面，由於個個都係大隻佬，而大隻佬個個樣差唔多，係馬修我先認得，男主角我都係去到中段先知係邊個，係因為完全冇性格上既分別，導演應該從角色上既性格去發展各位舞壯士既心路歷程而再發展舞壯士既職業生涯發展，觀眾先投入到舞壯士們既生活上或感情世界上的矛盾，而唔係就咁拍幾場跳舞戲再加幾場只講對白而悶場連連既場口去交代劇情，要明白呢類戲觀眾係想睇鹹濕野，想睇跳舞，想睇角色的變化而去演變劇情，通通都冇，可能我既要求錯掛，又或者外國人去睇呢件事係咁睇，唯有咁解釋囉。

光豬舞壯士 Magic Mike
導演：史提芬蘇德堡 Steven Soderbergh
演員：卓寧泰坦、阿歷斯彼迪化、馬修麥康納希
片長：110分鐘
級別：III
評分：4/10

＜＜職業特工隊5：叛逆帝國＞＞：套套如是 難有突破的劇情

我睇呢套戲其實係為左睇動作場面，係因為我本身鍾意睇，一來我當然覺得係緊張刺激啦；二來係我覺得呢D戲好難拍，要好有合作性先可以拍得出咁厲害既場口，就想睇下拍出D咩黎；三來就係既然我睇左咁多套動作片，就睇下仲有咩突破，仲有咩可以拍得到；結果我就係係第三點呢度停左一停，諗左一諗，睇完呢套戲後，真心覺得荷李活動作片真係舊酒新瓶，套套如是，所謂的設計場口係就係刺激，但包裝過後都係還完基本步，劇情果真千篇一律，我們雙眼係被蒙敝的。

今集的宣傳賣點係開首呢一幕，靚佬湯徒手揸住機門飛上天，其實又係攞黎搞又誇張既情節，亦都配合Mission Impossible個名，算你過關。

第二個誇張攞黎搞既倩節係靚佬湯要跳入大水池去換個人資料，呢個又係為Gimmick而拍，首先大前提，咁如果本身我要搵個個人既資料，咪要下下潛水落去換？唔太MAKE SENSE了。不過，係拍得幾好既，流暢。

例牌菜追逐戰，又係揸住架車橫街窄巷穿梭，再加多幾部電單車飛黎飛去，又可以曬靚景，例牌緊張又死唔去，會唔會覺得幾熟口面呢？

靚佬湯親自上陣騎住架電單車係高速公路車戰，純粹耍帥但又帥得起，飛車都拍得很好，最緊要快，夠狼。

其實今集既動作場面唔算太多，但設計得好，夠深刻，可以分三場，第一場係一開始個徒手揸機門飛上天，諒你都唔會加插呢條橋入套戲度，但呢套可以，因為特工片；第二場係跳入大水缸換資料，明知搵戲黎做但又幾刺激，心諗點拍架呢場戲，Camera點樣係水中跟住演員走呢咁；第三集係摩洛哥橫街窄巷追車戰以及公路飛車，拍得好，夠快夠狼夠型。基本上睇完呢三場戲可以唔理其他，我主要目的都係睇呢D，理佢咩反職業特工隊，叛國，又有個大奸角為左要錢而創造組織出黎去管治新世界，然後又要脅持某個人然後去達標咁，最後奸角又好愚蠢地跌入陷阱然後被捉，其實成個故事都離不開呢D熟口熟面既情節，尤其呢D特工片勁類似，同之前個幾集大同小異吧。所以有時我都覺得開始悶喇。

Rebecca Ferguson係今集既亮點，我覺得佢好Sharp，亦都好靚又索，又博又打得，幾Like佢。

劇情既然東拼西拼，倒不如留意一下演員，靚佬湯依舊型佬，演技就依舊一般，丑角西蒙柏奇今集戲份好多，主要為電影搞笑一番，緩和氣氛，做得幾好幾可愛，恰如其分。至於女主角選了莉碧嘉費格遜(Rebecca Ferguson)，岩晒我，肯博又打得，樣都幾靚又索，演技就唔錯，今集做了全片最中心的人，能夠貫穿全片人物，重要角色之下幾搶鏡。不過又係敗在奸角，又係講到有幾高智有幾不擇手段，最後咪又係放過Rebecca，跌入人地陷阱被人捉，把聲又沙戲份又少，又係動作片既弊病。

總言而之，我對於現今的荷李活動作片其實仲有興趣入場睇，只係眼見劇情千篇一律，電影始終最重要係一劇之本，即使動作場面有幾誇張有幾Gimmick有幾大龍鳳，故事猶如垃圾又翻兜，觀眾都係識睇既，點會再放過你俾好評呀，第六集有既話希望有D突破啦。

職業特工隊5：叛逆帝國 Mission Impossible 5 : Rogue Nation

導演：基斯杜化麥哥利 Christopher McQuarrie

演員：湯告魯斯、謝洛美維拿、西蒙柏奇、莉碧嘉費格遜
片長：133分鐘
級別：IIB

評分：7/10

＜＜未來戰士2018＞＞：似睇戰爭片 皆因機械與人類永不完地戰鬥

呢套似係實驗性電影，試下唔用阿諾做主打，用外傳形式去講未來戰士故事，結果全片用盡戰爭片元素去包裝下，同原本未來戰士既故事及理念好似唔太關連。故事由第二男主角尊康納出發，佢仍然係反抗天網既核心人物，反抗軍中的領袖，一直處於同機械人戰鬥既苦況，一次行動遇上被改造成機械身人類心既卡爾雷斯，卡爾要知道自己變成咁既真相，於是同䔿康納一起殺敵，搵出最大陰謀及主腦，當然最後都係唔會完結啦，機械人同人類既戰爭沒完沒了。

今集沒有阿諾，變了森禾霍頓做機械人，被改造後變成人性化的機械人，處境係矛盾，但冇機械人既智慧，只有人類既盲勁。

今集既機械人亦只有驅殼，打人係超大力，但唔知為乜咁，感覺好似只係安排佢地係奸角，係結尾亮相就當係有關連咁。

其實我覺得今次故事發展真係一般，主要講尊康納，但又唔係講佢同天網既關係，反而加多個新角色去戥腳，搵戲黎做之下，就屈佢同機械人有關，就係變成機械人喇，跟住又係對抗，又係同機械人博鬥，重複又重複既橋段，睇落有時都幾悶，因為呢套戲我覺得冇左個主旨，見到一班戰士係咁戰鬥，為乜？為左打敗天網？成場戲冇乜講天網喎，只見不斷地同機械人打，動作場面唔算多，講多過打，當戰爭片睇又唔夠緊湊，好似兩頭唔到岸咁，自問對戰爭片有點抗拒，真係有時會好悶，講戰略，若果未來戰士變成戰爭片，好似唔多岩，講人性之間既鬥爭，點解天網可以自我意識後就同人類對抗，可能講得通D。

全片色調陰暗，可能想加重電影內人類既絕望及無助，但咁做真係好易令人眼訓，咁暗，個個人又差唔多樣，幾辛苦架。

全片動作場面不多，基斯頓惡鬥機動電單車算係有睇頭既一幕，如果諗住睇動作片既人一定失望。

基斯頓比爾做尊康納，唔係佢做得唔好，只係唔太夾，可能佢做蝙蝠俠太深入民心，叫佢去打仗又唔太似，佢講野已經唔係好清楚，佢做領袖唔太有說服力，不過，佢演得唔錯既。森禾霍頓演的機械人其實有冇演技都冇所謂，因為發揮不太多，間唔中同女戰士談下情又得，跟住同機械人打又唔使點去演，不過我就覺得佢同基斯頓火花唔夠，可能始終主線分得幾散，主旨唔夠集中。

整體而言，以戰爭片去睇呢套戲可能會覺得唔錯，但作為未來戰士故事既延續，就唔算話十分好看，似搵戲黎做，甚至有點兒悶，其實呢個系列完左會唔會更好呢？

未來戰士2018 Terminator Salvation

導演：MCG

演員：基斯頓比爾、森禾霍頓、拜絲黛麗候活、凱倫寶鹹卡達
片長：115分鐘
級別：IIB

評分：6.5/10