＜＜優獸大都會＞＞：故事正經具反思作用 黃子華救了全片

呢套動畫本來冇興趣，係因為有黃子華配音，算係有諗過下不如睇下啦咁，睇完後覺得故事冇咩特別，都全靠黃子華具神韻的配音，挽救了這動畫欠缺歡樂性而且好正經的劇情，我覺得呢套動畫細路仔真係未必會睇到哈哈大笑，反而係一部有反思作用既動畫，背後的歧視及合作精神係一個好好的教育意義。

阿樹係動畫爆出黎既一大亮點角色，角色動作慢到爆炸，然而笑點盡出，非常搶鏡，我睇完都好鍾意佢。

配音的黃子華及容祖兒就有如狐狸夥拍兔仔的唔襯配搭，欠缺火花，容祖兒唔係配得唔好，但好似欠缺互動性，反觀黃子華係配到好似同你對搭等你比反應咁，並且有靈魂。

故事講述兔仔住係一個草食環境中，一日佢要去一個城市當警察，要去一個弱肉強食既世界，並且被父母洗腦話狐狸係最奸最陷害佢地城市既一種動物，令兔仔有戒心，點知佢發現疑似疑兇既狐狸，大家惺惺相識，發現案中有案，於是合力查案，誓要揭發背後的真相。

故事格局係非一般細路睇開既嘻哈劇情，而係大人要思考既劇情，呢個係好事黎，一D有深度既動畫係值得欣賞，然而呢套算有深度，背後的意義係動物與動物之間需要互相信任及合作精神，不存在任何歧視之下才能和睦共處，世界才少了一絲煩惱及罪案問題。

背後這宏大的理念在於現今世界裡已經好難再搵到一個人值得相信，因為現今世界太多壞人及古惑野，太多問題存在就有個芥蒂係度，人與人之間既相處更見疏離，點解？皆因科技發達起黎，所做的事甚至更瘋狂的事都可以做到，既然呢個世界咁多呢D不信任的問題存在，呢套動畫所反思既理念更值得人類去思考，兩個不相關既動物都可以互相信任，更結合一班看似奸但其實善良既動物一起緝兇，呢件事最荒謬係動物做到而人類做唔到，人類有性都做唔到，可見人類比野獸更具獸性，這動畫意義深長。

看完這動畫後，不自然地會覺得既然可以用本身古惑既狐狸做本性善良既主角，去顛覆一切傳統理念，我地人類點解唔可以顛覆政策上一直以黎既荒謬及傳統，去改變傳統才有新火花才有新事物去反思，呢套動畫教了我地人類，做人做事需要有膽量及團結。

優獸大都會 Zootopia
導演：Byron Howard、Rich Moore
配音：黃子華、容祖兒、劉玉翠
片長：109分鐘
級別：I
評分：7/10

＜＜CIA光碟離奇失竊案＞＞：高安兄弟欠神韻之作 畢彼特係亮點

高安兄弟導演的作品我都好期待，因為每一次的題材都好得意好新鮮，可以好癲可以好荒謬可以搞笑，但今次我就有少少失望，我覺得佢地想做一套黑色幽默電影，而且係荒誕絕倫，可惜我覺得呢套冇左高安兄弟作品既神韻，笑又唔係好笑，係荒謬但唔精彩，過於平淡，明明有幾個巨星去拍，但拍得咁既質素，全靠班演員未至於太難睇，係期望過大吧。

畢彼特今次拋開靚仔包袱，豁出去做一個古古惑惑既健身教練，立即渾身是戲，舉手投足都可以好笑，未見過佢咁瘋狂既一面，係電影一大亮點。

佐治古尼演出正常，做返佢平時口水多過茶既本色，及後帶有點喜劇感都拿揑得好；至於女主角法蘭絲麥杜曼做得好好，將求愛及女性愛靚而不擇手段既本領發揮得好好，演出自然且具說服力。

故事講尊麥高維治的中央情報員被降職後開始寫關於中央情報局既回憶錄，演佢老婆既蒂達史雲頓想同佢離婚，同時發現了佢老公寫緊既回憶錄，諗住拎走資料從中獲利，點知係健身室唔見左都唔知，被健身室的職員發現再從中勒索，最後卻係弄出鬧劇，資料最後沒有公開，各知情人士都得到利益及應得下場，將中央情報局的資料長此收埋。

其實劇本係玩得過，可以玩得好過癮，點知我睇睇下發現唔太對路，平淡得很，可能美式笑話我未必懂聽，將一單失竊案變成勒索再變成一單兇案係扭得好，但變唔到一個有趣既電影，有趣點在於一眾演員演出，畢彼特可以放低靚仔型男包袱，肯豁出去好跳脫地演出狡猾健身教練，確係一大突破。女主角法蘭絲麥杜曼繼<<FARGO>>後又一亮眼演出，佢演一個愛靚及求愛的女人發揮得好好，演出自然且具說服力，為達到目的不惜一切，主片主導一切，其他演員卻演出常，但去到結局部份真係嘆左一聲：下？咁就做完喇？沒有大排場的結尾，沒有好扭橋既結局，只用上幾句簡單既對白去交代光碟下落及眾人下場，真係好慳皮！

估唔到電影會有呢類少少鹹既場面，但唔覺笑點係邊，反而覺得令電影即刻CHEAP左

整體而言，高安兄弟今次玩得唔夠過癮，好似有包袱咁冇去到咁盡，幽默方面我可能不懂欣賞，只覺得一班演員演得好好，靠佢地充撐電影，未至於太失望，雖則集懸疑喜劇荒誕於一身，但唔到肉就達不到精彩既水準吧。

CIA光碟離奇失竊案 (Burn After Reading)
導演：高安兄弟
演員：佐治古尼、法蘭絲麥杜曼、尊麥高維治、蒂達史雲頓、畢彼特
片長：96分鐘
級別：IIB
評分：6/10

＜＜功夫熊貓2＞＞：劇情較鬆散 動作場面較遜色

先睇第三集，然後睇第二集，再希望之後有時間睇埋第一集，倒敍式咁睇動畫都好少可。先講呢一集，唔算太好睇，相信呢一集跟第一集分別不大，都係有一身好功夫既熊貓對抗敵人，再同班戰友鬧出笑話，不過呢集主要講阿寶身世，故事極為鬆散，令到我投入度減了不少，然而，動畫卻不太多動作場面，主要都係兩場戲，而且奸角毫無霸氣，對我黎講，呢集唔算好睇。

今集會講阿寶係有一次機緣下係街被假隻鵝執返黎，仲左唔少篇幅去講阿寶點黎，阿寶好想知道過去同埋因由點解被遺棄，不過情節唔太集中，久唔久講一講，唔得連貫。

奸角係隻孔雀，毫無霸氣，招數唔多，又唔詭計多端，最後更係雷聲大雨點小不堪一擊，係其中一個敗筆。

故事係講奸角孔雀沈大師為左控制中國，於是利用煙火作為武器，但自己卻被預言將會被黑白間戰士消滅，於是便先發制人下令要殺晒所有熊貓。而岩岩成為龍戰士既阿寶得知呢件事後不敢鬆懈，準備迎戰，更多得朋友相助，了解到更多自己既身世，最後一同聯手消滅了孔雀王。

劇情其實都幾鬆散，觀眾期待可以睇到更多動作打鬥場面，可惜主要只有中段及尾段，而且動作戲並無推進劇情發展，原因係故事流暢度欠奉，久唔久講下身世，又久唔久又講下點樣對抗敵人，觀眾可能會感到納悶多過精彩。雖然係彈，但都有讚，畫面依然係做得好，充滿中國色彩，用盡中國元素去玩場景，武器及角色，對於西方國家黎講對中國文化咁有認識確係值得我們去欣賞。

動作場面不多，呢場於中段出現既街頭追逐戰唔太刺激，以快打做主力，但欠真實感，幸好佢地將中國元素盡眼前，係另一加分位。

最後阿寶只係將火球變成絕招，毋須任何半頭交但又能輕易用火球殺敵，係完全唔緊張高潮下，只係變成小朋友玩泥沙既打鬥。

角色方面，其實最敗筆既係奸角點解要用孔雀？毫無霸氣，欠缺奸角應有既氣勢及神韻，感覺好細成件事，而且實力又唔算好強，最後的火燒連環船都係得啖笑，或者對於荷李活的人覺得好新鮮，未試過有角色係孔雀，而且仲係奸角，係大膽嘗試但唔見得有幾好。

整體而言，我係睇左第三集之到第二集，由於第三集的畫面及劇情上都有不俗既效果，難峟即時比較，第三集玩得夠放夠誇張，動作場面倍增，講到尾論娛樂性第三集較好，睇動畫其實最緊要娛樂性吧。

功夫熊貓 2 (Kung Fu Panda 2)
導演：Jennifer Yuh
配音：陳奕迅、何韻詩、成龍、房祖名
片長：90分鐘
級別：I
評分：6/10

＜＜接近無限溫暖的藍＞＞：同志戀愛其實有種莫名其妙的深愛 更傷更深

早前上映的<<Carol>>好評如潮，兩女角演出有極好讚賞，雖然我未睇，但我第一時間就即刻諗起呢套<<接近無限溫暖的藍>>，呢套長達三小時的同志片於早前康城奪大獎：金棕櫚獎及雙影后。當然焦點係放係兩女主角幾場既超激床上戲，更事先張揚係打真軍演出，如此的宣傳效果卻引起各界及觀眾關注，係呢個時候我終於可以睇下呢套戲有幾咁勁，係我睇戲既日子裡又好似未睇過女同志片，睇完之後，我覺得呢三小時完全唔覺得長，而且我更能代入左女主角Adele既內心世界，各種矛盾及掙扎令到自己失去方向，皆因愛得太深，繼而傷得更深，女主角Adele每一個鏡頭都見到佢既喜中帶悲，悲中帶傷，確實演得很好，去到結局更有如佢般心有點兒不舒服添。

因一次的街頭邂逅，便一見鍾情，找對了方向，確定自己同性戀取向，而且愛得快樂，愛得轟烈，這種愛情來得不易，繼而好好地珍惜，而我亦都好嚮往得到這份愛。

多場肉博戲赤裸裸地展現係大銀幕上，非常震撼，兩女角演出非常落力及投入，因為佢兩個之間那種愛，才做得出之間好轟烈的行為，作為藝術片係需要用呢D場面去表達個種意思，而且導演拍得激而不淫，係高手之作。

Adele最後傷了Emma，得不到心中的解脫，每日都活在悲傷之中，每一個鏡頭都捕捉佢表面沒事但內心悲哀既表現，尤其係浮係海上的一幕，拍得極之唯美，海水更呈現Emma藍髮的藍，表達出Emma係Adele既心目中永不磨滅及消失，傷得極深。

故事係講Adele係一個普通既中學生，每日都上學返學，有一晚跟男同學發生關係後卻得不到任何快感，佢開始懷疑自己既取向。一天，於街頭邂逅了藍髮的Emma，兩人經過眼神接觸後，便感受到對方彼此存在了一份無形的愛。一晚，Adele特登去了女同志吧，意圖搵返Emma，點知真係遇到，從此相愛起來。後來Adele及Emma見到彼此對方疑似存在另一伴，Adele一時心煩而唔知下一步點做之下卻暗交了另一男伴，從而辣興Emma，分手收場。Adele傷心欲絕，雖繼續沉醉工作，擔任教師，可惜生活中永遠無法忘記Emma，最後約見返Emma，了解到彼此生活有變，再不能起的時候，只好接受現實，離開對方。

故事其實好簡單，但卻用上足足三小時去拍去描述兩人之間既感情，唔覺長之餘亦都能隨住佢地既發展同時間感受到佢地既愛，導演用上好多生活上既支節去加強佢地之間有幾愛，有幾互相欣賞對方，為對方做一些開心事情，更用上大量超激床上戲去表達。先係女主角Adele與男角既超激床上戲，兩人全裸做得落力，但卻表現到女主角的冷，得不到滿足感，係一種好清楚而狠既手法，到後來兩女用上數十分鐘去演的床上戲，對比之下得到無比快感，兩者之間的分別高下立見，女主角係享受同性戀，以藝術片黎講，床上戲係需要去表達某種情感，但要去到咁赤裸裸既時候，我就覺得呢套戲係用得恰當，咁先表達出兩人如何深愛對方，係無條件去愛，導演拍得激而不淫，乃係高手之作。

Adele做得好好，基本上整套戲都係由佢做出發點，所以每個鏡頭都係佢，每種情緒佢都應付得好好，百感交集既表情於每場戲都不慍不火，非常精彩，後半部的悲傷情節更係演技大解放，眼淚狂流更感受到佢心裡的痛，隨著結尾部份睇住佢身影在街尾慢慢變細，睇到佢最後都要變回獨自一人，個種冰冷感立即形成。當然Emma都做得好好，好型，佢係做主導個部份，整場戀愛佢都係做主動，Adele往往做弱者，最後痛罵Adele真的很傷，超慘！

唔知點解，我覺得女同性戀之間其實係有種莫名其妙的愛，個種愛往往比男女，甚至係男男都會愛得好深，愛得更轟烈，皆因女女之間的情係可以去到難以至信既境界，而係我地男生無可能知道及了解的境界，由此片我更感受到女同性戀之間存在得更多真愛，少了計算愛得簡單，愛情不是就是應該簡單嗎？少了猜疑，少了計算，少了挑釁，愛得純愛得真才能長廂廝守，那麼簡單那麼好，為何在現今社會很難找到這種愛？全因人心難測，人的心本是複雜，根本不能存在簡單的愛，簡單的愛根本不能得到人心的重視，複雜的愛才使人的心及腦想去應付它，有經歷才珍惜愛吧。

接近無限溫暖的藍 Blue Is The Warmest Color
導演：阿必迪拉堅志澈 Abdellatif Kechiche
演員：愛黛兒顏茜彩寶露絲、蕾雅絲端
片長：179分鐘
級別：III
評分：9/10

＜＜白宮淪陷＞＞：屈機冇腦 拖時間零劇情 喔！

近期上映的<<白宮淪陷2之倫敦淪陷>>口碑好似唔錯，不停炸不停爆，完全冇悶場，可能係吸收左上集令覺得好多低智及兒戲既劇情及情節後，第二集就密集式去爆，咁咪變返好睇囉。好，講到呢度，就睇返第一集，其實荷李活片有極多電影玩盡白宮，炸白宮，但玩得好唔好睇真係好壞參半，最好玩當然係火星人玩轉地球，不過呢套擺到明炸白宮，救總統既戲，真係玩得極兒戲極低智，男主角謝拉畢拿有如甄子丹，一個打一百個都冇所謂。

謝拉畢拿職責原本係總統身邊既特工保鑣，奈何一次意外令佢信心盡失，不過之後靠經驗以一敵百，屈機到無倫，傷又唔太傷，打機咁打到打大佬都無所謂，反正佢最後一定救到總統出黎，非常離地既動作片。

故事係講謝拉畢拿係總統身邊既特工保鑣，因為一次意外導致總統夫人身亡，便耿耿於懷，使自己失去信心而選擇調去文職，一天，恐佈分子突襲白宮，要捉總統，於是謝拉便再次身陷險境，誓要救回總統出來。

劇情真係會好簡單咁講出黎，因為成套戲都冇劇情可言，只見一班人向住白宮同班人射槍，然後入去捉總統，跟住首領用左好長時間拎個三個密碼，但明明人已經捉晒但可以用半套戲時間拎個三個密碼，跟住保護白宮既人通通死晒，係死淨謝拉一個，於是一個打一百個人，甚至連出賣佢既人都睇通睇透，試問仲有咩可以難到佢，之後又會聯絡到參議長去攞料，跟住又會搵到個地牢殺敵，何其容易！呢種離地情節真心覺得編劇當我地低能，班奸角更係無腦，拍到咁都可以有第二集，勁！

奸角搵來韓國人，極似方大同，不過沒戲可言，陰謀都不見影響深遠，更不見佢係高智罪犯，更拖長時間奪取密碼，何不逐一威嚇，要婆媽逐個講一大輪先？

動作場面係主打，但都有唔少特技，但流到爆，爆白宮但滿地木板，真係R爆頭，成班罪犯襲擊白宮但好似小貓三四隻，老實講就算俾你拎到密碼你都冇命出到去啦，成班人圍住你架大佬！

咁係因為美國人愛拍摧毁美國既自嘲電影，長拍長有，但都有分高低之流，呢套一定係流個隻，首先明明射爆白宮，但最後外貌又好似完整無缺咁，牆上只有幾個CG子彈窿，但入面就爛到七彩，但爛還爛，點解會係通地木板碎，而唔係石屎，莫非白宮係木板砌出黎？第二，點解所謂的罪犯首領可以咁仁慈，花咁多時間講一大輪野只係為左個三個密碼，但班人明明都捉晒，但又唔逐個問，又唔威脅，只係同參議長個班人對話，咁捉個總統把鬼咩，最後咪又係總統分付各人講出個密碼出來，晒鬼氣！第三，我可以相信謝拉畢拿一個打十個，但我唔相信佢可以乜傷都唔覺有，同伴想殺佢又可以講一大輪野先行動仲要俾佢察覺到，呢個低能劇情係動作片通病；第四，點解襲擊可以冇人向外埋伏，咁出面班人等咩？點解唔入去埋伏，既然又冇乜敵人，使驚佢幾丁友咩.......

總言而之，呢套戲真係可笑，一個謝拉畢拿玩晒成套戲，總統冇用就梗，參議員班人又冇鬼用，唔曉部署差佬又好飛虎隊又好入去突擊，我作為觀眾，只好當睇緊一部唔使用腦既動作片就夠了，更不用理會任何演技，況且劇情發展都估到晒，不如睇埋第二集仲好過啦，世界唔用腦既人何其多！

白宮淪陷 Olympus Has Fallen
導演：安東富卡 Antonie Fuqua
演員：謝拉畢拿、阿朗艾格、摩根費曼
片長：119分鐘
級別：IIB
評分：6.5/10

＜＜功夫熊貓3＞＞：說教的了解自己 發揮了少林足球X龍珠的精神

首先係亦都係冇睇過頭兩集，不過我認為呢類卡通片唔睇之前幾集相信唔好影響到呢集既劇情。以第一次去睇呢類卡通片既心態去睇係唔同D既，所有野都係第一次去感受同接觸，首先見到成龍有份配音，我竟然唔會太討厭佢既演繹，仲覺得唔錯添，其次係卡通片內能將中國唔同既元素注入動畫內而不太獻媚，既好玩又具哲理，係難得一見融合得黎好睇既作品，當然我睇完會覺得其實佢係一部少林足球X龍珠既動畫吧。

阿寶最後得到啓發得到神龍一般既力量去對抗敵人，就有如龍珠入面既悟空一樣使出龜波氣功，其元氣力量凝聚以致使出真功夫都係向龍珠致敬環節，對我黎講好有共鳴。

動畫主題都係講父子親情，父親眾裡尋子咁都俾佢搵到個親生仔，然後帶返佢去熊貓村說教如何做回自己真我，說教味幾濃，但具意義，好多人都只被名譽蒙蔽，卻失去自我，最親的人才能帶出走自己心中的框框吧。

故事係講阿寶做左龍戰士後得到眾人既愛戴，諗住自己係天下無敵，而且天下更見太平，點知有個叫阿凱既牛魔王強勢突襲，同時間阿寶跟親生父親相認，強敵在近阿寶要增強自己實力，便跟隨父親遠赴熊貓特訓及了解自我，眼見自己同僚及師傅一一被阿凱收服，便聯同一班熊貓村既同伴一齊訓練，一齊對抗阿凱。

動畫一貫荷李活卡通片風格及作風，主角由一個黃毛小子被訓練成力量很強既人然後集結大家力量去打敗敵人，從中得到教育意義及人生道理，令到小朋友睇得開懷係一向冇得輸既情節，今次處理得好可能其一有前兩集打底易入屋，其二人物得意及具中國元素，以我地香港人黎睇特別有共鳴感。其實搵返自己心中的我好難，係好需要周邊的人扶持及發現或加許，又或者親人才會睇得更多，始終佢地係生你出黎個個，無論你有幾大佢地都會擔心有一天會失去你，所以不斷說教教你點做人，點做事，一來可以將自己既精神傳授俾你，以感染其他人得到無價既擁護及愛，二來又可以不停跟自己子女生活，以免自己擔心及睇到子女成長，係件好事，因此我好明白做父母之心，睇完呢套卡通片感受更深吧。

奸角好明顯係用西遊記中的牛魔王做藍本，仲用了中國精玉石去放在吸收靈氣之道具，係真正將中國元素發揚光大既一環，外國人將佢玩到既得意又不老套，係我地要學習既地方。

始終人係要長大，要面對社會上各種問題及強敵威脅，總不能夠長期被父母照顧吧，於是有了阿寶這個龍戰士，學懂一切招數就要出外面對問題殺敵，做人亦都要一樣吧。總不能似阿寶咁只懂一招夾指甲就打天下，所以才有之後得到阿貴既啓發，得到如神龍般既力量，侊如另一個階段成長咁，於是打造出如龍珠般的打鬥。

動畫語重深長，係做動畫其中一個幾有意義既，眼見尾段見到如少林足球般萬人練武，發揮中國功夫精神，場面壯觀且具氣勢，得到外國人既重視而去打造呢套卡通片，中國功夫的確威水。

動畫畫面方面都做得好好，好細緻及華麗，尤其打鬥場面的爆破及如仙般既背景，都好鮮色好靚，熊貓們及其他動物角色都做得好有特色，各有性格，鬼馬又得意，不得不佩服做動畫的人既技術高超。

配音方面，陳奕迅配的阿寶好落力，語調有高低起伏，發揮到阿寶本身既性格，又跟得上阿寶節奏，值得一讚；而成龍配兩個角色，主要係配阿寶父親，合格有餘，只係每次佢一講"阿仔"唔係第一時間諗起阿寶，而係諗起房祖名吧。

基於今集水準不俗，我相信會再有第四集，呢個系列應該會長拍長有，又可以打入中國市場搵大錢，外國人製造呢個商機真係有頭腦，不過確實係幾好睇既。

功夫熊貓3 (Kung Fu Panda 3)

導演：亞歷山度卡路爾 Alessandro Carloni、余仁英 Jennifer Yuh Nelson

配音：陳奕迅、成龍

片長：95分鐘

級別：I

評分：7.5/10

＜＜洛奇第5集：怒火龍拳＞＞：拳擊同爛仔交只差一線 還是終結它罷

其實老實講我只睇過第一集，係因為<<Creed>>我先再睇洛奇，我係預期左續集永遠不會好過首集既心情去睇，冇咩大不了既，只係越冇期望自然睇得順眼多點，點知黎到第五集真係出事，真係唔太好睇呢集，講傳承，講拳王後期生活，講教識徒弟冇師父，講親情，總之例牌菜大包圍，話晒睇住洛奇既成長，都預左佢唔會有太多動作場面，係要跟前幾集有所分別，於是講下人生哲理，同埋教授徒弟，以洛奇精神延續落去，不過發覺都唔係個回事，所以拍到呢集先冇再拍落去了。

講精神傳承，不斷回帶記返洛奇自己點樣利用呢種精神去將強敵一一擊敗，係冇野講搵野黎講，但事實係係情節上未能發揮得好好，所謂哲理只係腦海記憶，而未能係比賽中融合得黎，只能夾硬融合於生活中，表面得黎又唔夠有深度。

今集都有重點放係洛奇之子身上，有徒弟所以冇時間放係親兒子身上，以致兒子學壞都唔知，理唔到，及後弓無拿拿醒覺，感情加深左，冇伏線有鋪排但冇高潮，而唔感動，不過兒子都做得幾好。

電影故事係延續第四集洛奇決戰完蘇聯機械人後，發現自己不停手震，原來係日積月累而成既暗病，老婆見狀就勸佢脫離打拳生活，去第二個地方過正常生活，可惜拳王永遠係屬於擂台，洛奇只好在新地方開設拳館延續打拳生活，有一天有個後生仔前來拜師，洛奇見佢咁有誠意於是接受，點知最後教識徒弟冇師傅，被金錢利益所誘，誓要挑戰洛奇拳王之名銜，以博取拳王所帶來的榮譽。於同時間又要照顧成長中的兒子，為免佢學壞，洛奇顯得進退失據。

劇情係多線發展，不過得唔到平衡，仲有D鬆散凌亂，電影主線其實放左係洛奇與徒弟之間的事情，然而洛奇收徒弟都幾兒戲，只係聽個後生仔幾句說話就收左，而且徒弟外型都唔討好，演技都欠奉，其實呢個角色都幾好發揮，可惜佢做唔到中間個轉變，由一個零既人再到乜都有既心態我真係睇唔到，選角失敗令到戲味不太濃，所以到最後個師徒決鬥我先有爛仔交之感，唔似將擂台搬落街頭既感覺，而洛奇角色設定上已變成有暗病的人，所以擺到明唔會好多打鬥場面，令到史泰龍主要只需講對白就夠，由於佢演技都有限，只能靠佢演的洛奇去說服我地，更安排佢同兒子及老婆多場內心戲，可惜都見唔到佢有幾唔開心幾咁愁。

結尾部份係於擂台放係街頭上，師傅決戰徒弟，但變成街頭爛仔交，好與唔好睇真係只差一線，呢個就唔好睇了，原來拳擊跟爛仔交無異，都係死纏爛打。

電影延續第四集，就無拿拿講洛奇老了，有暗病，而老婆不斷婆婆媽媽叫佢退出，搬去第二度過新生活，成條線非常婆媽，一個唔甘心，一個太關心，對白之多使觀眾覺得長氣。

其實都黎到第五集，要講既野都好龍統，其實故事結構上有好多發揮空間可以發展，例如父子之情可以有更多空間去講，可以講兒子終於出事洛奇先至醒覺，而兒子在新學校裡如何被欺負，而唔係街頭被兩條0靚仔搶錢就當係；兩公婆之間我又覺得又唔需要講咁多生活上既苦惱，唔使用咁多對白去講；師徒之間如果在結局部份係擂台上打會更有意義，未知是否想唔同定唔夠錢既關係，於街頭打鬥感覺得件事好兒戲，導演處理得唔好先浪費了咁多好內容去拍，其實呢一部可以拍得更好。

演員方面，其實可以不用多說，要講都只能講做兒子的演員做得唔錯，內心既不憤及渴望得到父親關懷既心情都交代得到，不過做大人既演員就演技一般。其實史泰龍的洛奇角色都可以有好發揮，因為講好多內心感受，包括打拳精神，傳承後得不到徒弟擁戴，暗病纏身等等情況，但只見史泰龍都係咁既表情，大聲講野，噢！唔見得洛奇有幾愁有幾咁Down。

幸好，及後的<<洛奇：王者再臨>>經過歲月既洗磨，史泰龍歷盡滄桑，演得使洛奇角色更立體，有如史泰龍=洛奇感覺，有時候係要靠時間及情意結才有感受，史泰龍都係咁演個角色，點解我地會覺得近期佢演得好？係因為我地都覺得史泰龍好有心，仲有團火去演戲，而洛奇亦有呢顆心去將打拳精神蔓延下一代，所以才能靠<<Creed>>勇奪金球獎最佳男配角，雖得不到奧斯卡，但係我地心目中史泰龍演洛奇，已經奪了男主角獎了。

P.S.：演徒弟的Tommy Morrison於2013年愛滋病逝，RIP。

洛奇第5集：怒火龍拳 (Rocky V)
導演：約翰艾衛辛 John G. Avildsen
演員：史泰龍、泰利亞斯雷、Tommy Morrison
片長：104分鐘
級別：II
評分：6.5/10

＜＜洛奇第4集：龍拳虎威＞＞：美國係最終王者 好老套

適逢史泰龍飲恨男配角獎既電影<<洛奇外傳：王者之後>>既上映，都係時候重溫一下洛奇系列既電影，今次主要重溫最後個兩集，其實呢個系列第一集之後已經冇咁好睇，故事發展真係為拍而拍，黎到第四集係史泰龍自編自導自演，自然更顯自己對於呢個系列有幾重視及情意結，既然係自己編劇，當然要拍到自己有幾威有幾皇者地位無人取替，今集故事實在老套，大大宣揚美國主義，好睇與否，我們做香港人的當然沒有共鳴，但要拍套電影去講自己國家先係王者，肉麻程度實在高處不勝寒。

前美國拳王挑戰失敗慘遭毒手而死，洛奇為佢報仇而重踏擂台，呢個老套而簡單情節已充份表現了洛奇地位及實力之高到無倫，個種情義心重既情緒濔漫係美國社會之中，人人都讚好。

史泰龍肉搏廿幾年後的轟天猛將拍檔度夫龍格爾，其實係幾有睇頭，兩個大隻佬有身型又夠高，可惜兩者演技欠奉，只能齋睇動作先夠滿足。

故事極度簡單，蘇聯派左選手黎美國挑機，前美國拳王眼見蘇聯人目中無人於是接受挑機，於擂台上慘遭毒手身亡，洛奇眼見好友下場咁慘於是重踏擂台為友報仇。

真係一句講晒成套戲，既簡單又易明，呢類唔使用腦諗既劇情通常都係系列電影後幾部會出現的，所以多數冇晒第一集既熱血及神髓，亦都係唔識見好就收既通病，不過整體呢集都話未至於難睇，無論係剪接方面及流暢度都算合格，雖然未至於感人，而且犯駁位幾多，故事估到，然而電影卻宣揚大美國主義，最後宗旨係美國才是世界第一，片中的隱喻如蘇聯的大國無論有幾強大，都不會動搖到美國係世界一哥，無其他國家既人可以威脅到，雖然我不太清楚當年既政局問題，然而去到今時今日美國仍然係去做任何事都會覺得佢地先係世界一哥，而且佢地的確係任何地方都做得比其他人優勝及資源充裕，這是不爭的事實吧。

後段史泰龍夾硬安排自己去外地特訓，跟大自然融合訓練，要令我地覺得佢好辛苦好用心咁對侍比賽，個無人所不能既態度出發點係好，又有晒景作用，而佢同度夫訓練過程既剪接技巧卻係值得一讚，有對比及見證二人訓練成果。

無拿拿加個機械人做大配角，可能係顯得電影要追上潮流及進步，但角色設定上對劇情發展作用不大。

電影由史泰龍自編自導自演，因為要兼顧多方面製作，感覺上佢呢集裡既演出其實不多，而且動作戲於後半部份出現，大多行行企企講兩句，演洛奇又駕輕就熟，表現中規中矩，而奸角就係廿幾年後合作轟天猛將既度夫龍格爾，此大隻佬真係零演技，幸好今集佢係演好好打既機械人，零演技都可以接受既。

整體而言，今集第四集真係好簡單，完全唔使用腦去睇，好快就睇咁既感覺，不過於劇情上其實好老套，暗喻美國主義充斥全片，好肉麻，而且係史泰龍自己搞晒編導演，少不免自戀一番，但整套戲未至於差既，只係睇完唔會太記得個隻囉。

洛奇第4集：龍拳虎威 (Rocky IV)
導演：史泰龍 Sylvester Stallone
演員：史泰龍、泰利亞斯雷、度夫龍格爾、伯特錫
片長：91分鐘
級別：II
評分：6.5/10