＜＜移動迷宮：焦土試煉＞＞：劇情薄弱 緊張刺激依然 謎團留待下集

基於第一集實在幾好睇，好緊張刺激，亦都對於一堆謎團好有好奇心，於是追睇第二集都無可厚非，同時亦都唔好諗續集一定差過首集既宿命，去用睇第一集既角度去睇，幸好，今集都仍然係幾好睇，照舊緊張刺激，不過仲有好多謎團未解開，亦都未提到，整體真係冇第一集故事情節咁豐富同埋懸疑味重，今集純粹動作冒險行先，以官能刺激做主打。

今集男主角Thomas單天保至尊，全片只以佢做連貫人物，戲份超重而其他配角冇乜發揮機會，冇上集咁多群體戲咁熱血。

眾主角由迷宮逃出來但再又困於世災殺署既範圍之中，逃走情節固然緊湊，但冇乜解釋到呢個殺署背後目的及計劃，相信要睇埋第三集先知。

今集故事係講眾主角於上集終於逃離移動迷宮，以為可以避開世災殺署既實驗，回到正常生活，點知原來去到另一個地方又係殺署既看管範圍，男主角得到另一同胞既提點及懷疑，男主角用機智識穿殺署陰謀，再次逃離呢個地方，進入焦土，該地方有好多噬獸及荒蕪，眾人要經過呢個地方而前進去後山搵班反殺署既人幫手對抗，最後點知殺署知道眾人所在地，要再一次捉晒眾人去進行實驗，男主角及小眾人擺脫到殺署後密謀反殺署。

全片人物係好多既，但真正對劇情有幫助既得幾個，所以一定唔會混亂，前半段好出奇地好似睇緊喪屍片咁，班喪屍亦都好嚇人好強勁，可以跑得好快同埋可以係日頭出沒，使情節更加緊張刺激，可惜，當我地不停咁睇住班人不斷跑不斷叫，我地好似遺漏左劇情上既發展，冇錯，前半段係冇乜劇情可言，只係睇住眾人點樣對付班超核突既喪屍，雖然冇劇情但都拍得好精彩，氣氛凝造得好，觀眾亦都睇到手心冒汗呢。

今集有好多Wide Shot，睇到好多電腦特效做左荒蕪城市、基地、路程有幾遙遠等等，好驚嘆地做得好宏偉及仔細，值得欣賞。

主角們其實都做得唔錯，只係一班配角冇乜戲可做，只得男主角及女主角叫做有得做戲，戲冇得講就講下特技，有多場Wide Shot睇到荒蕪地方，即是焦土，做得好宏偉好仔細，多場驚險場面都在焦土發生，令到成件事好大製作，值得一讚。

電影冇冷場絕對係好事，起碼我睇個時都覺得：乜咁快做完喇！我亦都知道一定有第三集，因為這個改編故事本身已計劃拍成三部曲，所以臨尾留下伏線都好正常，不過係都要老屈一個主角做二五仔，老屈一個主角被捉返去殺署然後主角誓死救返佢出黎，呢D估到既情節係老套，但亦都係令到人想追落去既好橋段，第三集我一定會追的，因為呢個系列的確題材幾吸引，又拍得幾好，真的值得一看的一個系列。

移動迷宮：焦土試煉 Maze Runner: The Scorch Trials
導演：韋斯保 Wes Ball
演員：戴倫奧拜恩、李基洪、卡雅史葛拉迪奧、湯瑪士桑斯特
片長：132分鐘
級別：IIB
評分：8/10