＜＜情迷月色下＞＞：從欺騙得到愛情 能欺騙自己去愛誰？No Way！

故事發生在一九六幾年既歐洲，飾演大魔術師既哥連費夫受到朋友既邀請，諗住去識穿一對看似可以通靈及預知未來但其實周圍呃人既母女，哥連費夫大感興趣，覺得呢個世界上都可以根據科學去解釋常理，所以絕對冇可能有第二個世界既事物甚至通靈既回事，可惜事與願違，反而被愛瑪史東先發制人，能夠睇穿哥連既往事及一舉一動，當中佢地因日久生情而彼此產生了感情，可惜哥連最終都搵到證據揭穿愛瑪原來老早就同朋友夾埋呃哥連，不過欺騙了自己但欺騙不了自己既感情，真的愛上了愛瑪，但愛瑪要同有錢仔結婚了.....

愛瑪史東演的通靈少女到處呃人，哥連費夫就要拆穿佢西洋鏡，中間彼此產生了愛情，劇情簡單易明，易入口既小品。

活地亞倫的電影真的很引人入勝，故事簡單易明，情節更能產生共鳴，今次劇情真係好簡單，雖有一大堆對白但唔覺得悶，反而會睇得好過癮，會諗哥連幾時可以拆穿愛瑪既西洋鏡呢？但又想佢地係埋一齊，既得意又矛盾，活地亞倫頭半段處理得好好，利用輕鬆既舊歐洲復古音樂去襯托男女主角之間個種古惑角力，有懷舊風格又不失現代幽默，呢個就係活地亞倫既擅長地方，運用戲中既情景去襯托本身獨有既音樂再加插幽默既情節，好玩之處在於此。不過，今次我就覺得尾段處理得不太好，結局部份有點自圓其說，無端端會自己講個計劃出黎，令到戲中所有謎團突然間講晒出黎，好突兀；還有最尾部份，男女主角既感情線其實之前埋既伏線並唔明顯，之前唔會點覺得哥連係鍾意愛瑪，但為左完左部戲又突然間整個模糊關係，冇原因之下係埋一齊又覺得有點兒戲，呢個位係扣左分既。

男女主角表現不俗，愛瑪史東演的少女既可愛又醒目，係有魅力既，難怪成為活地亞倫既新寵。

全片既Color Tune都係偏黃，有懷舊歐洲復古味道，親埋舊式音樂，成件事好舊西片風格，玩得到位。

演員方面，我真係越黎越喜愛愛瑪史東，戲越黎越好，表情繼續浮誇，瞪大對眼但又不失可愛，今次演出自然，恰到好處，難怪成為活地亞倫既新寵吧。哥連費夫依舊做好本份，做一個專業而固執，自以為自己一套道理行到通既魔術師，到最後睇化晒而不失本身既專業形象，對佢黎講可能係手到拿來，但要演得自然其實好難的。

今次睇呢套活地亞倫作品依舊唔錯，繼續從人生既大小二事尋找愛情大道理，去愛誰根本欺騙不了自己的，所謂的常理及科學根據只係通通呃自己既理據，去愛人唔難，但要搵個人愛其實好難，既然搵到個自己會去愛的人，何不去愛一次呢？

情迷月色下 Magic In The Moonlight
導演：活地亞倫 Woody Allen
演員：哥連費夫、愛瑪史東
片長：97分鐘
級別：IIA
評分：7/10