＜＜神探福爾摩斯：詭影遊戲＞＞：新鮮感欠奉 集中動作場面但難勝第一集

第一集的福爾摩斯電影版係十分成功，有近年灸手可熱的羅拔唐尼以及型佬依舊既祖迪羅主演，拍攝手法又比較新穎，故事又引人入勝講查案，自然多人捧場及好奇心驅使入場睇，加上羅拔唐尼演出生鬼，有第二集都唔出奇，正因為咁，續集一定遜色過第一集既定律又再次出現，就算今集動作場面有幾密集式，羅拔唐尼不停喬裝扮鬼扮馬，畫面有幾華麗，故事上都好難有突破，格局上新鮮感欠奉，好多都係第一集出現過，製作上無疑令人覺得照辦煮碗換個故事再拍多次差唔多野，所以今集唔係唔好睇，只係明顯地睇完第一集既人都會覺得第二集都係咁啦，冇乜特別咁囉。

羅拔唐尼今集不停變造型扮鬼扮馬又扮女人，主力搞笑減低嚴肅劇情，呢D點綴式情節係會令故事豐富D，但未必幫到電影會好睇左。

後段有一幕眾人奔跑逃進森林，運用戰狼300式的慢鏡場面去交代戰場子彈橫飛及驚險場面，係好睇拍得好，係今集的亮點。

今集再度不停運用福爾摩斯自己本身預知的能力去對抗敵人，勁屈機根本冇得打，吹到咁大真係好難再投入睇落去。

值得一提係今集動作場面好多，最好睇係火車殺敵個幕，雖然明知好假，但係拍得好，故事情節亦都計算得好精密，都會驚嘆一下的，羅拔唐尼都做得好，扮女人搞笑一下在所難免，相比之下，祖迪羅演的華生今集比較內歛，發揮一般，或者咁講，係可能戲份始終集中晒羅拔唐尼身上，而佢既發揮一樣的出色，搶了唔少鏡，所以其他演員相比下未及佢咁好，或者只有奸角謝諾哈利斯演得較出眾，佢演得好老奸巨滑，老謀深算既表現，點知結局令佢"一鋪清袋"，總體而言，今集唔係唔好睇，動作場面係出色，但掩蓋了查案及案件本身的情節，令到觀眾未必主力留意單案，反而想睇多D動作場面，我覺得呢類戲本末倒置左，如果有第三集，我希望會集中返案件既曲折離奇及福爾摩斯既難處，動作場面始終睇得多都會膩啦。

神探福爾摩斯：詭影遊戲 Sherlock Holmes : A Game of Shadows
導演：佳烈治 Guy Ritchie
演員：羅拔唐尼、祖迪羅、謝諾哈利斯、露美慧拍絲
片長：129分鐘
級別：IIB
評分：7/10