＜＜奇逢敵手＞＞：搞乜鬼林嶺東唔知拍乜劣作

據說呢套戲係奇片，奇在電影保證既導演林嶺東可以拍出一部差到爛既劣作；集合多位好戲之人去演出；監製係杜琪峰；銀河映像出品；出外景拍以為好大製作；海報好有鎗火影子，以為係一部鬥智鬥力既警匪片，結果俾佢呃左，一堆堆以為結合左就會好鬼好睇既元素融入呢部電影後，點知換來既係一部愛情動作式喜劇，嘩！乜咁大整蠱呀，難怪當年上畫無聲無息又唔收得之後又冇人提起過咯。

舒淇原本係主線人物，到後段好似失去重心咁，人物發展更係原來要搵白馬王子，唔係呀化？咁之前做差婆去捉賊係為左講咩呢？

電影裡既動作場面算係比較有睇頭，畢竟導演擅長拍動作片，可是呢套戲只有兩場大場面動作戲，水上電單車追逐戰晒風景，同埋尾段安志杰與任達華對打，但似大人同細路仔打交咁，總知係唔知點咁。

故事係講舒淇陪演Model既陳逸寧去馬來西亞拍廣告兼渡假，遇上私家偵探安志杰同許紹雄偵查導彈導航系統，係一次誤會之下發現共同目標係任達華演的奸角，同時舒淇亦想搵返夢中既白馬王子，於是在渡假中進行調查。

故事真係爛到爆，舒淇原本係故事既重心人物，以為一開始佢做的差婆去捉賊，然後會發展同呢件事有咩關係，點知完全無關，之後連提佢係差婆都冇點提過；之後故事轉移陣地去馬來西亞，點知全片八成戲都發生係一間酒店裡，以為出埠拍野大製作點知慳皮之極；之後拍廣告個段完全同主故事無關，拖延時間勁多；導彈導航系統都不明所以，究竟係D乜野黎又冇講，任達華拎黎做乜又冇交代；人物超多但冇一個有性格背景同埋做緊乜，只係知有一班人係度柴娃娃渡假走黎走去，真係睇到我不停界櫈。

稍為有睇頭係林嶺東拍慣既動作場面，中段既水上電單車追逐戰固然拍得唔錯，但配樂硬加渡假Feel既音樂真係好格格不入兼令到件事好唔緊湊，仲好似睇緊旅遊廣告添，不停晒風景；尾段安志杰與任達華既對打都算拍得流暢，但眼見安志杰明顯係食過夜粥，有武打底子，面對灰諧形象既任達華，難免有大人打細路既感覺，感覺係冇得打而搵交打。

演員方面，全片只得任達華比較突出及做得比較有眼睇，佢演一個古靈精怪既奸角，愛跳舞而暗藏陰謀既主腦，調皮得來又不失特色，角色設定上算係合格，其他完全不合格，舒淇劇本上之爛而沒戲可演，安志杰唔識做戲，許紹雄與杜汶澤只為間場而搞笑，其他配角黃浩然、黃卓玲、吳大維、林雪個個都做得戲但似客串演出，唔知係套戲裡做緊乜咁，浪費一班演員。

眾多演員裡只有任達華既角色比較稱職，角色設定上佢係一個古靈精怪常常跳舞而暗藏陰謀既奸角，調皮之餘又不失陰濕，係突出但其他好戲既演員沒甚特色，失色不少。

整體而言，如果以為呢套由林嶺東執導既戲會好大製作，穿州過省咁轟轟轟既動作片，錯晒了！呢部我覺得係想打造一部奇情既警匪片，用輕鬆幽默既氣氛去拍一部動作片，所以有渡假感覺及調皮奸角，可惜呢D唔係林嶺東擅長既元素，以致拍到不倫不類無劇情可言既爛片，想求變倒不如從擅長既片種加插元素或題材會更好吧。

奇逢敵手 Looking For MisterPerfect
監製：杜琪峰
導演：林嶺東
演員：舒淇、安志杰、任達華、陳逸寧、許紹雄、黃浩然、杜汶澤、林雪、黃卓玲、吳大維
片長：101分鐘
級別：IIA
評分：4/10